أقتلني برفق "مجنون إزميرالدا" [كاملة]

الجزء السابع🍷

زمرد: (ضحكات باستهزاء بقهقهة مللي شافت داك البرود منه من جديد و شافت فتايغر كاتدوي معاه و هي كاضحك على راسها و الدموع فعينيها) شفتي كيفاش خلاني نحلم بحياة وردية معاه من بعد خبطني لراسي بالسواد اللي تابعني! هههههه ها هو اليوم قتلني و انا عايشة من جديد، فحال اللي سبقليه دار بزاف دالمرات و لكن دابا الطريقة اللي قتلني بيها ضرباتني فمقتل (زفرات انفاسها بصعوبة و رجعات شافت فالموردر هاد الخطرة) برافو ليك امصطفى علي .. هاد الخطرة خططتي مزيان و خاصني نصفقليك على فعلتك (هزات يديها كاتصفقهم مع بعضهم و ابتسامتها الجانبية متوهجة) لبستيني البيض (شافت ففستانها) اللون اللي كانكرهو بزاااف حيت عذبتيني بيه شحال من مرة و هاد الخطرة قررتي تلبسولي فحال الكفن غطا الجسد ديالي! خطبتيني لراجل مكانعرفوش و عارفني مغانقبلش بيه فحياتي و لكن حيت انت الموردر و مالكني انا و حياتي كادير فيا مابغيتي ياك؟ زيد عليها درتي حركة ذكية مللي خطبتي صاحبتي اللي ماشي غير صاحبتي و لكن حاسباها ختي! .. بلعاني مشيتي ليها هي بالضبط باش مانقدرش نقت •لها فحال هادوك اللي سبقلي و شفتهم معاك ياك؟ كاتزيد تبعد بيننا و تخلينا ممنوعين على بعضنا، انا وياك بشوية بشوية كاتردنا فحال جوج د الخطوط متوازيين مايقدروش يطلاقاو (نظرتها زادت طفات كاتشوف فنظراته اللي ماتغيروش واخا كلامها و نبرة صوتها المنكسرة و الضعف اللي فيها)

عضات شنوفتها السفلية و تبسمات بخفة و طلقات من جسد تايغر، قربات عند الموردر بضعة خطوات متتابعة .. حتى هزات يديها و زيرات بيهم على حوايجه و هبطاته عندها بحركة ميئوس منها و عينيها كايشوفو فعينيه بلا ماترمش حتى!

زمرد: (بخفوت) عجبك الحال مللي عطيتك كولشي فيا و كسرتيني شحال من مرة و مرمدتي بكرامتي الارض ياك؟ عجبك الحال مللي شبعتي شهوتك مني و لحتيني ثلاثة دالسيمانات كانتسناك ترجع وانا طامعة ان علاقتنا تحسنات فاللخر كاتصدمني بأنك خطبتيني لواحد آخر علي قبل صفقة و شراكة بيناتكم انت وياه؟ وليت وسيلة بالنسبة ليك، تزوجني لواحد آخر و بهاكا غاتدفني وانا حية و غاتهنى مني و من صداعي، نبعد عليك و ماتبقاش تشوفني ولا تعرف خباري حيت غانكون مع راجلي! (نظرته ليها قدرات تحسها اهتزت لثانية و لكن من بعد جمدات فيها من جديد) هههه عارفة هضرتي حركات شي حاجة وسط هاد الحجرة اللي عندك هنا (خبطات على قلبه بيدها و نظرتها متوحشة فعينيه) بغيتيني نتزوج بواحد آخر و نكون ديالو بوحدو و نبعد عليك غاااندييرها (نظرتها تحولات لتحدي و غضب كبيير و عاودات لصقات فيه من جديد كاتمتم بصوت اشبه للمسموع) لعبتك الموسخة معايا غاتقلب عليك و عن قريب انا اللي غانشوف فيك بهاد الشوفات اللي كاتشوف فيا بيهم (سكتات لثواني كاتأمل فعينيه بحب كايذوب الحجر و بنبرة صوت جامدة و حارقة همسات) كانكر •هك انا دابا و كثر مكاتكرهني انت

طلقات منه متراجعة للخلف خلاته كايشوف فالفراغ بنظرة جامدة، حتى دخلات لغرفتها و زدحات عليه الباب .. كور قبضة يده بقوة و نبرة صوتها اللي تمتمات بكلمة كانكر •هك كانت كاتردد فعقله مرة بعد مرة ، علا عينيه على غفلة فتايغر اللي بقا واقف كايشوف فيه