Unicode
" လက်ဖက်ရည်ပွဲအသင့်ဖြစ်ပါပြီ အရှင့်သား "
မြောက်များလှစွာသော စာရွက်စာတမ်းများနှင့် ကမ္ဘာ့မြေပုံတွေကြားခေါင်းစိုက်နေသူ အရှင့်သားမှာ အသိပေးသံကြားမှ အာရုံလွှဲလေသည်။
" ခဏလောက်အနားယူပါဦးလား အရှင့်သား၊ အရှင့်သားစာဖတ်နေတာ နာရီအတော်ကြာနေပြီ "
ရံရွှေတော်ဖြစ်သူ ရာဂျာ ( Rajah ) ရဲ့ စကားကို အရှင့်သားဆိုသူက အပြုံးတစ်ခုဖြင့် တုန့်ပြန်သည်မှာ..
" နာရီအတော်ကြာဖတ်တာတောင် မလုံလောက်သေးဘူး၊ ကမ္ဘာကြီးက ငါတို့ထင်ထားတာထက်တောင် ပိုကျယ်ပြန့်တယ်လေ ရာဂျာ "
ပြောလို့မရနိုင်မှန်းသိတော့ ရာဂျာလည်း လက်လျှော့ကာ ငြိမ်သက်နေလိုက်ရသည်။ မငြိမ်လို့လည်းမရ။ စကားတွေအများကြီးပြောမိရင် အရှင့်သားက နားငြီးတယ်ဆိုကာ အပြစ်ပေးခံရမှာ သူကိုယ်တိုင်ပဲမို့။
အာဂရာဘာ ( Agrabah ) တိုင်းပြည်ရဲ့ ရင်နှစ်သည်းချာမင်းသားလေးက ချောမောတယ်၊ ဉာဏ်အမြော်အမြင်ရှိပြီး သနားကြင်နာတတ်တယ်ဆိုတဲ့ဂုဏ်သတင်းဟာ တိုင်းပြည်အတွင်းမှာသာမက အခြားတိုင်းတစ်ပါးတွေအထိတောင် ကျော်ဇောကာမွှေးပျံ့လေသည်။ လူတွေမသိသေးတဲ့ မင်းသားရဲ့အကြောင်းကတော့ သိပ်ခေါင်းမာပြီး စိတ်အလိုမကျတဲ့အခါ အနားကလူကိုအပြစ်ပေးတတ်သေးတယ်ဆိုတာပင်။ ထိုအကြောင်းတွေကတော့ ကိုယ်တွေ့ကြုံရသည့် ရာဂျာတစ်ယောက်သာသိနိုင်လိမ့်မည်။
ဒေါက်... ဒေါက်..
နှစ်ချက်ဆင့်ခေါက်တဲ့ တံခါးသံဟာ အတွေးနွံမှာနစ်ဝင်နေရှာတဲ့ ရာဂျာကို အသိဝင်လာစေသလို စာဖတ်နေတဲ့အရှင့်သားကိုလည်း အာရုံပျက်သွားစေ၏။ ရာဂျာက နေရာမှထကာ ရွှေရောင်ဝင်းနေသောတံခါးချပ်များကို အပြေးလေးသွားဖွင့်သည်။
" မင်းသားဂျဖာ ( Jafar ) လာပါတယ် အရှင့်သား "
ကြားလိုက်ရတဲ့နာမည်ကြောင့် ကြည်လင်နေတဲ့မျက်နှာဝယ် အလိုမကျခြင်းအငွေ့သက်တို့ ဖြတ်ပြေးသွား၏။ သို့သော်လည်း အရှင့်သားတို့က တစ်ခဏအတွင်းမှာပင် အပြုံးတစ်ခုကိုဆင်မြန်းကာ ဟန်ဆောင်လိုက်နိုင်သည်။
