السلسلة الأولي البيت الكبير عائله الحاج نعمان

19-20-21

الجزء التاسع عشر
...................
تاني يوم الحاج نعمان سافر القاهرة هو وبنتة نعمة وراحو لمحامي شاطر وحكي له قصة بنتة وجوزها اللي مسافر العراق والمحامي طمنة ان مكسب القضية مضمون جدا وطلب من نعمة تعملة توكيل علشان يبدأ في اجراءت رفع القضية
الحاج نعمان قعد في القاهرة يومين لغاية ما عملوا التوكيل والمحامي رفع القضية
وبعدين رجعوا البلد
قصة بقلم /  عادل المتميز
في غياب الحاج نعمان واثناء سفره القاهرة هو وبنتة نعمة فتحية مراتة راحت قابلت
الحاج كرم والحاجة امينة كانت مراقبها من بعيد وشافتها وهي بتدخل بيت الحاج كرم
امينة لما شافتها بتدخل بيت الحاج كرم اتجننت وجه في دماغها علي طول ان فتحية مره وسخة وبتخون جوزها
اللي هو جوزها هي بردو .. بس الحاجة امينة متقدرش تفتح بوقها ولا تقدر تقول للحاج نعمان حاجة .. لان فيه سر قديم هي دفناه ولو اتكلمت ممكن تكون بتنبش في القديم وبدل ما تفضح فتحية ... هتسبب لنفسها المتاعب وهي في غنا عنها
الحاجة امينة بعد ما فتحية دخلت بيت الحاج كرم خدت بعضها ورجعت علي بيتها
وهي مش عارفة تعمل ايه ولا المفروض تتصرف ازاي

......
سامية :: اتأخرتي ليه يا فتحية ده الحاج كرم مستنيكي من بدري
فتحية :: مش علي ما عرفت اخرج من البيت

الحاج كرم :: اهلا اهلا ياست فتحية .. ايه هو احنا لازم نبعتلك وسطة علشان نشوفك ولا ايه
فتحية :: معلش ياحاج ظروفي وانت عارف
خير يا حاج كرم البت سامية بتقولي ان الشغل اللي بينا مبقاش قد كدة وانك عايز تفض الشراكة
الحاج كرم :: سبينا يا سامية لوحدنا عايز اتكلم انا وفتحية كلام في الشغل
سامية :: يوه هو انا غريبة ولا ايه ياحاج
الحاج :: انجري يابت وسبينا انا وفتحية لوحدنا ..الشغل اسرار
سامية :: اسرار عليا .. بقي كدة هي دي اخرتها .. ماشي ياحاج ماشية
سامية خرجت. والحاج قام من عالكرسي اللي قاعد عليه وراح قاعد جنب فتحية
الحاج كرم :: بس ايه الحلاوة دي يا فتحية
فتحية بضحكة مايعة ش**** يخليك ياحاج والنبي انت لسانك بينقط عسل
الحاج كرم :: بس تعرفي انا بحسد الحاج نعمان عليكي . عارفة لو كنتي مراتي انا دانا اخلي الدنيا بحالها تحت رجليكي
فتحية :: تسلم ياحاج .. انت مقولتليش .. صحيح انت عايز تفض الشراكة اللي بينا
الحاج كرم :: مش بالظبط كدة انا قولت بس لسامية الكلام ده علشان تجيلي واشوفك واملي عيني منك.. وبعدين انا عايز بعد كدة التعامل يكون بيني وبينك مش لازم توسطي سامية بينا
فتحية :: خلاص يا حاج انت تؤمر وانا بعد كدة هبقي اجيلك بنفسي
الحاج :: ايوة كدة تعجبيني ... وراح حط ايده علي ايد فتحية. اللي بصتلة وهي مبتسمة ابتسامة خجل
فتحية :: طيب يا حاج امشي انا علشان محدش عارف اني خرجت من البيت
الحاج :: ماشي بس عايزين نشوفك علي طول ... اصلي خلاص اتعودت عالجمال ده
فتحية :: هههههه ياسلام عليك وعلي كلامك اللي زي العسل ده ياحاج كرم

فتحية خرجت وكانت سامية بتتسنط عليهم من ورا العمود واول ما فتحية قامت علشان تمشي سامية خرجت بسرعة ووقفت بره مستنياها
سامية :: ايه الحاج كان عايز منك ايه ؟
فتحية :: مفيش كنا بنتكلم في الشغل
سامية :: بتتكلموا في الشغل .. اوعي تكوني ناسية يابت اني شريكة معاكي وان الشغل ده مش بتاعك لوحدك
فتحية :: لا طبعا مش ناسية بس الحاج كرم ميعرفش كدة.. ولا ايه
سامية :: ماشي يافتحية .. لما نشوف اخرتها