ردينة

1

بعد سبع شهور من العزا..

واخيرا تمددت على فراشي
ماكدرت اتمطى لان جسمي كله يوجعني

ماكدرت افتح عيوني لانهن يحركني
ظليت حاطة راسي على الفراش مابية طاقة ارفعه واخليه على المخدة

حسيت الفراش يسحبني للداخل

ظليت مشوار بين النايمة والكاعدة مادري شكد المدة بس المهم جنت مرتاحة

عقلي ماخذني باحلام حلوة
بس بعدني اسمع صوت المروحة صوت الهوة باذني

شفته للمرة الرابعة بهذا الشهر

جاي من بعيد بايده قماشة بيضة شادها على جف ايده
كل الي اكدر اشوفه منه هو جتافه

فتحت عيوني من حسيت بشي نزل على جسمي
بيبي تغطيني

فاطمة : لا تستبردين
ردينة :شكرا بيبي
فاطمة :شتحسين هسة
ردينة :الحمد لله شوية احسن
فاطمة :ناميلج شوية حتى من تكعدين تاكلين خوش شوربة سويتلج

اخذت ايد بيبي بايدي بستها

ردينة :ربي ليحرمني من شوفتج ينور عيوني تعبتج وياية
فاطمة :يابعد روحي يا يمة ولا يحرمني منج ... شوفتج وانتي بالمستشفة دمرتني
ردينة :خلص بعد مااتمرض لخاطر عيونج

ظلت تمسح على راسي بايدها الناعمة

بعدها بمدة

فتحت عيوني لكيت روحي على نفس نومة الصبح
حتى ايدي خدرانة وماحس بيها

عدلت روحي ونهضت من مكاني

طلعت من الغرفة اسمع أصوات جاية من الصالة هالاصوات مو غريبة علية

فتحت باب الصالة

فاطمة :عمرها طويل تعاي يمة
ردينة :السلام عليكم شلونج خالة
ام قيس :هلة بهالطلة شلونج يحبيبة بت الحبيبة

كامتلي بوستني

ام قيس :تعاي كعدي بصفي
فاطمة :شوفي شلون عيونها ذبلانة
ام قيس :يا يمة بنيتي عدج العافية
ردينة :الله يعافيج
ام قيس :شوف الكانونة .. شوكت تشيليها
ردينة :الدكتورة كالت نهاية هذا السبوع شيليها بس لازم تتبدل
ام قيس :ربي ينعم عليج بالعافية
ردينة :تسلميلي خالتي حبيبتي
ام قيس :وكلياتج شكال عليهن؟
ردينة :كال اكو تلميح لبداية تيبس بس نكدر نعالجها بسرعة
ام قيس :انتبهي على روحج يمة واكلج يمة ليش ما تنزعين هالاسود
ردينة :لا خالة لا حبابة لا تكولين هيج
فاطمة :تتعبين وياها
ام قيس :صار اكثر من شهر يمة حتى الأربعين طلع الاسود يجر العافية والفرح وحتى هاي الضحكة يجرها والله الاسود ثكيل عالكلب شوفي حتى عافية ما بقتلج ذبي يمة الاسود مارح يرجع العزاز لو يرجعهم جان لبسنا عمرنا كله