سبب هدايتي(مكتمله)

الحلقه الأولى

" سبب هدايتي "
الحلقه الأولى
كان قاعد وبيقرأ القرآن الكريم دخل عليه جده اللي على كرسي متحرك
الجد شعبان: هاه يا ولدي اخبارك اي
مصعب: كويس يا جدي الحمد لله
الجد شعبان: كنت عاوزك في حاجه اكده يا ولدي
مصعب: اي يا جدي اتفضل جول اللي حضرتك عاوزه
الجد شعبان: انا عارف يا ولدي انك مركز مع شغلك ومش فارج معاك حوار الجواز ده صح
مصعب: صح يا جدي بس لزمته اي الكلام ده
شعبان: بنت عمك
مصعب: ملها يا جدي
شعبان: كنت عاوزك تتجوزها هي بنت طايشه بس والله زي السكر واوعدك مش هتندم
مصعب: انا مش فاكر بنت عمي من اخر مره شوفتها فيها وكان عندي عشر سنين وهي كانت لسه خمس سنين اكيد مش فاكرها
شعبان: هي خريجه مش عارف اي الالسن باين بس صدجني يا ولدي البت كويسه
مصعب: هي فيها حاحه يا جدي
شعبان: لاء يا ولدي مش اكده بس احنا صعايده وانتو اولا ببعض زي ما انت عارف الورث واحنا مش عوزين كد غريب يدخل بينا واصل
اتنهد وقال: فاهم يا جدي
شعبان: زي ما انت عارف احنا مش في الصعيد ولا هما كمان هما اهنه في البلد
مصعب: في القاهره بس ليه يا جدي
شعبان: انا كلمت عمك انهارده وقالي انهم بقالهم شهر في القاهره بسبب شغل حور
اتنهد وقال: طيب يا جدي شوف انت عاوز اي
شعبان؛ طيب يا ولدي.. طلع من الاوضه ومصعب اتنهد بقوة وقام يتوضى وينزل المسجد فهو امام الجامع برغم صغر سنه لكنه اخد مكانه كبيره في قلوب اهل منطقته بأدبه واخلاقه وتدينه...
بعد وقت..
نزل بجلابيه بيضا وكان وسيم الملامح ماشي وعينه في الارض ومش بيبص لأي بنت موجوده..
عدت بنت من جمبه وكانت حاطه برفان كتم انفاسه لحد ما عدت واستغفر ربنا وقال في نفسه: ربنا يهديكي اخدتي سيئات كتير انهارده وفي كل مره نزلتي بيها بالبرفان ده مفيش حد هيعمل زيي عشان متاخديش ذنوب... استغفر الله العظيم..
في مكان تاني..
كانت ماشيه بنت جميله ولابسه عبايه من عبيات الترند بتاع الايام دي
بصتلها صحبتها بإنبهار وقالت: بس اي العبايه الجامده دي يا بت يا حور لاء الصراحه تحفه تحفه...
بصتلها بغرور وقالت: عارفه
اتكلمت واحده تانيه وقالت: بت اللعيبه بتجيبي العبايات دي منين دي لسه طالعه ترند من يومين
حور بغرور ودلع: بابي اللي جبهالي اول ما طلبتها منه هو مكنش موافق عشان هي ضيقه شويه بس اهه اديني لبساها
ضحكت صحبتها وقالت: كل ده عشان العشر الايام اللي قبل عيد الاضحى اللي بتصوميهم بس اول مره تلبسي محتشم كدا.. ضحكوا وحور قالت: احنا صيمين اعتبرينا في رمضان
ضحكت صحبتها وقالت بمرح: في رمضان.. في رمضان.. ضحكوا وكملوا مشيهم...
بعد وقت..
وصلت البيت واول ما دخلت قابلت ابوها قاعد على الكنبه ومستنيها
قربت عليه وباست خده وقالت: مساء العسل يا حبيبي
ابتسم وقال: مساء العسل يا حبيبتي... اخبار الشغل اي
حور: مش وحش كان يوم متعب بسبب الصيام وحضرتك عارف بقى بس الحمد لله يعني اليوم خلص وهاخد شاور واقعد شويه...
حسن: طيب يا بنتي..بص لمراته انها تكلمها
قامت حور على اوضتها وقامت وراها امها
حور: في حاجه يا ماما
الام واسمها منال قالت: اي اللي انتي لبساه ده يا حور
حور: ماله يا ماما حلوة اوي صح
منال بغضب: لاء ممش حلوة اي ده وده حجاب ده نص شعرك باين والمكياج اللي على وشك والعبايه الضيقه اللي انتي لبساها اللي ملهاش اي تلاتين لازمه أصلاً ولا دلعك ومياصتك مفيش كدا احترمي نفسك شويه وقدري ان احنا في منطقه شعبيه شويه
حور: طب ما تيجي نعزل
منال بغضب وحده: حوور
حور: الصراحه بقى دي شخصيتي انتو غصبتوني على الحجاب وانا مكنتش عاوزه البسه بس اعمل اي بقى
منال: ماانتي عارفه انه حرام انك متلبسيش الحجاب من ساعت ما كبرتي يا بنتي..
حور:طيب يا ماما اللي تشوفيه... اتنهدت وكتمت غضبها وبصت ليها وقالت بهدوء: عمك وابنه وجدك جايين انهارده
حور: ليه هيجو ليه
منال: هيجو يتكلموا مع ابوكي عشان يعني هيتقدمولك
حور بصدمه: اييه لاء طبعا انا مش موافقه وبحب حد تاني
بصتلها بصدمه وقالت: بتحبي اي يا بت ازاي لاء طبعا
حور: على فكره بقى دي حياتي وانا بحبه وهو بيحبني
منال: هي كلمة واحظه وعارفه لو حرجتي حد انهارده والله لقتلك يا حور وانتي عرفاني وعارفه اني ممكن اعملها... وطلعت..
قعدت على الارض وقعدت تعيط وقالت بعياط: انا مش موافقه والله لأطفشه واوريه مين هي حور حسن الحسن...
في مكان تاني..
عند مصعب..
كان قاعد وبيشرب قهوته دخل عليه اخوه محمد وقال: اي يا مصعب اي اللي سمعته ده
مصعب: في اي
محمد: انت هتتقدم انهارده لحور بنت عمك
مصعب: اه
محمد: انت لسه بتحبها يا مصعب
مصعب: لاء طبعا بس جدي مجدرش ارفضله طلب انت ناسي انه اللي ربانا بعد ابوك الله يرحمه وعمري ما رفض لينا اي حاجه احنا كنا عوزينها وجبنا نتعلم في القاهره ومستخصرش معانا
اتنهد وقال: طيب يا اخوي...
بليل...
وصلوا قدام البيت بص مصعب للمنطقه وكانت منطقه شبه راقيه ولكن بناتها متحضرين بص في الارض بمجرد انه لمح بنت بتبص عليه استغفر ربنا وطلعوا عند اهل حور..
اول ما شافهم حسن نزل على ركبته وباس ايد ابوه بحب
حسن: كيفك يا بوي اخبارك
شعبان: كويس يا ولدي.. بص ليهم حسن وقال: ازيك يا رجاله عاملين اي..
مصعب: كويسين يا عمي حضرتك عامل اي
حسن: كويس... اتفضلوا اتفضلوا... دخلوا وحسن بص لمنال انها تنادي حور.. لاحظه مصعب وابتسم ابتسامه جانبيه وفهم انها مجبوره على الجواز زيها زيه...
مشيت منال عند اوضه حور وقعدت تخبط
حور: مش هطلع ومش موافقه عليه
منال: يا حور يا بنتي حرام عليكي ليه تكسفينا وبعدين هو مش هيتجوزك دي قعدت تعارف عاديه
حور: ما انا ممكن اطلع الاقي المأذون بالمره
منال: مش هيحصل انتو هتقعدوا بس ولو في قبول يبقى تمام لو مفيش قبول يبقى كل شيء قسمه ونصيب بس على الله يوافق بيكي بس.. فتحت الباب وبصت ليها بصدمه وقالت: يعني اي مش فاهمه هو اللي رافضني ولا اي انا الف مين يتمناني هو يطول
منال: اقصد يا بنتي انه شيخ جامع
لطمت على وشها وقالت: كمان شيخ جامع ملقتوش غير ده وتجوزوه ليا انا يا ماما هيقعد يقولي لاء حرام مفيش مينفعش...
منال: معلش يا بنتي.. البسي الفستان والبسي حجابك صح ومتحرجناش
حور: حاضر يا ماما... مشيت منال وحور قالت: طب والله لأوريه واطفشه واوريه حور وانا هطلعله بطبيعتي..
قعدت منال جمب حسن وشعبان قال: اومال فين بنتك يا حسن مش شيفنها هتفضل مخبيها لحد امتى
حسن: تلاقيها بتجهز ما انت عارف البنات وكسوفهم بجى يا بوي
ابتسم وقال: طبعا يا ولدي عارف...
بعد وقت..
كانت لابسه بنطلون ضيق ومقطع من الركبه وبلوزه ضيقه وطرحه لحد نص شعرها وخلخال في رجلها ورشت برفان ريحته قويه وحطت مكياج كتير ابتسمت وقالت بخبث: وريني بقى انت هتوافق ولا لاء... راحت عند المطبخ واخدت صنيه العصير ودخلت عندهم وكانت الصدمه...

#سبب هدايتي
گ/سـلمى نشـآت (Millliiicia)