وسدده له لكمة ثم مسح ماجد على فمه ورفع نفسه بيضرب رعد بس رعد كان اسرع ، وقاله- شفت لو شفتك تقرب لزوجتي وش بسوي فيك ؟ قسم بالله ياماجد هالديرة مابتقعد فيها !
ماجد-هي طلعت قدامي !
وماجد ضرب رعد على فمه بقوه وصفق رعد وطاح ماجد عالارض وقال- لو شفتها تمشي قدامك بالعبايه غير طريقك يانذل !
وتركه وراح وماجد من شدة البروده الي يحس فيها بفمه ركب سيارته وراح بيتهم عند امه ، هو دايم ان انصفق مايروح بيتهم بس هالمره انضرب بقوه ،
وصل رعد للبيت وهو يهوجس بفستان ايار وانه ماجد شافها وزاد سرعته بزياده وهو معصب ووصل ودخل للبيت ، من سمعت ايار صوت الباب ينفتح فزت من على السرير ووقفت عند باب الغرفه تناضره بجمود، طلع رعد بسرعه للدرج وفتح باب الغرفه وشافها قدام الباب تناضر ثم شهقت من شافت يده فيها دم وفمه كله احمر وقالت- مين سووا فيك كذا !!
رعد-مافيني شي ، جيت اشوفتس نمتي ولا باقي
ايار-طيب؟ مانمت وش تبي
رعد- ولا شي
ولف رعد بيطلع بس سحبته ايار وقالت-انثبر عالسرير وانا بجيب معقم
ابتسم رعد بخفه وسمع كلامها وجلس عالسرير ودقايق وجات وهي بيدها شنطه اسعافات اولية وقال- اوف اوف والله لو اني مصاب برصاصه!
ضربته ايار بخفه على كتفه وقالت- لا تتفاول ياكريه
شهق رعد بألم وهو ماسك فمه يقول -اااخ انا مصاب !
ضحكت ايار وقالت-ياكذاب ضربتك بكتفك بعدين توك تقول والله لو اني مصاب !
رعد وهو سارح بضحكتها- نسيت !
ابتسمت ايار وبدأت تضمد جراحهه
~
ارال-شفيه ابوي تأخر ؟!
ليلاس-والله مدري المهم شوفي الايهم جاي روحي للغرفه
طلعت ارال لغرفه ليلاس وهي بالسرير تدق على ابوها للمره الثالثه ومايفتح
وليلاس كانت تشيل الصحون توديها للمطبخ لكن دخل الايهم وحسبها بالغرفه وتوجه لها يدق الباب وماسمع صوت ولا ارال سمعت صوت لانه الجوال كان بأذنها، فتح الباب وشاف ارال جالسه بالسرير ووجهت نظرها للي ورا الباب وشافته الابهم وشهقت تقول- بسم الله !
الايهم- اعذريني احسب ليلاس بالغرفه !
ارال-طيب دق الباب؟؟
الايهم وهو يفتح الباب زياده سارح فيها- دقيته والله !
ارال بأستغراب وهي تضحك - طيب اطلع !
الايهم-ابشري واسف
قفل الباب وتكى عالباب يبتسم وجات ليلاس وشهقت تقول-ترا ذي المره الثانيه لايكون دخلت !
غير تعابير وجهه وقال- دقيت والبنت الي جوا قالت لا تدخل
زفرت ليلاس براحه وقالت- اشوا ! شتبي
الايهم- ياكثر العزايم! جدي يقول بكره ال خالد جايين
ليلاس-ناصر؟
رفع الايهم حاجبه ونطق بسخريه- ناصر؟
ليلاس وهي تحاول تدارك الوضع- قصدي لمار اخت ناصر؟
تنهد ناصر ونطق- ايه خلاص انا بروح
تجاهلها وتوجه لغرفته يهوجس ودخلت ليلاس للغرفه ونطقت ارال- امي تقول ابوي يتروش ! خلاص برجع مشي طولت عندكم
ليلاس-شدعوه؟ لو تبين تنامين نامي عادي
ارال-لا خلاص يعطيك العافيه برجع كعابي ، احبببك
ليلاس-افاا مب انا الي ارسل بنت عمي كعابي
اخذت جوالها ودقت على امجد ورد الايهم-هااا
ليلاس-تودي ارال بيتها ولا اقول للايهم ؟ اذا لك خلق يعني
الايهم-امجد يتروش! انا بوديها
ليلاس- ياحبكم للترويش! طيب يلا البنت بعبايتها
~
تنهدت بتوتر من ارسل لها عزيز تجي للاسطبل دقت بابه وسمح لها بالدخول وامرها بأغلاق الباب- اجلسي
جلست ديما ونطقت بتوتر- شسالفه؟
عزيز- وش الي شسالفه
ديما-مجلسني هنا وتقول وش!
عزيز- ناسيه انه عندك دوام انتي؟؟
ديما بصراخ وهي تقوم من الكرسي بقهر-طيب ليش مناديني مكتبك كنت مخليني اداوم بالاسطبل براحتي!
ابتسم عزيز بسخريه ينطق- عارفه يعني وش شغلتس؟ نظفي الخيل
قطبت ديما وقالت-وشو؟ اروشه؟
ضحك عزيز ونطق-فضلاته
ديما-تمزح صح!
عزيز وهو يبتسم-لا
ديما-تخسي! والله تخسي !
عزيز-ماعندي اي مشكله اعطيك ورقة الطرد وتقعدين انتي وخيلك بصالة بيتكم بحكم انه ماعندكم اسطبل بالبيت !
ديما بقهر وعصبيه- كم خيل؟ لي شغل بس بوهجي!
عزيز- للان موجود٥ خيول، شوفي شغلتس يلا
ديما بهمس-يلعن وجهك ياكريه
عزيز-تدعين لي؟
ديما-اي اقول الله يوفقه هالمدير العادل!
عزيز وهو عارف انها تدعي عليه-اي اي شكرا يلا بس روحيّ إشتغلي
~
دخلت وركبت ورا وكانو اثنينهم ساكتين ماينطقون وتوتر الايهم من الوضع وشغل اغاني وهو مبطئ السرعه مايبي يفارقها وكسر الصمت ونطق- تبي امرك بشي قبل مانوصل البيت ؟
وجّه نظره عليها من المرايه وهي ناضرت فيه من المرايه وهزت راسها بالنفي وهو انقهر لانه يبي يسمع صوتها وقال- تبين؟
ارال-لا!
ابتسم الايهم وقال- طيب اهدي
ارال-عفوا بس وش قلت عشان تشوفني معصبه؟؟
وسع ابتسامته من شاف خطته تنجح وانه فتح سالفه معاها بس مو بالطريقه الي يبيها وقال- لا!!
ارال- بسخريه بمزح وعينها فيه لمعه - لا يا ايهمي مابي شي يعطيك العافيه
توسعت عيونه من سمع "ايهمي" وقال- هاه؟
سكتت من استوعبت كلمتها وقالت-هاه؟
الايهم وهو يحاول يستوعب ويخفف السرعه اكثر- لا يا ايش؟
ارال وهي تستغبي-يا ايش
ايهم-ارال منجد وش قلتي ؟
بلعت ريقها من سمعته ينطق بأسمها وطولت نضرها فيه وقالت- ايهمي، المهم مو ناوي تزيد سرعتك؟
الايهم بأبتسامه- عيون ايهمك! ابشري
ناضرته وابتسمت من تحت النقاب وابتسامتها واصله لاذنها والايهم عارف انها تبتسم من عيونها ، وصلها وفتحت الباب ونطقت-يعطيك العافيه ماتقصر !
الايهم-مابينا ياعيون ايهمك!
ارال- شكلك مب راضي تنسى!
الايهم وهو يضحك- ولا بنسى يا ايهمك!
قفلت الباب بفشله ودخلت بيتها ولفت تناضره ينتضرها تدخل البيت، دقت الباب وفتحت لها امها وقفلت الباب ومشى لبيته بسرعه،
ابتسام-بكره عزيمه وعمي عزم كلل الحريم الي يبون يخطبون ايار!
ارال-شلون يعني؟؟؟ ايار مخطوبه
ابتسام-وهل ولد رماح سوا زواج والكل درى به؟ محدن يدري عن زواج ايار وكم حرمه داقتن علي تقول جايين لعمل خير وانا اأجلهم!
ارال-يايمه اذا جوك قولي مافي نصيب وحطي رجلك واركضي
ضحكت ابتسام بتعب وقالت بكرا وخير !
توجهت ارال لغرفتها ودقت على ايار وردت ايار الي منسدحه بالسرير ورعد بالحمام(يكرم القارئ) وفتحت ايار السبيكر ونطقت-هلا يعيني
ارال بأبتسامة-امي تقول بكرا عزيمه
طلع رعد من الحمام بس ايار ما انتبهت وقالت-وش جديدك
ارال-امي تقول ٥ او٨ حريم متصلين عليها يقولون بنخطب بنتك ايار وامي مصرفتهم وجدي عازمهم لبكرا يعني مافيه مهررب
ايار-منجدهم ذول؟ انا متزوجه طيب !
ارال-اي يعني .. مدري كيف اقولك
ايار بعصبيه-فهمت فهمت كله من رعد ماعلم احد، معلينا
ارال-وش بتلبسين لون؟
تنحنح رعد وشهقت ايار وقفلت السبيكر وهي تناضره
ايار-اامممم ممكن البس بنفسجي فاتح! طلع ببالي لوك خرافي
ارال بمزح-البسي اسود !
ايار وهي فهمت- ايييوا صح خلاص تم اسود
ضحكو وقفلو من بعض وتوجه رعد لايار وقرب منها ونطق-جوتس خطابين؟
ايار بشهقه مصطنعة-وانت تتسمع علي انا واختي؟؟
رعد بصرامه-لا تغيرين الهرجة، جوتس خطابين؟
هزت ايار راسها ب"اي" وفردت شعرها على ظهرها وتمددت بالسرير
رعد- بكره العصر اخذتس نشتري دبله
ضحكت ايار بعلو صوتها وقالت-الحين حسيت اني زوجتس؟
رعد-شدعوه وبكره ماعندي شغل كثير عادي نتأخر دوري براحتس
هزت ايار راسها بالنفي وقالت- لا عشان هم بيجون المغرب ولازم اجهز العصر، خليها يوم ثاني وانتبه لا يطير حسك
ابتسم رعد واخفى أبتسامته بسرعه وقال- يعني تبينهم يخطبونتس؟
ايار-يمكن
رعد-طيب
تحسست ايار وقالت بسخريه وبهمس -الحين يقول متعوده على ماجد !
رعد-معد بقوله، واسف لاني قلتها اول
وطلع وقفل الباب وراه نازل للصاله ينام فيها،
~عصرآ
اهل متعب كلهم مكهربين يتجهزوه ، قهوى او لبس او مكيب او بخور تقروشو جدا وكل واحد همه يضبط نفسه ككل عزيمه تصير عندهم، الا جدتهم ريمان الي حاطه حيلها بالقهوه والاكل وبنتها مها معاها
ريمان-اذا باقي ساعه عالمغرب علميني عشان نتجهز
مها-ابشري يمه
بيت رماح-
رماح-سلطانه كويتي ثوبي؟؟
سلطانه-ايوا ايوا .. هيام تعالي سويلي مكياجي!
تركي- يمممممه وين شماغي؟
هيام-انا كويته تلقاه على سريرك
سلطانه-هييياااام
هيام-جااااييه جااايييه
بيت خالد-
ساره-يبه تبي اسويلك اكل؟؟
خالد-لا يابنتي . ها تجهزتو؟
ميار من غرفتها بصوت عالي-لاااااااا!!
خالد-بسم الله بشويش بشويش
الجو-معليك منها يلا باقي شوي ونجهز
بيت احمد-
حصة-يلا انزلووو
الايهم-انا وامجد وليلاس بسيارتي
حصة-وشوله؟؟ سيارة ابوك كبيره وتكفي
امجد-مع ماجد؟ لا
حصة-لوت عظامك يارب!!
الايهم- استغفرالله! شلون تبينا نجي معتس وانتي تدعين تسذا؟
حصة-انا امك ياقليل الادب!!
دخل عليهم ماجد-يلا ابوي من اول يدق بوري!!!
الايهم-ليلاسي يلا مشينا
ماجد-شلون؟
الايهم-مو شغلك يامجلووود!
فز ماجد بيضرب الايهم بس مسكته حصة وقالت -خلااص!! كله من راس هالرعد فككم ولا كنتو اخوان!
الايهم-ماني اخ واحد حاط عينه على متزوجه!
امجد-اخوي معليك منه وامش
ليلاس- امشي يبن الحلال وخله يدزها
ماجد-ليلاس! والله محد بيفكك مني!
الايهم-هيا المسها؟؟
احمد وهو معصب-عالسياره الان! الايهم وليلاس وامجد بسيارتهم يلا!!!
ابتسم امجد ومسك ذراع الايهم وتوجهو لسيارة الايهم.
بيت عبدالملك-
ابتسام- نص ساعه ونجي خلك بالصاله
عبدالملك-طيب يلا سريع
ارال-يمه انا بحط عطر بشنطتي لا تحطين انتي
ابتسام-طيب اشوى قلتي لي كنت بجيب الكبير
بيت رعد-
رعد وهو يصحي ايار من النوم- ايار.. ايار
ايار-همممم
رعد-يلا امشي نشتري دبله!
ضحكت ايار وهي توها تصحى من النوم وقالت-منجدك؟
رعد بجمود-ليش اكذب؟ يلا البسي عبايتك
ايار-الساعه كم
رعد-٤:٣٠
فزت ايار وقالت-اذا رحنا رح نكون متأخرين زياده!! وماكويت ثوبك ولا شماغك ولا تمكيجت!
رعد وهو يضحك على بلشتها- عادي يحبيبتي
ناضرته ايار وقالت-حبيبتي؟ دزها بس
استوعب رعد وقال-ايه نسيت دايم اقولها لهيام
قامت ايار بدون ماترد عليه وطلعت ثوبه من الدولاب وكوته وتركته بمكانه ودخلت تسوي لها قهوه وقالت-فطرت؟
رعد-اي فطرت ، انتي افطري
ايار-مابي
رعد-شلـ!
ايار - مو شغلك
وتوجهت لغرفتها تتمكيج وتلبس وهو منسدح عالسرير معطيها ضهره. وخلصت ولفت له وهي مبتسمه وقالت- شرايك؟
رعد-مو شغلك دزها
قطبت ايار وقالت- دزها مره ثانيه ! يع ماتنطاق
ضحك رعد وقال -خلصتي؟ يلا بلبس
ايار-مو شغلك مره مره ثانيه! ودزها مره ثالثه
قرب رعد منها وقال-يعني تبين تروحين كعابي؟ المهم لا تطلعين عند الحريم كثير سلمي وررحي الصاله مب لازم تجلسين بالمجلس
تجاهلته ايار ولبست عبايتها وهو لبش ثوبه وتبخر وطلعو،
ببيت متعب،
ريمان-يالله انك تحييهم الله يحييكم
الحريم-الله يبقيك يارب
ريمان بصوت واطي -مها وين القهوه والحلا!
مها- بالمجلس معليتس
ابتسمت ريمان ودخلت عليهم المجلس ودخلت وراها مها تباشر بالقهوه ووراها ابتسام تباشر بالحلا وسلطانه معاهم،بينما البنات الي عند الباب
هيام-يلا سوير ادخلي سلمي!
ساره-نعم؟ انا مو اول وحده مالي دخل
ارال-ياليل هيام يلا انتي
هيام-دزييها بس
جود-انا ثاني وحده اخلصو
ارال-وشو حلا هو ثاني وحده؟؟ .. المهم انا ثالث وحده
وضحكو البنات عليها وقالت جوري-خلاص اخلصو عييب
دخلت عليهم ايار ونطقت-بسم الله شفيكم انتم
الجود-ايار شرايتس تسلمين اول وحده
ايار وهي تعطر نفسها-طيب مو مشكله
ارال-لا يا ايار!
ايار-طز فيهم
ليلاس-شسالفه؟؟
ايار وهي تفتح الباب-بعدييين... السلام عليكم
الحريم كلهم-وعليكم السلام
وسلمت عليهم وحده وحده ونص الحريم يناضرونها بتمعن وهي متجاهله هالامر، الى ماتجرأت حرمه وقالت-ماشاءالله عليك يا ايار تصلحين لولدي سلطان!
ايار-نعم؟
ابتسام وهي تحاول تتدارك الوضع-ايار صبي قهوه لي وللحريم
تجاهلتها ايار وصبت قهوه لامها ولكم حرمه قهوتهم خلصت وطلعت وقفلت الباب وراها وبعدها البنات
يتبع...
كاتبتكم-لـيـلاس الـحـارثـي🫐 .
اعذروني عالقطعه 🥹
