منصور : للحين ماكلمنا ابوي ورماح تطيب نفسه بسرعه
سيف : نكلمه وعاد ابوي اذا اقتنع يكلم جدي
منصور : والسياره؟
سيف : عاد بشوف لي سياره زينه وجديده له
منصور : خل الفلوس بينا لا تضغط على نفسك
سيف : لا عادي وانا اخوك الحال متيسره وانت جمع مهرك " قالها بمزح"
منصور : مافكر ولا بتزوج اصلا
سيف بضحكه : يساتر بتعيش حياتك كلها بدون زواج
منصور : تراك رافض الفكره بالبدايه لا تسوي انك مقتنع
سيف : والله يخوي صح ماكنت مقتنع بالبدايه بس حبيتها والحمدلله حياتي صارت احسن بكثير من العزوبيه
منصور : يبي لي وقت عشان اقتنع اصبر
سيف : خذ راحتك بس مو حيل
ضحك منصور وقال : ابشر
حسين : شعندكم؟
سيف : مافيه نتكلم عن الزواج
حسين : اي بالله متى تعرس منصور بنفرحح
منصور : قريب ان شاء الله
غمز له حسين وقال : منو اعترف
منصور : مافكرت بالزواج عشان افكر من باخذ
-
عند البنات
جود : بنمشي بكره ماودي والله للحين ماشبعت من الديره
مزون : انتم تحبون الديره وحنا ودنا بالمدن
سديم : بالعكس الديار احسن المدن ماعادت مثل قبل
نجود : بس الحياه اسهل من هنا
غزلان : والحياه هنا تجنن بالبساطه
نجود : مدري بس لا جيت هنا استمتع بالشغل لانكم معاي ولا لو لحالي ماشتغلت
ريم وهي جايه ركض طاحت
مزون : ووجع شفيتس !!
ريم ضحكت ومسكت كوعها وقالت : تعورت ، وماحست ريم الا حذيان نجد على راسها
ريم : احح يراسي حيوانه
نجد : تستاهلين
حنين : هيه انتي وياها وش السالفه
نجد : الحين تصير مصيبه وتعرفين السالفه
حنان : نجدد وشصاير قولي !
نجد : كنا بنروح انا وياها نجيب حطب ....
ماحست الا بصوت عقاب ومعاه حسين وهو يقول بحده : يولددد
نجد اندست ورا سديم
وريم ركضت لوعد وغزلان
سديم بعد ماتغطوا البنات قالت : ادخلوا
دخل عقاب وقال بحده وعصبيه : البنات اللي كانوا هناك يطلعون لي هنا الان
سديم : وشصاير
عقاب : سديم لا تتدخلين!!
سديم : بس لازم اعرف وشصاير عشان نحلها
عقاب : بسرعه يجون هنا!!
ريم كانت جريئه شوي وقالت : ماني جايه
حسين : عاد انتي يبيلتس معامله ثانيه وش تدورين رايحه هناك!!
ريم : نبي حطب يعني شلون
عقاب : وقص لسان ووجع ان شاء الله اطلعي هنا لا اطلع روحتس والله
سديم : عقاب هد !!
عقاب ناظر لنجد وقال : ترا شايفتس معها اطلعوا هنا ولا والله اوصل الموضوع لجدي وتعرفونه انتم !
طلعت ريم ومعها نجد
عقاب : الكل هنا يشهد ان شفتس انتي وهي جايات هناك والله لو ميت احد لا تجين ، ناظر لنجد وقال : وانا وش قايل لتس قلت سلمانن ترسلونه ماتجون انتم!! ما شاء الله مسوين تتغطون وانتم كل اللي هناك شايفينكم والله بس اسمع انكم رايحين هناك ماتلومون انفسكم زين؟؟
سديم : خلاص يعقاب
نجد : ان شاء الله
حسين : وانتي الثانيه صرتي خرسى هنا مشوين صراختس واصل
ريم : زين
طلع عقاب ووراه حسين
حنان : اجلسي انتي وياها واشرحوا السالفه بالتفصيل
نجد : طلعنا انا وياها بنجيب حطب وبنص الطريق تذكرت انه قال قولوا لسلمان
جيت برجع وهي سحبتني معها وقالت يبنت مابيقدر يسوي شي وجلست تقنعني ورحنا ناخذها كان جنب بيت الشعر وطلع لنا واحد اتوقع بندر وصرخت ريم وجانا عقاب وبس
سديم : مره ثانيه لا تروحون مو ناقصين حنا
نجد : سمي
جاء رماح وقال : يولد
سديم : ادخل
رماح : الغداء جاهز؟
سديم : ايه اصب؟
رماح: اي صبيه جدي ينتظر
سديم : اجل نادهم يشيلون
وقاموا البنات يتعاونون بالصب اللي ترتب شكل السلطه واللي تصب بالمرق والرز ، جوا العيال وبدوا يشيلون ، سديم : عقاب تعال ابيك
مشى عقاب وراها لين الخيمه ، عقاب : هلا؟
سديم : ترا موقفك مشوين غلط منت واحد من اخوانه عشان كذا تسولف
عقاب : ولو دروا اخوانه على قولتس ! وش بيصير فيهم ! وانا ماني على غلط وعلى كلمتي يويلهم لو شفتهم بس
سديم : راسك يابس قايله
منصور وهو يربط الثوب على خصره قال : نقاش بدوني!!
ضحكت سديم وقالت : رح شيل
مشى عقاب وضحك منصور وشالوا الاكل وراحوا
ام امجد : حنينه تعالي هنا
حنين : سمي
راحت حنين عند ام امجد وبدوا ياكلون
-
الساعه 3 العصر بعد مافضت العزبه من الضيوف
الجد سهيل ناظر لفلاح وقال : ناد زهير ينظف وانتم معاه
فلاح : سم
رماح : بروح للمحل انا
منصور : اجل تعال معاي ، رماح قام وراح مع منصور
الجد سهيل :قوموا مشينا للبيت
ابو سيف : حمدان جهز السياره
حمدان قام وشغل السياره وركب الجد وعياله واتجهوا للبيت اما باقي العيال ضلوا ينطفون ومعاهم سديم وحنان
بعد مدهه رجعوا للبيت وكان الجد سهيل وعياله ووزوجاتهم جالسين بالحوش
جلسوا وقام حمدان يصي لهم قهوه
عقاب : عشتت
حمدان : تعيش
فلاح قرب لحسين وقال : قول لسيف يقول له
حسين لف لسيف وقال : قول له
سيف : اليوم بطلع انا والعيال
ابو سيف : وين
سيف : معزومين عند امجد بس قلنا بنطلع للبحر معاه هو وعيال الحاره
الجد سهيل : ومن يروح
سيف : انا واخواني وصقر وحمدان وفلاح وحميد وإياس
الجد سهيل : كيفكم انتم بس فلاح وعقاب ورماح مايروحون عشان المحل والعزبه اذا تاخروا يتأخرون عليهم
منصور : جدي نرجع بدري ان شاء الله
الجد سهيل : مايروحون
ابو سيف : خلاص رواحوا انتم
حسين : اسف لكم
فلاح : عبالك بنسكت ؟
عقاب : والله ماطوفها
دخل رماح وقال : السلام عليكم
الكل بصوت واحد: وعليكم السلام
ابو حميد : ليه راجع بدري غريبه
رماح : مافيه احد سكروا محلاتهم بدري عشانها جمعه
قعد رماح جنب عقاب وقال : شصار قال ؟
عقاب : ايه بس جدي قال فلاح وعقاب ورماح مايروحون
رماح : تكفى والله انها بخاطري
عقاب : معليك بنروح
ضحك رماح وفهمهم على طول
دخل سلمان وركض لحضن ابوه
سيف : هلا والله
رماح: تعال هنا من زين ابوك تروح له
سيف : احترمم نفسك
ركض سلمان لرماح وحضنه
رماح : جايب علم تكلم وشفيه
سلمان : عمي مشعل " ابو امجد " يقول قول لجدك العشاء عندي الليله
ابو سيف : كثر الله خيرهم
سلمان : مو انا اللي سويته
ضحكوا الكل وقال ابو سيف : كثر خيره هو وخيرك
رماح قاله قول امين
سلمان : امينن
عقاب قام وقال : استاذن بروح لامجد اعاونه
رماح : بجي معاك
فلاح : وانا بعد
ابو حميد : عفيه عاونوه لا تخلونه
فلاح : سم
مشوا العيال لعند امجد اللي كان متقروش شوي
عقاب : السلام عليكم
امجد : زين جيتوا شيلوا معي المويه
فلاح : كل ذول الكراتين ليه والله لو انهم الديره كلها
امجد : مدري والله شيلوا تعبت ،بدوا يشيلون معه
عقاب ناظر لرماح اللي شايل ثلاث كراتين وقال : ووجع شفيك انتت شوي شوي
امجد : رماحح بعد شوي تعورك ادينك وتقول تعبان نزلهم وشيل واحد
رماح : وخر انت وياهه بس
فلاح شال منه واحد وقال : اذلف يلا
رماح : بطوفها لكك
فلاح :شف من يتكلم وخرر بس
رماح : وخر لا اطلع حرة بندر فيك
ضحكوا وقال امجد : قاهركم ليه وش مسوي
عقاب : ابد مو مسوي شي بس قاهرني من نظراته وطريقة كلامه
امجد : صاير شي بس ماتبي تقول
عقاب : بالضبط
امجد : براحتكك بقوم اجيب اغراض من المحل وواحد يخاويني والباقي سوو قهوه
ضحك فلاح وقال : بخاويك انا
رماح : مايروح الا انا حلفت
فلاح : عادي بضل مع عقاب طلعه فيها انت مابيها
رماح : اصلا ماتقدر تطلع بدوني
فلاح : من قال؟؟
عقاب : خلاص انتم بزران تتناقرون خلصوا
مشوا امجد ورماح وفلاح وعقاب دخلوا يجهزون القهوه
فلاح : عقاب
عقاب وهو يسوي القهوه وجالس عند المشب قال : سم
فلاح : جربت تحب ؟
عقاب : وش السخافه شفيك ؟
فلاح : مب سخافه بس جربت شعور الحب
عقاب : لا ولا احبه اصلا مابي اجربه
فلاح : جربته انا بس مابعلمك من احب
عقاب : وخرر عنه انصحك وانت كيفك
فلاح : شفيك انت بفضفض لك منت راعي فضفضه رماحوه احسن منك
عقاب : وخر لا اهفك بالدله تفضفض لي وانا وانت عايشين نفس العيشه ؟
فلاح : بس فيه شي انا عايشه وانت لا عشان كذا بفضفض
عقاب وهو ينقل القهوه للدله قال : يلا اسلم
فلاح : صدق عقيب اتكلم صدق
عقاب : احد قالك امزح لا اهفك بذا اخلص تكلم وشفيك
فلاح : اقولك انا احب
عقاب : من تحب ؟
فلاح : مو شغلك انا قلت بفضفض لك
عقاب : دامه مو شغلي اذلف ماتفضفض
فلاح : بعدين اقولك شفيك مستعجل المهم انا شفتها بالغلط مو قصدي
عقاب : فليح خلصني قول الاسم
فلاح : ريم بنت عمي سطام بس احسها مو حولي
عقاب : حتى عنقودنا اكبر منها وانت وينن عمرك 35 وبعدين ريم ماتصلح مطفوقه
فلاح رمى عليه الفاين وقال : ترااا يوم افضفض لك ابيك تواسيني وانت ماخليت شي ماقلته
عقاب وهو ماسك الضحكه قال : ووجع ترا اقوم عليك
فلاح : ليه مطفوقه
عقاب : مو شغلك بس البنت مطفوقه وانت كيفك انا ماشوهه سمعتها بس اليوم يوم قمنا انا وحسين يوم سمعنا صرخه ترا هي
فلاح : ماعلينا من مطفوقه انا اسنعها بس العمر
عقاب : 22 و35 يجون مع بعض؟؟
فلاح : الحب مايعرف الاعمار
عقاب : اقول قمم بس قال ايش مايعرف الاعمار 12سنهه يالظالم
فلاح : اول شي احسب عدل ثاني شيي 13 سنهه مو 12
عقاب : اردى بعد بس ماعليك بيوافقون عليك
فلاح : مسوي تواسي انقلع
عقاب : ماعرفتت لك مره تبيني اواسي مره لا
فلاح : ياخي مادري احس ماعندك احساس ومشاعر
عقاب : عاد انت ما شاء الله عندك
فلاح : ايه عندي ماتشوفني احب
عقاب : الله يعينك عليها ويعينها عليك
فلاح : شقصدك
عقاب : ولا شي
فلاح : وانت متى تعرس ؟
عقاب : اول شي قبلي حسينوه ومنصور ماعرسوا ثاني شي توني صغير مابي
فلاح : لا نضحك على انفسنا ترانا كبار
عقاب : مابي اعرس انا تبي تعرس اعرس
فلاح : حميد قبلي اصبر
عقاب : والله ودنا بعرس كذا الاجواء حلوه
فلاح : جوا اسكت
ابو امجد : ارحبوا ياهلا
عقاب وفلاح بصوت واحد : هلا عمي
ابو امجد : ماقصرتوا
فلاح : ولو امجد اخونا
ابو امجد : الله يخليكم لبعض ولنا
فلاح : اللهم امين فيه شي باقي تبيه يعم؟
ابو امجد : التمر وينه؟
فلاح : بالمقداعه موجود
ابو امجد : واهلكم مطولين؟ ،عقاب : لا بالطريق جايين
-
عند البنات
حنين : ماروح لحالي امشوا معاي
ريم : خلاص اذا نجد تروح اروح
دخلت ام سيف : هاه للحين ماتجهزتوا؟
سديم : يمه مانروح كلنا صح؟
ام سيف : الا يمه نعاونها
قاموا البنات يتجهزون وسحبت ام صقر بناتها
ريم : شفيتس يمه؟
ام صقر : مانروح حنا!
غزلان: ليه!!
ام صقر: بنجهز اغراضنا
وعد : اي اغراض؟؟
ام صقر : روحوا لغرفتي ولا تناقشون
ام سيف : شيماء فيه شي؟
ام صقر : لا بس تعبانه ولا بجي
ام سيف : على راحتك
طلعت ام صقر لغرفتها ورا بناتها
ام حميد : شفيها؟
ام سيف : ماتبي تروح
ام حميد : الله يعين وين البنات
ام سيف : يتجهزون تو راحوا وانا جاهزه شرايتس نمشي قبل البنات نعاون ام امجد على مايجون ، ام حميد : اجل مشينا
العمه شواقه : بجي معاكم ثواني
ام سيف : ننتظرتس
جت العمه شواقه ومشت العمه مع ام حميد وام سيف لام امجد
سديم : مشت امي وعمتي علياء وشواقه خلصوا عشان نمشي
حنين : عمتي شيماء خذت بناتها ماتروح معنا ؟
سديم : لا ماتروح اسمعها تقول لامي تعبانه
نجود : تبي تعزلهم حسبي الله
جود : ووجع لا تدعين عيب
نجود : وانا الصادقه اكرهاا يع
سديم : مو وقته امشوا
-
عند ام صقر وبناتها
وعد : اي اغراض اقولتس!
ام صقر : بنجهز لاننا بنروح للمدينه الحياه نختارها حنا مب انتم!
غزلان : بس حنا نبي هنا مانبي نروح
ريم : على كيفكم حنا تمشونا وتردونا وبعدين ابوي مو مكلم جدي
ام صقر عصبت وقالت بحده : جهزي اغراضتس انتي وياها ولا اسمع نفس !
ريم : وبعد مانجهز وش بيصير
ام صقر : بعد مايمشي صقر ابوتس بيكلم جدتس ونروح حياة الديار ماتنطاق
ريم بعصبيه وحده قالت : مو على كيفكم
ماحست الا بكف من امها وصرختها عليها وهي تقول : مابقى الا البزران يتحكمون انا ادرى بمصلحتكم !
غزلان مسكت ريم وقالت : يمه شفيتس
ام صقر : اذلفوا تجهزوا
مشت غزلان مع ريم ووعد
وقامت ام صقر تجهز اغراضهم
عند غزلان وخواتها ، وعد : وش نسوي الحين ؟
غزلان : جهزي اغراضتس
ريم : شفيكم؟؟ ليه ماتتكلمون وتعارضون ؟ بس انا لحالي اتكلم
غزلان : لان امي كرهتنا بالحياه ذي وكرهت بنات عمنا فينا
وعد : جدي مايرضى
غزلان : الله يستر بس لا يصير شي
ريم : يارب جدي يمنعهم
نزلت غزلان الشناط وبدت تحط اغراضها واغراض خواتها
ريم : ماراح امشي انا لو تروحون كلكم
غزلان : ريم خلاص !! يكفي وانتي تجادلين وتعارضين ابوي وامي كلمتهم هي بتمشي وذا من البر خلاص سوي اللي هم يبونه والله بيعوضك ماتدرين بكره يمكن تتزوجين احد من عيال عمي وتعيشين هنا يكفي قومي جهزي اغراضتس
سكتت ريم وبدت تجهز معهم اما وعد ماكانت معهم ابدا وهي تفكر وش بيصير بحسين لو درا
-
ببيت ابو امجد الساعه 10 بعد ماتعشوا وانتهت العزيمه ومشوا الضيوف
ابو سيف قام وقال : نستاذنك يابو امجد تاخر الوقت
ابو امجد : حياكم الله ياهلا عاد لا تقطعون
الجد سهيل : ان شاء الله تصبحون على خير
ابو امجد : وانتوا من اهله
ططلع الجد سهيل واحفاده وعياله وراه
اشر امجد لسيف وابتسم سيف وقال : جايين
امجد : يبه عن اذنك بروح
ابو امجد : انتبه لنفسك
امجد باس راسه وقال : يالله مع السلامه
سكر ابو امجد الباب بعد ماطلع امجد
ابو حميد : ينتظركم امجد
سيف : يالله رايحين
الجد سهيل ناظر لعقاب وفلاح ورماح وقال : انتم ادخلوا
منصور : ليه ياجد خلهم معنا يستانسون
الجد سهيل : عندهم شغل
منصور عرف ان جده رافض وقال : سم
طلعوا منصور وسيف وحسين وحمدان وحميد وصقر واياس مع امجد
ودخلوا فلاح ورماح وعقاب
"عند امجد "
كان يحط المويه بالسياره وشافهم جايين
امجد : يلا اركبوا بس يبي لنا سياره ثانيه
منصور : بسيارتي مشينا
امجد : وين عقيب وفليح ورماح انتظروهم
سيف : ماتوقع يجون
امجد : ليهه؟؟ ماتحلى الجلسه الا بوجودهم
رفع كتافه حسين بمعنى مدري
امجد فهم وسكت ومشوا للبحر على طول
-
عند عقاب ورماح وفلاح
الجد سهيل : ناموا لا تسهرون
عقاب : سم
::::::::::::::::::::::::::::
ادعموني بنجمه ولايك قراءة ممتعه 💗💗
أنت تقرأ
إذا الليالي الـسُّـود اغـلقـنَ الفّـلـكَ .
Romanceاهلا بكم جميعاً بروايتي الثانيه🤍🇸🇦.. ( إذا الليالي الـسُّـود اغـلقـنَ الفّـلـكَ ...) (الروايه باللهجه العاميه ) لا ابيح النقل بدون اذن الكاتبه الكاتبه : أشواق آل ريان حساب الانستا 7_izil حساب التيك : 7_izil قراءه ممتعه 💗💗✨
