هَمَساتُ عاشقِين

و لم لا تعود معتذرا

..
"حبيتها متأخر"....
_ ي مجتبى تعال نفطر بي هناك...
_ اي جاي جايي...
انا مجتبى غني و مدلع... في القصة دي كان عمري ١٣ اظن... كنت في اولى متوسط... 
كان عندي شلة في المدرسة منها صحبي احمد .... كنا مشاغبين شديد و مجننين المدرسة...
و اول صفة اتصفنا بيها...
التنمر...
_ عاين خالد داك... امبارح شفتو بفتش تحت كنبتي... شكلو بفتش اكل و لا شي...
_ هيي دا سراق الفصل...
و قلتها بي صوت عالي عشان يسمعني.... زعل خالد دا و مشا من الحتة...
ركزنا علي زول تاني...
نوران...
كان قاعدة بعيد براها و ماسكة ليها قزازة بارد بتشرب في شي كدا جواها لونو غريب...
مشيت عليها و انا بضحك و شلتي بي وراي... كانت اشطر وحدة في الفصل عشان كدا ركزنا معاها...
_ هيي...
عاينت لي بي طرف عينا و اتلفتت...
انفعلت و مسكت باغتها ورميتها... الشي البي جوا اتكب...
طوالي قلبت ملامحي و عاينت ليها بي استحقار...
_ هها... كنتي بتشربي الوساخة دي...
كلهم قعدو يضحكو ما تسألوني لي... كانو بيضحكو بدون سبب مرات...
_ حننتي قلبي ياخ... هسي دا ما طراش عديل البتشربي فيهو...
و كنت كل ما لي بعلي صوتي...
_ ارفعيها و تمي شرابك ي بت... الزيك دا انا ما بهبشو... ي محرووومة..
قعدت تبكي و شالت باغتها و الناس كلها تعاين ليها و توسوس فيها... و احنا بنضحك و لا هامينا...
....
اليوم البعدو...
احمد شافها شايلة ٥٠ جنية و اظن الخمسين دي وقفت ليها شهور...
مشا عليها و قعد يضحك... و شالها منها... انا انضميت ليهو و ما قصرت... دفرتها ورميتها...
و قروشها وقعت بقت بتفتش فيها... لقطها محمد و انا قلت ليهو شرطها...
شرطها و لصقها بي بزاقو في شعرها...
قعدت تبكي و احنا فتنا...
اليوم البعدو...
كبينا موية اندومي تحت كرسيها و دفقناها في كرسيها... و اول ما قعدت الموية طبعت في هدومها... قامت سريع و هي بتعاين لي فستانها المليان موية... الناس كلها بقت تضحك و هي غطت وشها و بقت بتبكي و طلعت و احنا مبسوطين من روحنا و بنضحك...
اليوم البعدو...
اتهمناها بي سرقة...
البعدو...
كبينا فيها موية...
البعدو....
وقعناها في الطين...
البعدو...
ما جات...
البعدو...
برضو ما جات...
_ احمد... البت دي يا ماتت يا خلت المدرسة...
_ اها و احنا نعمل شنو مالنا و مالها...
_.....
لحدي ما السنة انتهت ما شفنا نوران تاني...
و السنة البعدها...
و البعدها...
و البعدها... الللخ
لحدي ما اتلاقينا اخيرا ...
كنت بشتري في عطر جديد لقيتها في محل العطور بتبيع علاقات قدام المحل....
اديتها قروش في الطربيزة حقتها و دخلت... قامت سكتني و ادتني ليها في يدي...
_ جزاك الله خير...
_ هااااي كتر خيري حنيت عليك ي جزمة... زحي مني ما تلمسي...
مشت و ما سمعت باقي كلامي زاتو...
اتحرقت شديد طبعا...
بس قلت حأوريها ليهو...
اتونست مع احمد و قلت ليهو يلاقيني في المحل دا زاتو عشان ننتقم منها...
اول ما جيت داخل لقيتها ماف اتمغست و رجعت انا و احمد...
مرو شهرين و نزلنا تالت ثانوي...
اول يوم متأنق و متظبط... دايما بكسر بنات الفصل كلهم... و احمد الشايف روحو ما خلي حاجة... اول وش نلاقيهو... نوران...
اعترفت في الوقت داك انها سمحة اول مرة... امكن عشان كبرت و يادوب بقيت اعاين ليها نظرة ولد لي بت... بس بالجد كان ما سمحة بس كان فاتنة عديل...
_ البت دي من متين سمحة كدا ي مجتبى..
_ هاا... تكون سوت ليها كريم في وشها ما تعاين لي بنات الخدم ديل عليك الله...
طوالي جاني اني انتقم في راسي...
كان لابسة اليونيفورم معاهو شنطة تعبانة و حالتها بي البلا... و جزمة مقطعة...
بقينا في الثانوي و ناس كبار و المظهر بقى مهم عشان كدا حبيت اذلها في شكلها...
_ سبحان الله... بنتلمى دايما...
اتلفتت علي و طوالي جرت...
جريت وراها و مسكتها و براها ودت روحها لي مرمى السهام...
مشت في نص حوش المدرسة و انا ماسكها من شنطتها...
_والله ماعارف امسكها من وين... مافي حتة ما مخيتة...
طوالي استسلمت و غطت وشها...
_ و الجزمة دي ما ياها حقت مهند الجدعها جمب العمود قبل اسبوع... ماشاء الله طلعتي خطيرة... لقطيها من جمب بيتهم... لكين احسن تجددي مع الناس... كلهم يشترو جديد و انتي ما تشتري... ليه ياخ حرام...
بقت بتبكي و انا صوتي بعلا و الناس بدت تتلمي و تتكلم عنها و ماف زول بيسألني...
_ ابكي ابكي.. اتشطفي بي بكاك... ياها حيلتك اصلا م عندك غيرها... و دا شنو الجوا الشنطة دي كدي...
فتحتها و بقيت بشيل واحد واحد و بضحك...
_ اييييك قزازة البارد دي معاك من كنا في سنة اولى متوسط.. الشي دي حصلت الصالحين اجدعيها ي بت... لقطي مع الخالات بتلقي كتار تاني... صحي لسع بتشربي العجين داك... ما شاء الله تبارك الله ظاهر في مخك...
بقيت بهبش و بهبش...
لقيت محفطة قروشها...
_ لي عندك العروش دي كلها و انتي حالتك صعبة كدا... سرقتيها و لاشنو.
_ والله م سرقتها جيبها لي...
_ طلع عندك لسان ما شاء الله...
_ جيبها لي...
_ القروش دي مسرووووقة...
و ديتها لي المكتب و قلت لي الاستاذ انها سرقت قروش... الاستاذ شال القروش و انا مشيت مبسوط و حاسي روحي عملت انجاز...
جاني احمد..
_ ليه ما ناديتني ياخ كنت عايز احضره...
_ والله ذليتها ليك وريتها الله كم
.....
في اليوم التاني...
جات و كان وشها مقلوب و كأنها ميتة عديل...
بس كان تجي تقرا و تمشي...
اليوم البعدو برضو
كان جنها قراية و كان اولة الدفعة...
المدرسة عملت حصص مجان بتاعت تركيز... كان اول من يجي... كنا الاتنين علمي أحياء و احمد هندسية...
و كانت بتحب كتبها... عكسي انا العندي اساتذة و مدلعني... و يدخلو لي المعلومة جوا راسي... درجاتي طيين... طيش الفصل... بس اهلي بدفعو لي الاساتذة عشان انجح..
بقيت شوية بقرا في تالت عشان مافي طريقة غش...
يوم و احنا في حصة التركيز...
جات متأخر و كان هدومها وسخانة و نفسها قايم.. جات قعدت جمبي لاني طوالي بقعد ورا...
قمت من جمبها و قلت لي الاستاذ معليش بس ما بقعد جمبها...
و قعدت قدام... و طبيعي رقدت... بقيت اعاين ليها كان دموعها بتنزل و هي بتمسحها طوالي...
سرحت فيها و في جمالها...
كنت متناقض مع نفسي... معجب بيها و بأذيها...
الحصة انتهت...
قعدنا في الفصل انا وهي...
مشيت قعدت جمبها و قلت ليها...
_ انتي عاجباني شديد....
بدون مقدمات... فكيتها كدا بس...
انصدمت و قالت لي بستأذنك و طلعت طوالي بدون ما تعبرني... طبعا غضبت و ضربت الكنبة و الدم بقا بيغلي في راسي و طلعت... و حلفت اني ما حأخليها...
كنت مغرور شديد...
اول ما جات اليوم التاني...  مسكتها من يدها و كان معاي احمد... كان حكيت ليهو الحصل...
_ انتي لاقاني وين ي محرومة..
_ ي وهمي ي م مربي بس حياتك كلها مدلع و عايش بي القروش احنا المالاقين اللقمة م حصل عملنا العملتو.. ياخ مشكلتك معاي شنو انا ماعايزاك... ي هايف ي ضايع ي ما عندك سياد يلموك...
احمد مسكها و انا اديتها بي كل قوتي في كراعها...
صرخت صرخة وحدة و داخت...
جرينا طوالي من المكان و انا بقيت خايف و احمد بقا برجف عديل...
اتدسينا و ما جينا المدرسة الا اول يوم لي امتحان الشهادة...
بقينا قاعدين ساااي و انا خااايف و ضميري بيأنبني...
ضربتها بي كل قوتي لمن يدي وجعتني... وهي حتكون كيف....
حتى لو عملت فيها العمايل... كان جنها قراية و كان عايزه تنجح... كان حلمها عديل...
ما بقدر اقعد الا اشوفها...
جريت سألت بت من عنوان بيتها ورتني...
كان فاضل علي الامتحان ساعة...
جريت بي كل العندي و مشيت بي كرعيني لحدي بيتها...
كيف بتمشي المسافة دي كلها هي كل يوم
لحدي ما وصلت محل الوصف...
بقيت بتنفس و دقيت الباب...
بعد مسافة فتح راجل كبير كدا عمرو في الستين كدا...
سلم علي و هو باسم.. ما عارف العملتو في بتو..
قلبي حن عليهو من عجزو و انو وحيد مع بتو في البيت...
دخلت و هو قفل الباب...
_ اهن ي ولدي... ان شاء الله خير...
ضحكت و قلت ليهو زميلها بس...
اتبسم و قال لي... و ياريتو ما قال...
_ والله نوران دي... تعبانة شديد... نفسيا اكتر من ماديا و جسديا... يعني كل يوم بتجي بتبكي... من اول يوم مشت المتوسط... بتبكي بس... انا بتمنى ياخ كل يوم اني اشوف بسمتها بس... بس موت امها زاد علينا المصايب... ماتت وهي في اولى متوسط... بقت بتصوم بس... لا اكل لا شراب... لا بتضحك... لا بتتونس... بس كدا... حنيت عليها شديد... و كنت ببكي علي حالتها... بي جسمها الهزيل دا بتنكمش و تقعد تقرا من الليل لي الصباح... بي نور القمرة دي بس والله... كل يوم بقت بتبكيني انا العجوز... و يوم مشت اول يوم ليها في الثانوي... قروشها اللاماها في اجازتها كلها... بي تعبها و سهرها... كان النهار كلو تبيع و الليل تقرا... حفظت المقرر قبل تخش تالت... بس... كلو ضاع... ما قدرت تسدد الرسوم بقيت انا بشتغل و هي بتشتغل عشان نقدر نسدد القروش حقت مدرستها و نكفي حق البيت... ايام كتيرة كان بتنوم بي بطن فاضية... حتي انها اشتغلت في العتالة عشان تكفيهو... حسي... كلو راح... لا قروش لا امتحان... كان حلمها تبقى دكتورة... كان تقول لي كل يوم لو كنت دكتورة... كان عالجت امي و ما كان ماتت... و انا كنت ببكي ي ولدي من كلامها دا... بس هسي... هسيي.. الحمدلله بس على كل حال
و قعد يبكي... و انا دموعي نزلت بدون ما تتوقف...
كيف انا كنت غافل كدا.. انا كنت حرفيا... سبب عذاب البت دي كلو... تعاسة حياتها كلها بي سببي... انا الاذيتها و انا الدمرتها... ليه... ليه سويت كدا في بت بريئة...
استأذنت منو و دخلت غرفتها.... كان حالها ما بيتوصف... كان بالجد بتبكي و تقطع القلب... ركبتها وارمة و ملتهبة ظروفهم ما خلتهم يودوها مستشفي و اكتفو انو يعالجوها في البيت... كان جسمها شاحب و ضعيف... و ماكان قادرة تتنفس زاتو... قعدت في محلي و بركت علي ركبي و....
بكيت...
انتبهت لي و غطت شعرها و قعدت تبكي...
_ ما تشوفني كدا و تقعد تضحك انا فترت والله الفيني كلو شلتو.
_....
بكاي زاد و مشيت قعدت جمبها...
_ انا اسسسسف اسفففف.... اسف ي نوران... اعفي لي والله غلطت في حقك... غلطت كتير عارف...
_ و حيفيد شنو اعتذارك... ما عندي شي اها اخسرو تاني اعتذرت ما اعتذرت ما فرق معاي...
_ ي نوران...
_.....
_ عايزة تمتحني...
_ و وين هسي تاني؟... اقعد هنا بس لمن الله يشيلني وارتاح...
_....
دنقرت عليها و شلتها في ضهري... كان لابسة هدومها من اليوم داك... غطيت راسها و بقيت طالع...
بقبت بتكورك و تقول لي واديني وين...
شلت شنطتها وودعت ابوها و جريت في الشارع زي المجنون...
_ ي ووولدددد نزلنيييييي...
_ ما حأنزلك حتمشي تمتحني...
_ الوقت فات مافي طريقة تاني...
_ لسع فاضل ربع ساعة...
_ انت مجنون...؟ ؟؟؟؟
_ انا مجنون بيك...
سكتت و رقدت على كتفي... بقيت برجف داخليا... كان نفسها قريب من رقبتي و كان وشها قريب من وشي...
همست لي...
_ انا زاتي .... (........ همسات
_و انا بععععشقك ( عاشقين .........
____________The ** End ___________