دِرتها بيديك حلّها بسنيك

chapitre²

★و🗨️ و التعليق بين الفقرات
اذا حبيتو..

مفاجأة..

ربيعة: يا وليدي بلال جابك ربي

بلال: علاه غير الخير يما؟

ربيعة: خوك إياد ملي بعثتو على الستة يشريلي لحليب من السوبيرات ما ولاش و راي الثمنية و الزيادة

بلال: ما تقلقيش روحك كشما وين راو يلعب بابي فوت و لا بالو ضك نروح نشوف وين راه

ربيعة: ماشي من عوايدو يطول هكا و يجي غير نكسر البالي فوق راسو نوريلو يكون لحليب ولا رايب مع هاذ السخانة

بلال: ايه صح تخلاص علينا طعام بالرايب نهار الجمعة، نروح نشوفو ونجي

خرج بلال من الدار رايح يحوس على خوه إياد في الحومة بصح ريحتو ما كاش
بدى يسخسي الناس لتم، راح جيهة الطابلا تاع بابي فوت ما لقاهش امشى عند الشجر تاع التوت وين كانو صحابو قاعدين مجمعين يلعبو فري فاير مي هو ما لقاهش حتى جاز عليه واحد الشيبوخ شويا كبير في العمر

بلال: عمي صالح شفت إياد اليوم؟

عمي صالح: السلام عليكم وليدي قبل

بلال: و عليكم السلام اسمحلي راي تالفتلي

عمي صالح: واش كان خاصك وليدي؟

بلال: والو برك قتلك إذا شفت إياد اليوم؟

عمي صالح: إيه مقبيل شفتو

بلال: وين شفتو عمي صالح من الصبح وأنا نحوس عليه

عمي صالح: كان داير لاشان تاع لحليب عند السوبيرات

بلال: ما شفتوش وين راح أبعد؟

عمي صالح: جاز من الدخلة تاع الغابة

بلال: أخاه و يكون كشما صرالو يما تهبل..يعطيك الصحة عمي ضك نروح نشوفو لتم

عمي صالح: ما يكون غير الخير أوليدي أبعد طمني عليه كي تلقاه بصح الظلمة و هذيك الغابة ماشي تاع ناس ملاح كيفك و كان كشما يديرولك

بلال: خويا أولى عمي صالح نموت انا ولا نخليه في بلاصة كيما هذيك في نص الليالي

عمي صالح: بعيد الشر عليك يا وليدي و ربي يعاونك و يسرلك و إذا لقيت خوك أعطيلو هاذ الحلوة قولو من عمك صالح