#البارت_الخامس
#هدية_الشيخ_هشام
#الكاتبة_التميمية
#altmeme_313
مرحبااا
جبتلكم البارت ههههه حلوة توقعاتكم بس كلها مو نفس الي راح يصير 😌 يابه تميمية اتحفيهم....
استمتعو
ايمن لزم وجهه بألم وانسدح بنص التراب ويجر نفس من الألم والدم غرك ملابسه وجهه...
هشام التفت لحوراء لازمة وجها وتبجي وخايفة...
هشام:لتخافين بويه......ماكمل راحت تركض من كدامه...
شافها اختفت..اخذ شماغه وعكاله من الارض وباوع لأيمن يحاول يكوم مابي والدم يصب من خشمه وحلكه...هشام لف شماغه على راسه ولزم عكاله بيده...
هشام راح كعد يم راسه:لك انته شنو من حيوان بت عمك عرضك وشرفك ماعندك شرف انته..تفووو على تربيتك...
وكام عافه وراح اتجه للمسجد وصارت هالبنية اباله مو مشاعر لا ..بس يكول مسكينة بس لا يرجع هذا الحيوان يتعرضلها نذل ماعنده ولا ذرة غيره على عرضه يعني كلشي يسوي...
هناك لاحظ شفته مجروحة هذا النجس ضربه..وايده هم كله دم غسلها...
صلى وطلع رجع للبيت..وهو داخل سمع بالصدفة امه تحجي ويه ايمان مرت عزام وهنه بالمطبخ وصوتهم طالع...
ام هشام:يعني انتي راضية وتردين تزوجين..يمته لحكتي خلصتي حزن على ابني ولج خجلي واستحي على دمج
ايمان:عمه الله يخليج انه بعدني بشبابي وعزام الله يرحمه راح....ماكملت اجاها كف من عمتها معدل....
ام هشام:والله انتي بلا خجل ولا مستحه ابني توه دارت سنته وانتي تفكرين بالزواج..وجهالج يا مفلوكه وين توديهم واحنه بشنو قصرنه وياج كو.... ماتستحين طايحة الحظ
ايمان لازمة خدها وبصياح:عمه مو من حقج تضربيني..انه اريد اشوف حياتي واتزوج على سنة الله ماكفرت بعدني عمري 26 ليش اضيع شبابي..وجهالي اخذهم وياي
ام هشام ضربتها مرة ثانية وطاحتلها ضرب:يالماتستحين واطولين لسانج وتصيحين والله انتي وحدة حقيرة وتكوليها بكل صلافة ازوج..كله علمود انانيتج كوا...... وغلطت عليها بحركة كلب...
ايمان خبصت الدنيا صريخ....
هشام مايحب يدخل بسوالف النسوان بس مايرضه حرمة اخوه تنضرب.. عزام حطهم امانة بركبته...
دخل للمطبخ ولزم امه وسحبها من ايمان ودار وجهه لان ايمان بلا حجاب...
هشام وهو لازم امه:يمه شصاير ليش تمدين ايدج على حرمة المرحوم
ام هشام بعصبية:اتركني يمه اكسر راسها الما مرباية..لو تدري شبيها جان مشيتها بيت عمها واخذت جهالها
