الساخر الهادف - Ibrahem Emam:
من كام يوم كنت شايل هم بعض الأمور من مسئوليات ومصاريف وشغل ومشاريع سفر وقصص كلها دنيا عامة، وطبعا الأخبار عمالة تلاحقني في كل مكان وشوف الدولار وامسكو الحصان والكلام اللي يخليك تكتئب ده
ف سبحان الله قاعد بفكر في كل ده فجأة جه ف بالي قول الله عز وجل: وَقَالَ ٱلَّذِینَ كَفَرُوا۟ لَوۡلَا نُزِّلَ عَلَیۡهِ ٱلۡقُرۡءَانُ جُمۡلَةࣰ وَ ٰحِدَةࣰۚ كَذَ ٰلِكَ لِنُثَبِّتَ بِهِۦ فُؤَادَكَۖ وَرَتَّلۡنَـٰهُ تَرۡتِیلࣰا.
يعني القرءان نزل متفرقا عشان كل فترة يثبت النبي ﷺ والمؤمنين أمام كل الفتن والصعوبات اللي كانت بتواجههم كل يوم في دنياهم، وافتكرت إني مقصّر فعلا في الوِرد الخاص بيا وأنه الحل إني أرجع أواظب عليه مهما انشغلت لأنه ده اللي هيثبتك ويقويك ويعينك على مواجهة كل صعاب حياتك
وحقيقي القرءان فارق جدا والله يجماعة، وده مش كلام للتشجيع ده كلام حقيقي وواقعي ومتجرب، متنساش وأنت بتذاكر وتشتغل وتفكر وتسعى أنك تاخد صاحب في الرحلة، وخلى صاحبك ده هو القرءان، صاحبك اللي كل ما تضيق بيك هيهون عليك وكل ما تحس بهموم هيخفف عنك
خلي ليك ورد من القرءان وواظب عليه يصديقي، وكل ما تضيق بيك افتح المصحف واقرأ بنية الفهم والتوفيق وتفريج الكرب وتوسيع الرزق، هتشوف العجب!
الله يثبت قلوبنا ويراضينا ويوفقنا ويرزقنا ويكفينا هم الدنيا ويصلح لنا ديننا يا رب، آمين.
#الساخر_الهادف
من الأشياء اللي تستغربلها جدا أنه واحنا طلبة محدش فينا كان بيحب الدكتور الصعب الرخـ.ـم اللي مبيخففش والتعامل معاه سيئ وبيهين الطلبة..... إلخ
لكن العجيب أنه الطلبة بتكبر وبدون وعي بيتحولو لنسخة من أساتذتهم دول ويمكن أسوأ!
وده تطبيق عملي يعلمك أنه مفيش حد معصوم وأن كلمة: "أنا عمري ما هبقى كده" هتفضل مجرد شعار ومش هيتم اختباره إلا لما تتحط ف الموقف ف يبان صدقك من عدمه.
طولها زي عرضها والله يجماعة، والناصح اللي لما يموت كل الناس تدعيله وتفتكر اسمه بالخير، وأغـ.ـبى الناس مَن مات فارتاح منه البشر والأنعام والجمادات!
اجعل لنفسك ذكرا حسنا بعد رحيلك سواء من منصبك او من الدنيا بأسرها، فإنك ستموت ستموت، فاترك أثرا يدعو لك الناس بسببه، ده الباقي صدقني
#الساخر_الهادف
