خالد جاب لغالية الملازم.. وداها لها في غرفتها..
وعقب راح لدانة في غرفتها
كان يبي يفضي شوي حرته من سعود..
دخل على دانة لقى مزنة عندها...
خالد بنبرة غامضة: مزنة لو سمحتي روحي لغرفتش..
مزنة بابتسامة: ياسلام على الاسرار يعني مايصير أسمع لي كلمتين على الطاير..
دانة ظنت أن خالد يبي يقول لها عن الموضوع اللي هو كلمها عنه قبل ..موضوع حبه الغامض..
وجهت كلامها لمزنة برقة: مزنة ماعليه لو سمحتي... روحي خليني أنا وخالد شوي
مزنة تطلع وتسكر الباب: لنا الله.. ياأهل الاسرار..
دانة ألتفت على خالد وقالت له بحنان: وش عندك حبيبي؟؟
خالد اللي كان يروح ويجي.. قال لها في جملة واحدة حادة: سعود بيتزوج..
دانة شهقت بعنف..شهقة حادة مرعبة..
خالد ارتعب من شهقتها الغير طبيعية وهو يقرب منها ويحط يده على كتفها: بسم الله عليش.. بسم الله عليش
دانة كانت مستمرة في الشهقات العنيفة المتتابعة.. ووجهها يتحول للون الأحمر دلالة عجزها عن التنفس..
خالد احتاس (أنا وش سويت؟؟ وش سويت؟؟)
طلع يركض لمزنة.. وسحبها سحب وهو يركض راجع لغرفة دانة
اللي كانت بعدها جالسة وتشهق.. ووجهها يقلب من الأحمر للازرق دلالة الاختناق.. مزنة بسرعة خذت كأس الماي اللي كان على الكوميدنيو... ورشته بشكل مباشر على وجه دانة..
دانة شهقت شهقة طويلة.. وعقبه رجعت تتنفس.. ووجهها يرجع للونه..
لكنها لأول مرة من طلاقها تعبر عن مشاعرها بصراحة قدام أخوانها لأنها بدت تبكي بهستيرية
خلاص ماعادت مستحملة.. طاقة التحمل انتهت..
انتهت..
انتهت..
"هذي أخرتها ياسعود..
هذي أخرتها
تبي تتزوج"
مزنة ألتفت على خالد بغضب: أنت وش قلت لها؟؟
خالد بارتباك وعينه في الأرض : قلت لها إن سعود بيتزوج.. هو حتى يوم طلقها مابكت كذا..
خالد ألتفت على دانة اللي كانت تبكي بشكل هستيري وهو يقول بحنان: أنا أسف يادانة سامحيني.. ماعرفت إنش بتتضايقين كذا
مزنة بغضب: ماعليه خالد لو سمحت اطلع برا..
خالد بحزن: بس..
مزنة قاطعته بحدة: لو سمحت خالد خلنا بروحنا
مزنة طلعت خالد وقفلت الباب
و رجعت تبي تشوف دانة وتهديها
فوجئت إن دانة ماسكة موبايلها وتكلم بصوت متماسك وهي تدفن كل مشاعرها داخلها وتطمرها طمر: تهاني...قولي لدكتور سعد يجيب المملك بكرة.. أنا موافقة عليه..
وأبي الملكة بكرة... بكرة مهوب أي يوم ثاني
