بعد ما سمعت صوته وهو يهددني عرفته هو اثير .. گلي بصوت مبحوح وعبالك حية ...
⁃ عبالچ انسى الي سويتي بية ؟! ..
حاولت افلت منه اريد اصيح .. اريد يوخر ايدة وجسمة القذر عني ماگدرت .. سحبني سحب و جنطتي وگعت والكتب اطشرت .. و ظل يسحلني واني احاول برجلي ما خليه ياخذني ... و بدأ نفسي ينگطع وهو مستمر يهدد ...
⁃ بنت القندرة .. اجيتي بوكتج .. محد بالبيت .. منو راح يخلصچ مني ...
قبل لا يخلص الكيلدور الخارجي ويطببني للبيت ... نفتحت الباب وسمعت اشخاص يركضون سحبوه بقوة و مطلوا بالگاع .. واني هم وگعت يمة ..
اباوع لفوگ شخصين .. واحد منهم الي چان قبل فترة وية اثير يفحصون سيارة سامح .. والثاني ما شايفته .. الاول سحب اقسام مسدس و الثاني بقى يضرب باثير دفرات ع بطنة .. ويگلة
⁃ شنو هاي لبنية لك ؟! ....
ماگدرت ارد مرتبكة وخايفة ومسدسات و ما ادري شديصير هو مصدوم وخايف اكثر مني اثير ...
⁃ گومي روحي الاهلج ولچ .. كوومي
⁃ تعلسنا فلوس السيارة مو ؟
⁃ لا والله بسس
⁃ عبالك نخليك سالم ..
گمت اني ازحف حتى اطلع من البيت .. و اخذت جنطتي واني ارجف بحيث طبيت للبيت ردت اوگع بس هم زين محد موجود ركضت الغرفتي ... و چان اسمع صوت اطلاق رصاصة ... وراها انطلقت الدراجة ... سمعت ركض وناس تصيح .. باوعت من الشباك .. شفت ام سامح علاگة مسواگها و الخضروات بالگاع مطشرة و الجهال يلمون بيها .. و تعيط .. وتطلم
