مانجة وازواجها السبعة

الجزء الاول

_بقولك يامه هتجوزه يعني هتجوزه ريحي نفسك انت وابويا ممكن..!
_يا بت هتتجوزي واحد اكبر من ابوك؟! الناس في البلد تقول علينا ايه بعناك علشان الفلوس؟
_ ميهمنيش. حد في الدنيا دي كلها انا بعمل ال انا عاوزاه .
_انت قوية وعينك يتدب فيها رصاصة. احنا رمينا طوبتك وبكرة تقولي. الله يرحمك يابا انت وامي.
_يوووه كل يوم تديني الموشح ده يامه ارحميني بقا الحاج عبدالعزيز جايى بكرة هيقعد مع ابويا، عاوزة كل حاجة تمشي زي ما انا عايزة.
تمشي امها وتدخل تاخد اكل للطير ال عندها في البيت وهى بتقول
_بكرة نقعد جنب الحيطة ونسمع الزيطة.
تقعد مانجة جنب طرمبة المياة ال عندهم في مدخل البيت الريفي البسيط، بيت مبني بالطوب والطين في مساحة صغيرة، والدها رجل كبير في السن وفقيرجدا بيعمل أجير في ارض الناس علشان يكفي بنته الوحيدة ال انجبها بعد 20سنة جواز ،علشان كدة مدلعها من صغرها ومش بيرفض ليها طلب وبقت تعمل ال هى عاوزاه. من غير ما ترجع لحد، بالاضافة لقوة شخصيتها، وجمالها الشديد والفاتن، ودي كانت حلم كل كبير وصغير في القرية ال ساكنة فيها، لكن مانجة كانت طموحة جدا ، عاوزة تبعد عن الفقر وسنينه،علشان كدة وافقت على الجواز من الحاج عبدالعزيز اكبر تاجر مواشي في البلد.
رجع ابو مانجة من الشغل في اخر النهار كالعادة مرهق بيسحب رجله سحب وشايل فاسه على كتفه وفي الفاس تدلى منديل كبير. فيه طبق فاضي كان فيه حتة جبن ورغيف عيش بيتقوى بيه على الشغل.
اول ما يدخل يترمى على كنبة صغيرة ويحط الفاس بتاعه جنبه ويمسح عرقه.
_انتى يا ولية اعمليلي لقمة اكلها حيلي اتهد والله النهاردة.
تبص ليه مراته وتقوله_ ما بنتك قاعدة قدامك ما تقولها يا راجل هو انت شايفنى فاضية؟
مانجة تنفخ وتعترض على كلام امها
_بقولك ايه مش هعمل حاجة سبيني في حالي يامة.
يبص ابوها لامها ويقول_ قومي انت يا ولية البت شكلها تعبانة.
_ تعبانة ؟! تعبانة ايه يا راجل هى عاوزة تعمل معايا حاجة؟. دى طول النهار تقوم من هنا وتقعد هنا وتخرج وتدخل براحتها،خليك كدة مدلعها ومحدش هيبوظ حياتها غيرك.
_ يا ولية احنا لينا غيرها في الدنيا هى ال طلعنا بيها من الدنيا واحنا خلاص رجلنا والقبر خليها تتدلع علينا  واحنا عايشين وبحسنا.
_طيب ياخويا شوف مين جاي عاوز يتجوزها وهى موافقة، وعاوزة تاخده،
المحروسة بنتك.عاوزة تتجوز الحاج عبدالعزيز بتاع البهايم.
ابوها _عارف يا ام مانجة عارف وهى حرة،تختار ال على كيفها، وال يقدر يسعدها.
_حبيبي يابا ربنا يخليك ليا، ياما ده معاه فلوس كتير عاوزين نخرج من الفقر ده بقا.
ام مانجة_ يا راجل تتجوز واحد في سن ابوها ده في عمرك انت ناسي.
كل ده علشان الفلوس يا مانجة ترمي شبابك يا بنتى ؟!
تضحك مانجة_ ما هو احلى حاجة انه كبير في السن يعنى مش هيقعد طول العمر معايا اكون طلعت بقرشين منه.
المهم يابا هو جاي بكرة بعد العشاء...
وفعلا تاني يوم بالليل. يسمع ابو مانجة صوت بينادي من بره،.كان الحاج عبدالعزيز، راجل نحيل متوسط القامة، ملامح هادئة لابس جلبية فخمة، معاه واحد شايل قفة مليانه من لحوم وفاكهة وهدايا لمانجة، يدخل الراجل القفة ويمشي.
ابو مانجة يرحب بيه ويدخل عبدالعزيز .
ابو مانجة_ اهلا وسهلا يا حاج عبدالعزيز ده احنا زارنا النبي، مكنش في داعي تكلف نفسك كل ده.
عبدالعزيز وعينه بتلف في البيت بيدور على مانجة.
_ ولا تكليف ولا حاجة يا ابو مانجة،كل علشان عيون ست الكل مانجة.
لحظات وتدخل مانجة بالشاي،اول ما يشوفها يقف على رجله ويتوتر جدا وهى لابسة ومتزوقة.
ابو مانجة _استريح يا حاج اتفضل.
ينتبه عبدالعزيز انه واقف مش قاعد، يقعد ويخرج منديله ويمسح عرقه ويمسك كباية الشاي ويحاول يشرب يلاقيها. سخنة اوى يحطها تانى وهو في قمة التوتر.
عبدالعزيز يبص لابو مانجة_ باختصار يابو مانجة انا جاي طالب ايد مانجة بنتك تكون مراتي على سنة الله ورسوله، قولت ايه.
ابو مانجة _ يا سلام. احنا هنلاقي حد احسن منك يا حاج. بس انا عندي استفتسار.
عبدالعزيز _ خير اتفضل قول ال نفسك فيه؟
ابو مانجة_ بالنسبة لعيالك ومراتك لموأخذة، بنتى بالنسبة ليهم يعنى وضعها ايه؟
عبدالعزيز_ كل واحد في داره. ومانجة انا هخليها تقعد في الدار البحرية في نص البلد ومحدش بقدر يبص بس ليها. متقلقش يا ابو مانجة. وبعدين انا جاهز للدهب ال تطلبوه والمهر ال تقولوا عليه.
وفعلا يتم الجواز في خلال اسبوع.
والبلد كلها بدأت تتكلم وتقول البنت مانجة لعبت براس الحاج عبدالعزيز.
عبدالعزيز عنده ولدين متجوزين وشغالين مع ابوهم في بيع المواشي والاراضي علوان وحمدان، كانوا بيحاولوا يمنعوا ابوهم عن الجوازة دي، علشان فرق السن ودلع مانجة واستعراض جمالها في البلد، لكن هو رفض وأصر على الجواز منها، علوان وحمدان كانوا بيحترموا ابوهم جدا وبيسمعوا كلامه،وميقدروش يزعلوه، لكن كلام البلد زاد اوي والناس ابتدت تسخر من ابوهم ويقولوا ابوكم البنت لعبت بعقله واكلت بعقله حلاوة. وفي يوم قعدوا مع ابوهم وطلبوا منه يطلقها وهما يدوها قرشين لكن طبعا رفض.
علشان كدة قرروا يكلموا مانجة في طلاقها ويعوضوها بفلوس.
كان ابوهم برة البيت وراحوا قعدوا. مع مانجة.
حمدان_ بصي يا مانجة. باختصار احنا جايين نحط حد للمسخرة ال حصلت دي وجوزاك من ابونا، إحنا يا ستى عاوزينك تبعدي عنه والفلوس ال انت عاوزاها هتاخديها مننا من غير ما حد يعرف.
مانجة تبص ليهم وترفع ليهم حاجبها
_فلوس ايه يا حمدان ال جاي تخليني ابعد عن جوزي حبيبى ولا كنوز الدنيا طبعا تعوضنى عنه.
علوان بعصبية_ حنيه ايه يا بت وجوزك ايه الناس كلها عارفة انك متجوزاه علشان فلوسه،واحنا ميهمناش الفلوس، بس اهم شيء شكل ابونا قدام الناس ،مش على اخر الزمن عيلة زيك تلعب بيه وتخليه مسخرة في البلد.
حمدان يمسك ايد اخوه ويقوله. سبنى انا اتفاهم معاها من غير زعيق.
مانجة تقوم تقف وتبص ليهم وتصرخ فيهم، بقولك ايه يا حبييي منك ليه ريحوا نفسكم، انا مش هسيب جوزي وال معاكم اعملوه، اتفضلوا بقا علشان عاوزة اجهز اكل لحبيبي. كلها ساعة ويرجع هههههههه.
علوان يبص لاخوه و بغضب _ مش قلتلك مفيش فايدة من الكلام معاها دى جاية وناوية تحط راسنا. في الطين، يلا بينا واحنا لينا كلام تاني.
تقعد مانجة وتحط رجل على رجل وتقول_ اعلى ما في خيلكم اركبوه انا بعمل ال انا عاوزاه يا حبيبي منك ليه.
يخرجوا وهما مولعين نار من جواهم من كلامها ورد فعلها.
علوان بعصبية _ انا لازم. اخلص عليها علشان نرتاح من وجع القلب ده.
حمدان_ انت مخك راح فين عاوز تودي نفسك في داهية؟!
سيبنى بس انا هشوف حل ليها ،دى ك مش عاوزة العافية سيبنى بس زى ما بقولك وانا هعرف اقلع ال جابوها من دارنا.
رجع الحاج عبدالعزيز و اول ما حست بيه مانجة قعدت تبكي بصوت عالي وتندب حظها، بسرعة راح ليها عبدالعزيز وهو مستغرب _ مالك يا مانجة في ايه يا بت حصل ايه؟!
مانجة_ سبني ف حالي يا عبدو ااااه يا مكسورة الجناح يا مانجة يلي مفيش راجل يحميكى ويسندك يا مانجة😭
عبدالعزيز يتسغرب اوي_ يا بت فيه ايه انطقي حصل ايه مالك؟!
مانجة وهى بتمسح دموع التماسيح
_عيالك يا عبدو عيالك يا خويا جم هنا وعرضوا عليا فلوس كتير علشان اسيبك ،ولما قلت ليهم ولا كنوز الدنيا كلها تعوض ضافر منك ، قالوا كلام. عيب اقوله يا حاج، وقالوا ده خلاص مفيش منه رجا.وكلام مييصحش ابدا يقولوه عليك 😭و مش بس كدة هددوني لو مبعدتش عنك وطلبت الطلاق هيموتونى وهيحجزوا. على كل فلوسك ويجوعونى. ويرمونى بعد العمر الطويل ليك 😭😭.
عبدالعزيز النار تغلي جواه ويغضب جدا _ هى حصلت يعملوا كده وانا على وش الدنيا، وكمان يقللوا من ابوهم طيب يا حمدان انت وعلوان والله لاطردكم. طردة الكلاب من بيوتي وارضي. انا رايح ليهم وليلتهم مش فايتة.
يخرج عبدالعزيز وهو زعلان اوي وغضبان ويروح على بيته التاني. ويطلب من عيل من عيال علوان ينادي. على ابوه وعمه علشان عاوزهم.
يا ترى هيحصل ايه
تابعونى