#أبن_ليل
#صاحبة_البطل_الواحد
#أميره_اسامه
البارت الثامن
....................
دعاء.....يلا احكي يا دره سمعاكي
دره....بتنهيده أبدأ منين
دعاء.....زي ما تحبي والاهم عايزه اعرف سيبتي الطب ليه يا دره؟
دره.....هحكيلك انتي اكيد عارفه كل حاجه وحكايتي مع يوسف بدأت ازاي
عمري في حياتي ما شكيت في حبه ليا لحظه كان بيحبني اكتر من نفسه اكتر حد وقف جنبي ودعمني وشجعني خصوصا لما سافرنا كنت خايفه اوي يا دعاء مقدرش اكمل دراسه يعني اتشغل بالجواز المسؤوليه تزيد عليا وكنت خايفه اكتر يجي علي يوسف وقت ويقولي وقفي البيت محتاجك اكتر خصوصا اني حملت في دارين علي طول متأخرتش بس يوسف فضل يدعمني كتير اوي وحتي لما ولدت كان واقف معايا بيهتم بدارين وموفرلي كل حاجه عشان اركز في دراستي وبعد ولاده دارين بسنه اكتشفت اني حامل كنت منهاره ومش ببطل عياط مكنش قدامي وقتها غير حل من اتنين ملهمش تالت يا اما اوقف دراسه يا انزل البيبي
بس يوسف رفض اني انزل البيبي وصمم اني اكمل وقالي انه هيعمل كل حاجه تخليني مرتاحه ومركزه لما عرفت ان البيبي توأم اتصدمت بس هو فرح وشجعني اكتر و جابلي وقتها حد يساعدني في البيت وفي دارين وقدر يوسف يخلي سنين دراستي الباقيه اسهل مما توقعت لحد ما اتخرجت وبقيت دكتوره مش هقدر انكر فضله عليا في حجات كتير اوي واللي اولهم فتره الدراسه محسسنيش بالولاد وبتعبهم وتربيتهم في وسط ما كان هو كمان بيشتغل وبيتعب وبيحاول يوفرلنا كل سبل الراحه انا عشت مع يوسف سنين جميله يا دعاء كنا اسره مكونه من خمس افراد بس كنا اسعد حد في الدنيا يوسف كان شاطر وطموح جداً تعب اوي علي شغله واجتهد عشر سنين بحالهم لحد ما قرر انه يعمل مشروع خاص بيه ويبدأ بتأسيس شركه صغيره
للعقارات في البدايه المبلغ اللي كان مع يوسف يا دوب يغطي مصاريف المقر بتاع الشركه وتجهيزه بس وقفت معاه علي الدعايه والإعلان عشان يبدأ يتعرف ومعروف ان اي بيزنس بيتفتح لو متعملوش دعايا متحرمه ومصروف عليها هيبقي الشغل فيه محدود
وقتها لما حسيت انه حيران عرضت عليه اني اديله الفلوس اللي شيلاها كنت وقتها اشتغلت وكان راتبي كويس جدا بس كان رافض اني اصرف منه لانه خاص بيا في الاول رفض بس مع إصراري قدرت اقنعه بس شرط عليا اني اكون شريكته بالنص انا رفضت لان ده مشروعه وحلمه اللي بيحلم بيه وانا عارفه ان يوسف مبيحبش الشراكه قالي يومها انه يمكن مبيحبش الشراكه لكن مش هيلاقي شريكه افضل مني في حياته وشغله وافقت علي ان الشراكه دي مجرد شراكه علي ورق انا مش هدخل في شغله خالص بس عشان اريحه سكت وبدأ يوسف يشتغل اكتر علي مشروعه سنه ورا التانيه شغله كان بيكبر بطريقه مخيفه وفي نفس الوقت هو مبسوط ومتحمس ويمكن كانت مخيفه بالنسبالي لاني مش بحب المجازفه بس يوسف كان عكسي وكان طموحه اكبر منه بكتير وقلبه جامد
