#أبن_ليل
#صاحبة_البطل_الواحد
#أميره_اسامه
البارت السابع والعشرين..
...............
بعد ما البنات اتصالحوا وكل واحده فيهم اعتذرت للتانيه وقدروا يفهموا ان مهما يحصل مينفعش انهم يقفوا قصاد بعض كملوا قعدتهم مع الشباب والمود اتغير تماماً من وقت للتاني دارين كل شويه تبص لهيما واول ما تشوفه باصص عليها بسرعه تبعد عينها هيما كان مبسوط عشان قدر يقول اللي في قلبه وعشان اتأكد قدر فعلاً يتخطي اي وجع وعرف ان قلبه يقدر يرجع من تاني ويلاقي الحب اه دارين مقالتش حاجه ولا كان ينفع تقول لانها لسه محبتهوش وهو كان فاهم حاجه زي دي ومحترمها بس عدم رفضها وتقبلها انها تسمع كلامه للاخر كل دي إشارات كانت مخلياه يطمن ان في امل والموضوع محتاج صبر مش اكتر وهو قرر انه يصبر ووعد قلبه ان دارين تحبه زي ما هو حبها.
بعد قعدتهم اللي طالت رجعوا علي الشارع مع حسن ووراهم الشباب.
ركن حسن العربيه نزلت سماح بعد ما سلمت عليهم وراحت علي البيت
عبدالله.....بابتسامه اهلا بالحلوين
دارين....اهلا يا خالو
زكريا.....تعالوا يا بنات
قربوا منه البنات بابتسامه هاديه.
زكريا....طمنوني عاملين ايه احسن؟
دارين....بخير يا جدو اطمن
ديما....الحمد لله يا جدو
زكريا....دانه ساكته ليه يا بنتي
ابتسمت دانه بهدوء أبداً يا جدو انا بخير اطمن
زكريا....حد فيكم كلم دره
دارين.....كلمناها الصبح كتير بعد ما مشيت بس مردتش علينا وبعدين موبايلها كلن مقفول
دانه....بحزن مستحيل ترد علينا وهي مضايقه
عبدالله.....مضايقه ايه بس امكم زي الفل هي بس اتعصبت شويه واول ما ترجع هتكون هديت.
دانه....بيتهيألك يا خالو مامي لما بتزعل صعب تسامح بسهوله.
عبدالله....لا معلش بقي دي اختي وانا عارفه هتعرفيها اكتر مني ولا ايه يابت
زكريا.....عبدالله معاه حق يا دانه واوعي تفكري ياحبيبتي انها زعلانه منك هي بس خدت علي خاطرها شويه واول ما تروق وترجع هتنسي وعموماً انا مستنيها ترجع وهنتكلموا معاها
دانه...بدموع في عينها عشان خاطري يا جدو خليها متزعلش مني انا مقدرش علي زعل مامي.
زكريا.....تعالي يابت في حضن جدك
قربت منه دانه حضنها زكريا بحب وطبطب علي ضهرها اوعي تعيطي طول ما جدك عايش حتي امك نفسها متقدرش تزعلك مفهوم انا هنتكلموا معاها متقلقوش يا بنات انتوا مبقيتوش صغيرين وفاهمين كويس اوي اللي امكم بتمر بيه ولازم تعذروها يا حبايبي اللي بيها مش بسيط علي أي ست امكم الوقت عامله زي المدبوحه يعني وارد انها تطلعه عليكم او علي اي حد يقرب منها وهي مضايقه .
