كتير مننا بيعاني من هذه الزنقة، وبالذات في الوقت اللي فيه امتحانات، والبنت تقولك إيه؟ بيت جوزي أولىٰ بيَّ!
وهو يقولك إيه؟ أنا عايز أعمل مستقبل!
هنا سأسكت قليلًا!
طيب نبطل تسويف، ونبطل نقول مش عارفين نلم المواد؛ يعني شوف أنت سألت مين ومين علىٰ نصيحة، شوف ضيعت وقت قد إيه! وهل عملت منهم حاجة!
الإجابة:
"قاعد بتمرقع!".
طيب نعمل إيه في الوقت دا؟ وهل هلحق ألم المواد اللي كنا بناخدها في ١٠ شهور ولا ٩ شهور؟
أيوه، هتلحق، دا من طبيعة الإنسان أصلًا؛ بيحب يضغط نفسه، ومن طبيعته إنه بيحب التحدي!
دماغك عملت إيرور يا صديقي، طيب نختصر في الكلام، وتعالىٰ أقولك تعمل إيه.
أقولك إيه هو التحدي!
أنت لما بتلعب لعبة مع نفسك، وفيها مستويات وحاجات غامضة، عقلك عايز يكتشف إيه اللي جوا، وآخر اللعبة دي إيه، فممكن عادي تسهر بالعشر ساعات علىٰ لعبة!
طيب ليه مش بتتحدى نفسك، وتقول ليها: "أنا هحط مهام النهاردة، ومش هنام إلا لما أخلصها، وهاجي علىٰ نفسي حبتين؛ علشان تبقي ناجحة ومبسوطة"!
أيوه، خاطب نفسَك، هي محتاجة إنك تخاطبها، وتشجعها، وهتلاقي الإنتاجية بتزيد!
بعد ما خاطبت نفسك، وقلت لها عن أهمية العلم، وإنك هتؤجر علىٰ تعبك، وإنه هيكون شفيعًا لك يوم القيامة، هتطلب العون من ربنا، قل له: "يا رب، أنا مش قادر؛ قويني، يا رب، أنا مش عاجبني حالي؛ أصلح لي شأني"، وتجدد نيتك، وتستعين باللّٰه.
- بعد ما طلبت العون من ربنا، وخاطبت نفسك، تعالىٰ أقولك تعمل إيه:
١- اقفل سوشيال، أيوه زي ما سمعت كدا، هيحصل انهيار للعالم لو قفلت يعني! العالم مش هيعيش من غيرك!
أصلًا محدش يعرف عنك حاجة، صدقني، واللّٰهِ، لو قفلت، وبعدت لمدة ١٠ أيام هتلحق، ٥ أيام بردو هتلحق، المهم إنك تقفل، أو تقلل استخدامه، وتخلي لك نص ساعة في اليوم، والأحسن بالليل.
٢- مستنقع البطيخ اللي بتنام فيه دا بالعشر ساعات، حاول تخليه خمس ساعات، أربع ساعات، تعالىٰ علىٰ نفسك شوية، وبعدين ابقىٰ نام براحتك بعد ما تخلص.
٣- يومك يبدأ من الفجر؛ لأن بجد هتلاقي بركة رهيبة، وإنجاز كبير وقت الفجر؛ في البكور بركة، ودا من قولِ النبي ﷺ.
٤- تبدأ تقسّم جلسات: ٥٠ دقيقة مذاكرة، ١٠ دقائق راحة، وتبعد عن التليفون، بلاش تليفون! العشر دقائق دول اتمشىٰ فيهم في البيت، غمض عيونك، وحط الهاند واسمع قرآن، راحة ما بعدها راحة!
"ما زاحم القرآن شيئًا إلا وكان فيه بركة."
٥- ورقة وقلم، وشوف الحاجة اللي أنت واقع فيها أوي، وابدأ بيها، اصبر واطلب البركة في الوقت، وإن ربنا يرزقك الفَهم.
"إنما النصرُ صبرُ ساعة".
كل ما تصبر ساعة علىٰ عمل شيء، عقلك هيتحفز، وهيحتاج يكمل اللي بعده، بعدها شوف اللي أنت متوسط فيه، وبعدين اللي أنت حلو فيه، حل عليه جزئية معاهم علشان ما تنسهوش.
٦- قسم وقتك علىٰ الصلوات: من الفجر مثلًا لحد الظهر، ومن الظهر لحد العصر، وهكذا، والأهم إنك تركز وأنت بتشتغل؛ أصل الساعة دي هتمر كدا كدا، يبقىٰ أشتغل بإتقان؛ علشان مرجعش ليها تاني.
٧- ما تحطش في دماغك: هو أنا هتساوىٰ باللي بدأ قبلي!
آجي أقولك:
"إنما العبرة بمن صدق ليس بمن سبق."
أنت اصدق بس، وخليك صادق مع ربنا، وهتلاقي نفسك بتنجز، لو أنت في كلية هات امتحانات السنين اللي فاتت، وبص عليها، ولو أنت طالب في ثانوية عامة حل كتير.
﴿... وَمَن یَتَّقِ ٱللَّهَ یَجۡعَل لَّهُۥ مَخۡرَجࣰا وَیَرۡزُقۡهُ مِنۡ حَیۡثُ لَا یَحۡتَسِبُۚ وَمَن یَتَوَكَّلۡ عَلَى ٱللَّهِ فَهُوَ حَسۡبُهُۥۤۚ إِنَّ ٱللَّهَ بَـٰلِغُ أَمۡرِهِۦۚ قَدۡ جَعَلَ ٱللَّهُ لِكُلِّ شَیۡءࣲ قَدۡرࣰا﴾.
[الطلاق: ٢، ٣].
- ضُحَىٰ أحمد.
