ما بعد الخيانه

واقعه

يا أهلا ومرحبا

"فلم يحل لعيني بعد عينيك منظر"

........

-بالعوده للماضي-

باحد كليات الطب، الساعه ٢:٠٠ مساءً

انتهى ضاري من احد المحاضرات المسائيه الي كان زعلان لانه باول ترم بالتخصص ومايكون له حق يسجل مع الدكاتره الي يبي وبالاوقات الي يبي

تافف ضاري الي ما تغدى لان يوم الخميس عنده محاضرات من الساعه ٨ الين ٤ متواصله وتوجه للكافيتيريا يبي ياخذ اي شي يسكت جوعه قبل يدخل الدكتور الي كان عصبي ومتشدد من ناحيه الغياب والحضور لدرجه لو تاخر احد عنده ٥ دقايق بيكتبه غياب وهالشي ما كان يبيه ضاري بحكم ان الماده كانت غياباتها اثنين والثالث حرمان وهو بيوفرهم لأوقات الحاجه

ضاري شاف واحد يبكي بالكافتيريا الي كانت فاضيه إلا من العاملين فيها بحكم ان هالوقت غالبا طالعين اغلب الطلاب استغرب وجوده هو قد شافه اكثر من مره ويعرف ان تخصصه صحي بس ما يدري وش بالضبط بس قرر يسحب عليه لان ببساطه ماهو بمهتم للخلق

اخذ ضاري شاهي وساندوتش وشاف جواله الي جاه اشعار مضمونه "يا عيال الدكتور اعتذر عن هالمحاضره تقدرون تمشون"

انبسط ضاري ع هالكلمه الي عنده بهالوقت بالذات تسوى كلمه "تم ايداع بحسابك مليون"

جلس ضاري ع احد الطاولات يتابع تسجيل المباراه الي كانت بين الأرجنتين وفرنسا وياكل بهدوء متجاهل الي يبكي من دخل الكافيتريا

بس هالشخص ما ساكت أبدا ولاحظ نظرات عامل التنظيف له الي كان الموضوع مو عاجبه ووده يطرد الي مغطي عيونه بذراعه وساند راسه ع الطاوله ويبكي وهالشي حرك فضول ضاري وده يعرف وش من مصيبه حلّت ع هالشخص عشان توصله لهالمرحله

قام ضاري بعد ما خلص اكله ووقف قدام راس هالشخص: وش يبكيك؟

تجاهله هالشخص وظل يبكي وضاري انزعج من تجاهله ورجع يسأل: انطردت من المحاضره؟ ولا سجلت حرمان؟

رجع هالشخص يبكي وما رد ع اي شي من كلام ضاري الي قرر يطول باله عليه ورجع يساله:لو كنت مطلق ما بكيت كذا

ضحك هالشخص بين دموعه ع هالتعليق السخيف الي ماكان يحتاجه أبدا ورد بين شهقاته وهو ما رفع راسه من الطاوله:ما اثقل دمك يا مخلوق

ضاري جلس ع الكرسي المقابل له:استاهل لاني تلقفت عليك ولا لو اني ساحب عليك تجعر هنيه الين يصفى الي براسك احسن لي