رواية مهلكتي من جزء 19 : النهايه

( الحلقه الرابعه ) ( خمس طلبات ) ❤ ❤

( الحلقه الرابعه ) ( خمس طلبات  ) ❤ ❤
................
( في الحلقه السابقه )
احمد : اه يابن الكلب انت وهو ...
طب اخرسوا ....
احححم ! الو
سلمى : بكره تقابلنى الساعه 7 المغرب ف الكافيه إياه اللى بنقعد عليه
احمد : احححم .. حاضر . حاجه تانى ؟
سلمى : ( بتقفل ف وشه السكه )
احمد : ( بيبصلهم وبيبص ل حسن ) وكتاب الله اولعلكوا ف نفسي دلوقتى
........
ساره : ناويه على ايه ؟
سلمى : وحياة ابويا وامى .. لاخليه يكره صنف النسوان كله .. هخليه لا ينفع ليا .. ولا لغيرى
........................ ( الرابعه ) ❤
( الفجر ف اوضة غاده )
غاده : الو ! ايه يا شيرى وصلتى البيت ؟
شيرين : اه يا روحى ... هلكنا النهارده
غاده : هلكنا ايه بس .. ده طلع الواد ده معاه حوار مع سلمى
شيرين : هههههههههههه انتى لسا شاغله بالك باللى حصل
غاده : شاغله بالى ايه بس دى البت لبسته التورته ف وشه وسابته ومشيت ..
شيرين : اه يعنى الواد طلع شابك مع سلمى
غاده : باين كده ؟
شيرين : طب هاا .. ناويه على ايه ؟ هترجعى لهشام ؟
غاده : مش عارفه ! بس الواد بجد منعشش ف نافوخى .. هبقي اعرف بس ايه حكايته مع سلمى .. المهم بس انا عاوزه اوصل لرقم تليفونه باقصى سرعه
شيرين : مش عارفه ازاى ... ماهو لو يعرف سلمى يبقي اكيد عارف منه او فريده ... ممكن تكلمي اى واحده منهم تجيبى رقمه
غاده : لا .. مش هيبقي تمام كده . عاوزه اجيب رقمه من حد بعيد .. انا عرفت هوصله ازاى ؟
شيرين : ازاى . ؟
غاده : هو كان قاعد مع زياد .. هكلم زياد بكره واشوف هو كان داخل مع مين ولا مين اللى جابه يدخل الحفله ... ويارب يكون عنده حاجه
شيرين : هههههههههههههه طيب يلا حاولى تاخدى دوش وتنامى .. احلام سعيده يا مزه
غاده : لا سعيده ع الاخر ههههههههههه وانتى من اهله
..........................
( العاشره صباحا ف شقة احمد .. قاعد بيفطر مع امه )
احمد : بس يا ستى .. ادى اللى حصل امبارح ..
ام احمد : تستاهل .. عشان قولتلك ماتروحش الحفله دى من وراها
احمد : وايه يعنى ما اروح . هو انا رايح اتعرف على بنات .. ؟ انا غرضي والله اغير جو شويه ...
ام احمد : وحياة امك ؟ وطالما رايح تغير جو ماقولتلهاش ليه ؟ بدل مانت قاعد مبلول كده ؟
احمد : هو باين عليا اوى كده ؟
ام احمد : باين ايه ؟ دانت هارر على نفسك
احمد : طيب .. المهم يعنى اروح الميعاد اللى قالتلى عليه ده ولا لا
ام احمد : روح بس أمن نفسك
احمد : أأمن نفسي يعنى ايه ؟
ام احمد : مانت بتقول امبارح انها لبستك التورته ف وشك
احمد : اه والله .. كانت تورته شوكولاته .. مسحت وشي ف قميص الزفت اللى اسمه حسن
ام احمد : هههههههههههههههه اهو حسن ده على نياته .. واد عسوله كده
احمد : عسولة ايه ؟ ماهو اللى مودينا ف داهيه
ام احمد : أمن نفسك واقعد بعيد عنها شويه ف الترابيزه
احمد : والله يامه انا خايف لاتلبسنى الترابيزه نفسها ف وشى
ام احمد : لا ماتخافش ... طالما قالتلك قابلنى الساعه كذا وف المكان كذا يبقي هتسمعك كلمتين ف جنابك يلففوك حوالين نفسك .. وهتقول ساعتها ياريتها لبستنى الترابيزه ف وشي ..
احمد : ليه هى ممكن تقول ايه ؟
ام احمد : معرفش .. شوف انت بقا
احمد : انا ليه حاسس انك دايما واقفه ف صفها ضد ابنك
ام احمد : عشان بت جدعه والوحيده اللى مش هغير منها لما تقاسمنى قلب ابنى
احمد : ( بيرجع ضهره للكنبه وبيسرح وبيبص ف السقف )
والله يامه قلب ابنك متشعلق بيها
اهى دى الحاجه الصح ف الوقت الصح بس المكان مش صح
سلمى مايليقش بيها الا الدلال
وربنا وحده يعلم انا بنحت ف نفسي ازاى علشانها
مش عاوز اخدها من العيشه اللى هى عايشاها عشان اقولها تعالى قاسمينى قوتى ورزقي وعيشي بيهم
وعارف انها هتوافق لو قولتلها .. بس انا مارضالهاش غير كل حاجه حلوه
ام احمد : انت ليه محمل نفسك فوق طاقتك
سلمى انا مستخسراها تروح منك
احمد : ( بيتعدل وهو مخضوض ) وهو فيه حاجه ف الدنيا ممكن تخليها تروح منى ؟
دنا ماشي بلطم ف الدنيا يمين وشمال علشان ماتروحش منى
وكله بفضل دعواتك ...
عارفه !
انا عمرى ما كنت هبقي بالقوه دى لو مكنتيش انتى ف ضهرى ومكنتيش انتى ... انتى
ف كل مره بتظلم فيها والدنيا بتيجى عليا .. كنت ببقي شايل هم انك تقوليلى كفايه سلمى وعيش حياتك وافرح انت واخواتك .. طالما طريقها كل شوك .. لكن بلاقيكى انتى بتقوينى وبتقوليلى ماتسيبهاش
ام احمد : عارف ليه ؟
لانها تستاهل يابنى المعافره .
وتستاهل ان واحد زيك يقف ف ضهرها ويحميها
ف مره لما كان ابوها وامها هنا واتغدوا معانا وقعدوا معانا شويه
حسيت سلمى متطمنه وهى رايحه جايه ف الشقه . وبتعزم ف اصحابها وبتعزم على ابوها وامها
حسيتها تخصنى انا ماتخصهمش هما
غير نظرتها ليك ...
كنت بغير منها ف الاول بس لقيت نظرتها كلها حب ودفا وبتدور على الامان جنبك ....
عشان كده انا اللى بقولك .. اوعى تسيبها ..
البت حلوه .. وربنا رازقها فلوس هتبقي سبب همها وسبب ان كلاب السكك ينهشوا فيها من بعد ابوها ربنا يديلو طولة العمر ... عشان كده انا اللى بوصيك على سلمى مش اهلها .. خلى بالك منها ودايما خليك وراها ومعاها
احمد : مش لما اطلع من الورطه اللى انا فيها دى . انا خايف تموتنى
ام احمد : ههههههههههههههه على فكره ... نهايتك على ايديها ..
احمد : هيهيهيهيه ؟ بتضحكى ؟ ماشي ..
........................
( اوضة سلمى الرابعه عصرا بتلاقي سلمى قاعده على السرير وماسكه قلم وكراسه بتكتب فيها )
ساره : ورينى بتكتبى ايه ؟
سلمى : ( بتخبى الكراسه منها ) لا مش لازم تعرفى
ساره : اخص عليك .. هتخبى عليا ؟
سلمى : اه . معلش المرادى ..
ساره : هههههههههه طب ايه .. دى الخطه اللى هتنتقمى فيها من احمد ؟
سلمى : وانتى ايش عرفك
ساره : ههههههههه ههههههههههه عرفنى ايه بس دانتى مسهمه وسرحانه طول اليوم وكل شويه تفتكرى حاجه تروحى جرى تكتبيها ... ايه يا قلبى ناوياله على ايه ؟
سلمى : زى ما قولتلك امبارح .. هكرهه ف صنف النسوان كلهم ..
هخليه ماشي ف الشارع باصص ف الارض وخايف يبص على اى بنت
هعلمه الادب وهربيه من اول وجديد
ساره : طيب عاوزه اسالك على حاجه
سلمى : حاجه ايه ؟
ساره : انتى كنتى تقصدى الكلام اللى قولتيه امبارح ده انك هتبعدى عنه ومش هتكلميه تانى
سلمى : ( بتبصلها وبتستحى وبتبص ف كراستها ) سيبينى بقا اكمل اللى بعمله واطلعى من دماغى .... ( بتشرب شفطه من كوباية النسكافيه وبتكلم نفسها ) ايوه وبعدين بقا اقوله .كده .. وهو مش قدامه غير انه ..
ساره : هههههههههههه اه يانى
...............
( ع القهوه الخامسه بعد العصر )
كريم : اغيرك الحجر يا مولانا
احمد : غير ياعم وماله
كريم : إلا الباشا سرحان ف ايه النهارده
احمد : والله مزنوق زنقة الكلاب يالا يا كريم . ادعيلى
كريم : ههههههههه فضفضلى يمكن افيدك
احمد : اتقفشت قفشه سوده امبارح ف الحفله اللى روحناها
كريم : هههههههههه من صاحبتك
احمد : اه .. وعاوزه تقابلنى النهارده .. شكلها هتموتنى
كريم : ههههههههههه لا ماتخافش انت قدها وقدود ..
احمد : اعملى فنجان قهوه ابن لذينه بقا وهاتلى شيشه تانيه عشان دى مش سالكه اوى .. ( بيبص ف تليفونه بيلاقيه بيرن )
الو !
غاده : اححم .. الو .. احمد معايا ؟
احمد : اه احمد .. مين معايا ؟
غاده : ايه ياعم . نسيت صوتى بسرعه دنا المفروض خطيبتك ؟
احمد : هو انتى . ؟
غاده : ايه هو انتى دى .. دى قلة ذوق خلى بالك
احمد : معلش انا اسف .. بس انتى جبتى رقمى ازاى ؟
غاده : من صاحبك اللى اسمه عمر .. اللى دخلكو الحفله امبارح .. زياد دلنى عليه وقال انك جاى معاه
احمد : اها .. طيب تمام
غاده : عندك مانع نتقابل النهارده . عاوزه اكلمك ف كام حاجه كده
احمد : ( بيسكت ثوانى .. وبتجيله فكره بنت جنيه ) نتقابل ؟
غاده : اه .. فيه مانع ولا حاجه ؟
احمد : لا .. ابدا ... نتقابل النهارده
غاده : فين وامتى ؟
احمد : امتى الساعه 8 .. فين ؟ ف الكافيه اللى ع البحر ف جليم ... اللى لسا فاتح جديد .. عارفاه طبعا ؟
غاده : اه ... خلاص تمانيه بالدقيقه هكون هناك ...
احمد : بس بقولك ايه الله يسترك .. ماتجيش قبل 8 ....
غاده : اتفقنا ... باي باي
احمد : باي
كريم : احلى فنجان قهوه ليك يا باشتنا
احمد : ( سرحان وساكت )
كريم : ايه يابا سرحت تانى ليه ؟
احمد : هه ! لا ابدا .. بس صاحبك بيراهن على عمره . وياصابت يا خابت
كريم : والله ياسيد الناس انا مابقلق ف حياتى اد ما بقلق من دماغك
احمد : هههههههههههههههه النهارده هجيلك مضروب على فكره وعينى وارمه اد كده
كريم : تانى ؟ انت مابتحرمش ؟
........................
سلمى : بت يا ساره ... انا فيه حاجه مش مريحانى من امبارح
ساره : ايه ؟
سلمى : ازاى البت غاده دى بسرعه شبطت ف احمد وهى لسا مفركشه بقالها يومين .... وبعدين ف كلامها قبل ماتشوفه . قالتلى انها بتدور عليه عشان تعمل بيه نمره قدام حد ..
ساره : طيب يبقي كده كلام احمد والعيال مظبوط ... انه راح صدفه والبت غاده شافته لقيته واد حليوه كده قالت هو ده اللى هغيظ بيه صاحبها ...
سلمى : لا لا .. مابتكلمش عن كده .. بتكلم عن نظرتها ليه وهى واقفه جنبه
ساره : مالها ؟
سلمى : دى نظره واحده بتحب واحد ..
ساره : وبعدين ؟
سلمى : ( بتطلع تليفونها وبتدور على رقم غاده )
ساره : هتعملى ايه قوليلى بدل ما تلخبطى الدنيا
سلمى : استنى استنى ... ( بيرن اهو )
غاده : الو !
سلمى : الو .. ازيك يا دودو
غاده : اهلا يا لومه ... كنت لسا هكلمك يا قلبي
سلمى : القلوب عند بعضها يا قلبي انا كنت بتصل بيك اعتذرلك عن اللى حصل امبارح ... اصل احمد ده يبقي زميلنا وكده .. واد بتاع بنات وكان معشم واحده زميلنا انه بيحبها وكده .. ولما لقيته ف الحفله جاى من غير ما يقولها اتضايقت عشان كده عملت اللى عملته
غاده : لا يا حبيبتى ولا يهمك .. بس ده مايمنعش انه وادد عسل بصراحه
سلمى : ( بتبعد التليفون عن بؤها وبتوشوش ل ساره ) وحياة امها لافرمها بنت الجزمه دى
غاده : ايه يا لوم معايا ؟
سلمى : معاك يا حبيبتى .. بس انتى اتعرفتى عليه بقا ازاى .؟
غاده : قصدك احمد يعنى ؟ بصراحه انا كنت داخله الحفله وزى مانتى عارفه انى فركشت مع هشام من كم يوم
وكنت ناويه اخد وقتى كده وافوق ل روحى
بس الواد ده لقيته مش على بعضه طول الحفله وعمال يبص ل صاحبتك هههههههههههه
لقيته ينفع انى ارتبط بيه ... منها اعمل بيه نمره قصاد هشام ومنها بجد الواد مايتعوضش ..
سلمى : اهااا . كان عمال يبصلك طول الحفله ؟
غاده : اوى اوى .. هههههههههههههه مكنش على بعضه .. ولما روحت اكلمه مافيش دقيقتين وخدت رقمه
سلمى : انتى كمان معاكى رقمه ؟
غاده : اه والله .. حتى لسا مكلماه قبل ما ترنى عليا
سلمى : ( بتقوم تقف من على السرير ) بججججد  ؟ وكلمتيه ف ايه بقا يا خلبوصه .. زمانك اتفقتى معاه انكو تتقابلوا النهارده
غاده : عرفتى منين ؟ ههههههههههههه اه والله هقابله النهارده
سلمى : وطبعا هتتتقابلوا ف مكان سر
غاده : سر ليه يابنتى دى اول ديت بينى وبينه .. يعنى . هعرفه اكتر وهتعرف عليه اكتى واعرفه بنفسي .. ولو لقيته ينفع وحصل انجذاب بينى وبينه ليه لا .
هقابله الساعه 8 ف الكافيه اللى ف جليم ع البحر
سلمى : بجججججججججد ؟ ربنا يوفقك يا حبيبتى .. ابقي فرحينى بقا ..
غاده : من عنيا .. بس بقولك ايه ؟ بلاش حوار صاحبته اللى ف الجامعه دى تعرف او كده ... قوليلها تفكها منه ..
سلمى : لا ماهى زمانها عرفت دلوقتى .. يلا .. ربنا يوفق الدنيا على بعضها
غاده : ماشي يا قمرايه ... هكلمك تانى
سلمى : ف رعاية الله يا حبيبتى  ( بتقفل السكه ) داهيه تاخدك وتاخد امك
............
ساره : ههههههههههههههههه اول مره اشوفك بالسرحان ده كله
سلمى : سرحان ايه بس .. دنا هطلع عين امه .. ( بتطلع تليفونها )
........
مالك : ماتيجى ننزل البحر قبل ما المغرب يأذن نبل نفسنا شويه
احمد : انزلوا انتو .. انا قاعد مبلول لوحدى
مالك : هههههههههههههههه يخربيت فقرك
احمد : ( بيبص على تليفونه بيلاقى سلمى ) وبعدين بقا يا جدعان ف قلبة البطن دى ... اخرسوا
الو !
سلمى : بقولك ايه انا مش هبقي فاضيه الساعه 7 .. عندنا ضيوف
احمد : ماشي براحتك  بكره يعنى ولا ايه ؟
سلمى : لا
احمد : اومال امتى
سلمى : الساعه 8
احمد : ( بيقف مخضوض ) لا 8 ايه مش هبقي فاضي انا
سلمى : اسم الله عليك ... والباشا مش فاضى ليه وراك ايه ... الساعه 8 تكون ف الكافيه ... ولو ماجيتش اقسملك بالله ماهتشوف وشي تانى . سلام ( بتقفل السكه )
احمد : ( بيبص ل حسن ) كله من امك ( بيطلع التليفون عشان يتصل على غاده بيلاقي تليفونها خارج التغطيه والنمره مش بتجمع ) لا بقولك ايه ... انا على اخرى
......................
احمد : هو احنا ليه بيحصل معانا كده ياض يا مصطفى
مصطفى : انا عارف ياسطا . مع اننا غلابه
مالك : ( بيكتم الضحكه ) ايوه ايوه غلابه ايوه
احمد : ياعم والله غلابه .. عندك انا اهو مئلا ... تخيل رايح لقدرى برجليا .. انا هجيلكو انا متخيط ومهبود
مالك : هههههههههه انت اتعودت على كده
احمد : انت جدع ياواد يا مالك .. عشان شمتان فيا وباين على وشك مش بتخبى
مالك : والله ما قادر اخبى ياسطا .. شمتان بجد . اكدب يعنى
احمد : لا جدع جدع منا بقولك اهو .. المهو وصيتكو القهوه ... خلو بالكو من الكوبايات ومن الشيشه بتاعتى .... اتوكلنا على الله .....
.....................
شيرين : الو ! ايه يا دودو
غاده : ايه يا شيرى اللى سمعته ده .. البت لارا مالها ؟
شيرين : مش عارفه .. نرجس بتقولى مره واحده اغمى عليها ونقلوها ع المستشفى .. ماتيجى نشوفها انا تحت البيت
غاده : ورايا ميعاد وخايفه اتأخر ..
شيرين : لا لا مش هنتأخر .. لارا جدعه ومابتتأخرش عنك .
غاده : طيب انا نازلالك . انتى تحت
شيرين : اه على اول الشارع بتاعك .. انزلى يلا ... هنروح بعربيتى
..............
( احمد بيدخل الكافيه ف تمام الساعه تمانيه بيبص على الترابيزات بيلاقى سلمى قاعده وفاتحه كراسه وبتقرا فيها )
احمد : احححم
سلمى : ( بتقفل الكراسه وبتبصله )
احمد : اقعد ؟
سلمى : اتفضل ( بتمسك كوباية العصير وبتشرب منها بالشاليموه بمنتهى النرجسيه وبمنتهى الثقه بالنفس )
احمد : يارب تكونى بخير
سلمى : يارب
احمد : ( بيبصلها وبيسكت )
الويتر : تشرب حاجه يا فندم ؟
احمد : والله على حسب بس هشرب ايه .. بس ممكن كمان شويه معلش
الويتر : تحت امرك ...
سلمى : مش عاوز تشرب ليه ؟
احمد : لسا شارب ع القهوه فنجان قهوه
سلمى : عادى . اشربلك عصير يروق دمك
احمد : مش دلوقتى .. ( بيلتفت يمين شمال وبيقول يارب غاده ماتجيش )
سلمى : مستنى حد ؟
احمد : وانا هكون مستنى مين . ؟ منا جايلك مخصوص
سلمى : اهااا . كويس
احمد : ( بيبصلها وبيسكت وخايف يفتح اى حوار )
سلمى : ندخل ف الموضوع اللى جبتك عشان نتكلم فيه النهارده
احمد : اتفضلى
سلمى : انا مش قادره اكمل معاك لغاية كده
احمد : يعنى ايه ؟
سلمى : يعنى مش قادره اكمل .. انا بصراحه مابقاش عندى طاقه ولا معافره انى اجرى وراك من هنا لهنا ...
وانت كمان عشان تاخد حريتك ف انك تجرى ورا دى وورا دى
احمد : بس انا مابج
سلمى : سيبنى اكمل كلامى
انت عاوز واحده تكون بارده وتتعامل عادى مع اى بنت تقرب منك .. خصوصا انك عينى عليك بارده كل اصحابك وحبايبك بنات .. وانا مش هقدر ..
خلينا بعيد عن بعض
احمد : ايوه بس انتى ماسمعتيش منى مبررى وليه انا روحت الحفله دى امبارح
سلمى : مايهمنيش اعرف ..
احمد : طيب .. والحل
سلمى : والله فيه حل قولتهولك . كل واحد يروح لحاله .. وشكرا اوى على ال 3 سنين اللى قضيتهم معاك .. مش هقول انهم كلهم كانو وحشين .. بس متشكره وخلاص
احمد : ومافيش حل تانى . ؟
سلمى : هيهمك يعنى ؟
احمد : اكيد ..
سلمى : هو فيه حل تانى .. بس ماعتقدش ان غطرستك وكاريزمتك هيخلوك توافق عليه يا فنان
احمد : والله قوليه
سلمى : خمس طلبات هطلبهم منك .. ولازم تنفذهم
احمد : خمس طلبات من ناحيه ايه يعنى ؟ عباره عن ايه ؟
سلمى : لا انا هقولك طلب طلب ... ولو ... ولو نفذت اول طلب يبقي مُجبر انك تكمل الاربعه التانيين ...
احمد : يإما ؟
سلمى : يإما ورحمة ابوك وانت عارف انى بحب باباك ومش هحلف بيه كدب ... مش هتشوفنى تانى .. حتى ف الجامعه
احمد : طيب قوليلى طلب طيب اشوف الطلبات دى عباره عن ايه .. مانتى ممكن تهب منك وتطلبى طلبات غريبه
سلمى : لا هى طلبات عاديه .. عاديه والله
احمد : طب الطلب الاول ايه ؟
سلمى : امممم ! من اللحظه دى لغاية 3 ايام جايين  .. ماتتكلمش كلمه عاميه .. كل كلامك لغه عربيه فصحى مع اصحابك مع مامتك مع اخواتك ف الجامعه ف القهوه ف الشارع ف كل حته .. ولو حلمت حلم تحلمه فصحى بردو
احمد : وده اسمه ايه ده ان شاء الله ..
سلمى : ده اللى عندى
احمد : ايوه ايه الطلب ده ؟ هو اى عبط .. اطلبى طلب حلو .. استغفر الله العظيم يارب
سلمى : ده اللى عندى ...... واستنى قبل ما ترغى كتير
هعد لغاية 3  .. بعدها لو ماتكلمتش لغه عربيه ؟ انا بجد همشي ( بتطلع مقص كبير من شنطتها ) يإما ؟ 
احمد : ( ساكت ورافعلها حاجبه باستغراب وتناحه ) يإما ايه ؟ انتى جايبه المقص ده ليه يعنى مش فاهم ؟ ( بيرجع بالكرسي بتاعه شويه ل ورا ) ايه يا سلمى المقص ده ؟ ناويه على ايه ؟ لا ردى على امى .. المقص ده بتاع ايه ؟ هتقصى ايه مش فاهم ؟ ودخلتى بيه هنا ازاى ؟ وحياة امك ردى عليا انا جه ف بالى دلوقتى حاجات ماتنفعش تيجى اصلا ... هتعملى فيا ايه بالمقص وحياة امك ؟
سلمى : واحد ( بتمسك تشرب العصير بمنتهى الاستفزاز )
الويتر : مسالخير يا فندم ... حضرتك قررت تشرب حاجه ولا لسا ؟
احمد : ( بيبص للويتر ومابيتكلمش )
الويتر : مممممم حضرتك تشرب حاجه ؟
سلمى : اتنين .... ( بتمسك المقص بايديها وبتلعب بيه وبتعمل انها هتقوم ناحية احمد )
احمد : اريد بعضاً من الشاى مع بعض حبات القرنفل العجيب
........
يتبع
والله يا جماعه انا خوفت من المقص  😂😂😂