الجزء الأول والثاني من المعلم ومراته وزوجته

1

زيدان: مالك يا دهبيه زعلانه ومبوزه ليه

دهبيه : من جاد تاعب قلبى ومصمم برضو يخطب البت السكرتيره اللى عنده دى

زيدان: سبيه يعمل اللى عايزه ابنك كلامه من دماغه عكس اخواته مش بياخد رأى حد

دهبيه : ده حتى رفض يمسك معاك المحلات وفتح الشركه اللي هو كان عايزها وبعد كده فتح المصنع اللي هو عايزه وقلنا ماشي مستقبله وبيبنيه المهم انه بيعمل حاجه بيحبها اشترى  شقه بره ورافض يقعد معانا هنا في البيت زي اخواته ورغم كده انت هودته مع اني كنت معترضه بس قلنا بعد كده خليه براحته انما بقى الجواز من البنت السكرتيره دي لا يا انا  يا هي

زيدان: هتعملي ايه يعني ابنك بقى راجل مش عيل صغير هتقوليله ده صح وده غلط

دهبيه : راجل على نفسه لكن مهما كبر هيفضل ابني ما يكبرش عليا واخواته ما عملوش معايا ربع اللي هو عمله

زيدان : طيب ليه ما تدخلتيش بجوازه اخوه بيجاد

دهبيه : لان بيجاد اختار صح

زيدان: يا خوفى لتكونى واخده مقلب في بيجاد

دهبيه : لا ده بيجاد ده اللى مريح قلبى ومفرحنى دايما

زيدان فى سره. ربنا يستر

دهبيه : وبعدين اشرقت ما شاء الله عليها ادب وجمال واخلاق ونسب

زيدان: اشرقت مافيش غبار عليها وعلى تربيتها

دهبيه : نفسى جاد يتجوز واحده زى باسمه كده اخت اشرقت بنت جميله ومؤدبه وروحها هاديه ومتدينه دى اللى هتعدله

زيدان: ابنك استحاله يوافق ولو وافق هيبهدلها معاه وهنخسرهم ابعديه عنهم احسن خلينا محافظين على علاقتنا بالناس

دهبيه : عندك حق باسمه خسارة فيه مع انى متاكده لو شافها من غير نقاب هو اللى هيجرى وراها

زيدان: دهبيه افتكرى اننا مش عايزين نخسر الناس دى كفايه بيجاد

دهبيه : طيب بقولك ايه تعالى بدرى انهارده من الشغل عشان عزماهم كلهم انهارده ولادك واجوازتهم ويونس ومراته

زيدان: حاضر يا ستى طلباتك اوامر مع السلامه

بعد نزول زيدان اتصلت دهبيه بوجد بنتها

وجد : الو يا ماما عامله ايه

دهبيه : عامله ايه يا حبيبتي طمنيني عليكى

وجد: انا بخير الحمد لله

دهبيه : مالك يا وجد صوتك مش عجبنى هتخبى عليا

وجد بعياط : أبيل يا ماما بيخونى وهيتجوز عليا

دهبيه : وانتى عرفتى منين

وجد: زيد ابنى كان بيلعب بتليفون ابوه واللعبه قفلت ادانى التليفون عشان اشغلهاله تانى لقيت النتفكيشن رساله بتقولوا حجزت شهر العسل يا حبيبتي اجهز نفسي لقتنى غصب عني فتحت الشات وشوفت كل حاجه البيه مظبط معاها هيتجوزوا الشهر الجاى وهياخدها ويسافر شهر عسل شوفتى يا ماما