[Uni]"ဂန်းစတားတစ်​ယောက်မှ ​ကျောင်းသားအဖြစ်သို့"🍃✨️

အပိုင်း(၈.၅)

Your Dream League ~

.

ဂျောင်အွန်းချယ်သည် ဟုန်းဂျယ်မင်းတို့အဖွဲ့ကို သိနေပါ၏။ သူတို့မှာ တခြားသူများအပေါ်ထိခိုက်စေတတ်သည့် ဆိုးသွမ်းသည့်​ ကျောင်းလူဆိုးများဖြစ်ကြပြီး ​ကျောင်း​ကောင်စီအထက်တန်းကျောင်းသားများကို ဆံပင်ကျွတ်​အောင်စိတ်ဖိအားခံစားရ​စေ​သော အကြောင်းရင်းများပင် ဖြစ်လေသည်။

အကြောင်းအရာများကို ဆက်စပ်​တွေးကြည့်လိုက်သည့်အခါ ​ဆုန်းအီဟွန်းက ကုန်းကျော်တံတားပေါ်မှခုန်ချသွားသည့်အ​ကြောင်းရင်းမှာ ထင်ရှားလာခဲ့ရာ ဂျောင်အွန်းချယ်သည် လုံးဝပင် ပူထူသွားခဲ့ပါ၏။ သူသိရှိထားသည်များအရဆိုလျှင် ဆုန်းအီဟွန်း၊ ထိုကလေးသည် ပြင်းထန်လှသည့်ကျောင်းတွင်းအကြမ်းဖက်မှုကို ခံစားခဲ့ရပြီးနောက် မျှော်လင့်ချက်ပျောက်ဆုံးကာ တံတားပေါ်မှခုန်ချခဲ့ရသည်အထိ ဖြစ်သွားခဲ့ပုံပေါ်ပါသည်။

သို့သော် အကြီးမားဆုံးပြဿနာမှာတော့ ထိုအကြမ်းဖက်မှုသည် ယခုထိတိုင် ဆက်ဖြစ်ပွားနေဆဲပင်ဖြစ်သည်။ အတန်း၃ အခန်း၁၏ အတန်းတက်စာအုပ်ထဲ၌ ဆုန်းအီဟွန်းနှင့်ဟုန်းဂျယ်မင်း နှစ်ဦးစလုံးရှိနေခဲ့​ပေ၏။ ဟုန်းဂျယ်မင်းမှ ဆုန်းအီဟွန်း၏ တံတားပေါ်မှ ကိုယ့်ကိုယ်ကိုယ်ခုန်ချကာ သတ်သေရန်ကြိုးစားမှုကို သိရှိပြီး သူ့ကိုယ်သူပြင်ဆင်ပြောင်းလဲမည်ဆိုလျှင်သာ အကြမ်းဖက်မှုမှာ ရပ်တန့်သွား​ပေလိမ့်မည်။ ဤသို့မ​ပြောင်းလဲပါက ဤအတိုင်းသာ ဆက်ဖြစ်ပွား​နေလိမ့်မည်။

ဟုန်းဂျယ်မင်းကို ပိုကောင်းသည့်လူဖြစ်လာစေရန်ပြောင်းကြည့်နိုင်မနိုင် ကျောင်းသားကြီးကြပ်‌​ရေးမှူးထံ သူမေးကြည့်သည့်အခါ ပြန်ဖြေလာသည့်အဖြေကတစ်ခုတည်းသာပင်။

"ပြုပြင်တာလား၊  အဲ့ကောင်တွေကြောင့်ပြောင်သွားရတဲ့ငါ့ဆံပင်တွေ ပြန်ပေါက်လာမှာကတောင်ပိုမြန်ပါဦးမယ်"

တခြားအကြံများလည်း သူထပ်မရလာခဲ့ပါ​ချေ။ သူသည် နစ်နာသူနှင့်ကျူးလွန်သူကို တစ်နေရာတည်းတွင်ထားနိုင်ကာ နစ်နာသူအားအကာကွယ်​ပေးနိုင်ပြီး အခြား​​သောကျောင်းသူ​ကျောင်းသား​များနှင့် အဆင်​ပြေ​ပြေရှိ​​နေစေလျက် ပြဿနာကို ကြားဝင်​ဖြေရှင်းနိုင်မည့် နည်းလမ်းကို စဥ်းစားဖို့လို​နေခဲ့ပါသည်။ ​ဂျောင်အွန်းချယ်သည် စားပွဲခုံကိုတတောက်တောက်ခေါက်ရင်း အသေအချာစဉ်းစားကြည့်ပြီးနောက် ပြဿနာ၏အစကိုပြန်ကာကြည့်ရှုနိုင်ရန် အတန်းတက်စာအုပ်ကိုလှန်လိုက်၏။