البـــــــــارت السابع
غنى : كاعده بالفاتحه ... اي بيبي ماتت بعد ماصحيت بلغوني بوفاتها ما استغربت جان عندي احساس انو حتلحك مروان .... اباوع خالاتي ملخن نفسهن هنه ونسوان خوالي اله اني كاعده بزوايه وابجي على المره الي ربتني والي جانت تمسح على راسي وتكلي الله يساعدج حبيبتي ... بعد منو يمسح على راسي ويواسيني ماادري شفتي يا بيبي هاي اني صرت وحيده بعدج وبعد مروان
سحر : ولج يمه سوده عليه حتى وانتي على فراش الموت توصيني على غنى
سهاد : هي من وره منو ماتت غير من وره غنى واخوها ماتت قهر عليهم سوده عليه
سهاد : هي من وره منو ماتت غير من وره غنى واخوها ماتت قهر عليهم سوده عليه
غنى : اي والله صحيح بيبي ماتت من القهر والبجي على حالاتي والي صار
... منو هاي الي كاعده بالزاويه
... خطيه هاي حفيدة المرحومه اهلها ماتو من جانت صغيره وضلت بس هي واخوها تالي كبرت اخوها وخلته رجال وطلع بي قلب ومات قبل اشهر وهسه توفت الحجيه وبقت هاي البنيه وحيده
... خطيه شلون بيها ماعدها احد ومنو يتحملها بعد
... الله يصبر كلبها خطيه تكسر الخاطر مو سهله يكون الشخص وحيد لاام ولااب ولا اخ ولا اي احد الله يعلم شراح يصير بحالها هسه
غنى : اسمع كلامهم وابند من البجي لعد شكد مثيره للشفقه اني ولو كلامهن صحيح اني فعلا مبقه عندي احد المن اعيش واتعب بعد عليمن ربي ليش هيج مو ضربتين على الراس توجع
سحر : تقربت حضنتها بدموع كافي يمه كافي انتي ما عايزه لتهيجين جروحج يمه
غنى : بدموع هو اني شوكت طابت جروحي خاله مروان صارله تلث اشهر ولحكته بيبتي وشمدريج يجوز بعد تلث اشهر الحكهم اني واخلص ... اني تعبت خاله كلبي ديوجعني انتي تدرين اني كلبي مقسوم نصين نص لمروان ونص لبيبي وهسه ثنينهم راحو يعني كلبي انتهه خاله
سحر : سوده عليه يمه
غنى : تنشغ بقيت وحيده خاله محد الي بعد بيتي فرغ خاله لابي صوت مروان ولابي ريحة بييي شلون اعيش اني خاله اخاف ابقه وحدي
سحر : لا يمه انتي مو وحيده اني وياج وما اعوفج ابد انتي بنيتي اني ربيتج ويه امي وما افرط بيج
نرجس : بنتدت بجي على غنى ياربي هالبنيه ما مكتوبلها ترتاح الى متى تبقى هيج ملحكت تطلع من صدمة دخلت بصدمه ثانيه ارحم بحالها إلهي الي مثلها ميستاهلون الي ديصير ... اباوعلها شحالها صارت هاي غنى ام ضحكه الحلوه ام وجهه المنور هيج يصير بيها
غنى : مرت ايام الفاتحه بغمضه عين رحت زرت بيبيتي وبيومها وكفت اباوع على قبرين واحد بصف الثاني لمروان وزكيه .... الناس تبجي اله اني واكفه اباوع للكبورهم واني ساكته اعاتبهم بكلبي لان عافوني
