Nanowab bhi fikr mand thin.
Ho sakta hai abhi kuch dair tak us ka phone aa jaye, ya subah phone kar de." Alizah ne nano ko tasalli di thi.
"Haan, ho sakta hai."
"Ab aap so jayein nano!"
"Haan, main to so jaungi. Tum bhi ja kar so jao!"
Woh sar hila kar wahan se hat gayi. Woh be-dili ke sath apne kamre mein aayi thi us ki ankhon se neend mukammal tor par ghaib ho chuki thi. Woh ab jhanjhla rahi thi. Kya faida hua is tarah ahmaaqon ki tarah intezar karne ka. Nano theek kehti hain, baaz dafa ke main waqai had kar deti hoon hamaqat ki." Us ki ankhon mein halki si nami aa gayi thi.
..........
Umar ko na aane par ittila to deni chahiye thi. Usay sochna chahiye tha, yahan sab log us ka intezar kar rahe honge." Woh apne kamre se bahar nikal aayi thi. Be ikhtiyar us ke qadam Umar ke kamre ki taraf uth gaye the. Kamre ki light jala kar us ne chaaron taraf nazar dorai thi. Usay kamra yakdam bohot udaas lagne laga tha. Kuch dair pehle mukammal nazar aane wali har cheez yakdam na mukammal nazar aane lagi thi. Woh kuch aur dil giriftah ho gayi. Kamre mein rakhi taaza phoolon ki arrangements ko le kar woh bed par baith gayi aur us ne unhein dobara tarteeb dena shuru kar diya. Chand minton mein yeh masroofiyat bhi khatam ho gayi thi. Us ne unhein nayi jagon par rakha tha. Madham awaaz mein stereo on kar diya tha. Kal kamre ki safai karwate hue bhi woh yahi cassette sun rahi thi.
"Everything I do, I do it for you!"
Bryan Adams ki khoobsurat awaaz kamre mein lehraane lagi thi.
"Agar woh aa jata to is waqt yeh kamra itna udaas aur akela na hota."
Woh la-shaoori tor se ek baar phir us ke baare mein soch rahi thi. Rack mein pada hua ek novel utha kar woh bed par baith gayi thi, woh jaise kamre ki tanhai aur udaasi ko door karne ki koshish kar rahi thi. Jaise Umar ki kami ko poora karna chahti ho.
Novel parte hue us ne sochne ki koshish ki thi ke woh is waqt kahan ho ga aur kya kar raha ho ga.
"Woh jahan bhi ho ga, so raha ho ga."
Foran us ke zehan mein ubhar aaya.
"Aur yahan par log us ke intezar mein jaag rahe hain."
..............
Us ki khafgi mein kuch aur izafa ho gaya tha. Novel parte hue usay apni aankhein bojhal hoti hui mehsoos hui. Aankhon ko band kar ke us ne aankhon ko kuch aaraam pohanchane ki koshish ki thi. Dobara aankhein kholne ki usay koshish hi nahi karni pari thi. Woh so chuki thi.
Jis waqt dobara us ki aankh khuli thi to kamre mein sooraj ki roshni phail chuki thi. Aankhein khol kar woh kuch dair tak yeh samajhne ki koshish karti rahi ke woh hai kahan? Phir yakdam woh jaan gayi thi ke woh kahan hai. Usay hairani hui thi ke woh wahan kaise so gayi thi. Us ne yaad karne ki koshish ki thi ke woh sone se pehle kya kar rahi thi, usay yaad aaya woh novel parh rahi thi.
"Aur phir mujhe neend aa gayi ho gi."
Us ki nazar samne deewar par lage hue wall clock par pari thi, saadhe das bajne wale the aur woh haka bakar gayi thi.
"Main itni dair tak soti rahi."
Woh uth kar baith gayi.
"Nano ne yeh soch kar mujhe uthane ki koshish nahi ki ho gi ke main raat ko dair se soi thi, ab apni neend poori kar loon." Us ne socha tha, baayen haath se jamahi rokte hue us ne apni tangon se kambal hatana chaha, aur ek baar phir ruk gayi thi. Us ne yaad karne ki koshish ki ke kya raat ko us ne apne oopar kambal liya tha. Usay yaad tha ke jis waqt woh novel parh rahi thi us waqt us ne kambal nahi oodha tha.
YOU ARE READING
Amarbail
Roman d'amoura love story of Umar Jehangir and Aleezay Sikandar, set-up in the backdrop of Pakistani bureaucratic culture. It is a story of imbalanced relationships, broken families, lust for power, complexes, insecurities and amidst all problems of love, its in...
