ခပ်ဖြေးဖြေး လျှောက်လှမ်းနေသော ခြေထောက် ၂ စုံမှာ သိပ်မဝေး။ နီးကပ်နေသည်လည်းမဟုတ်။ ဂျယ်ဂျူဘက်သို့ အတူသွားဖြစ်ကြတုန်းက ဝယ်ဖြစ်ခဲ့သည့် ပုံစံတူလက်ကောက်တို့ ဆင်မြန်းထားသော လက် ၂ ဖက်မှာ ပူးကပ်ချင်နေသော သံလိုက်အားကို ခုခံနေပုံရသည်။
"Hyung.."
"ဂျီဆောင်း.."
တစ်ပြိုင်နက်တည်း စကားစမိကြခြင်းမှာပင် သူတို့အတွက် ရှက်သွေးဖြာကာ ရယ်သွမ်းသွေးချင်စရာဖြစ်နေပုံပင်။
"ဒါဆို တကယ် Hyung တကယ်ပဲ America ကိုမသွားတော့ဘူးလား"
"အင်း။ master ကဒီမှာဆက်တက်လည်းဖြစ်တာပဲ"
"အဲ့ဒါဆို Hyung ရှာတွေ့ထားတဲ့ အိမ်ဆိုတာကရော? ကျွန်တော့်ကိုမပြတော့ဘူးလား"
တောင်ကုန်းကလေးကို ကွေ့ပတ်ထားသည့် လျှောက်လမ်းပေါ် ဖြေးဖြေးချင်းလှမ်းနေသည့် ခြေလှမ်းတို့အား တန့်ပစ်လိုက်တော့ အမျိုးသားငယ်လေးဟာ သူ့ဘက်မျက်နှာမူလာသည်။
"ငတုံးလေး"
သူ၏နှာထိပ်လေးကို တစ်ချက်တောက်လိုက်ကာ ဆိုတော့ ကလေးပေါက်စမှာ မကျေနပ်ဟန်။
"ကျွန်တော်ကတုံးတာမဟုတ်ဘဲ Hyung ပြောပြတာကိုကြားချင်တာဆိုရင်ရော?"
မင်ဟို ခပ်ဟဟရယ်မိသည်။
"အင်း.. ဒါဆိုလည်း Hyung ကပြောပြရမှာပေါ့"
Cardigan အညိုရောင်ထပ်ဝတ်ထားသော ခါးသွယ်သွယ်ကို လှမ်းဖက်တော့ ကောင်ငယ်လေးက အလန့်တကြားနှင့် ပတ်ဝန်းကျင်တွင်လူတွေများရှိနေမလားဟု လှည့်ပတ်ကြည့်၏။
"ဂျီဆောင်း.. မင်းက Hyung အတွက် အခန်းဖော်မဟုတ်ဘူး"
နဖူးကျဥ်းပေါ် ဝဲကျနေသော ဆံစများကို ကျန်လက်တစ်ဖက်ဖြင့် ဖယ်လိုက်တော့ ဂျီဆောင်းက သူ၏မျက်လုံးများထဲသို့ မျက်လွှာပင့်ကာကြည့်လာသည်။
"အိမ်.. အမြဲတမ်းနေသွားချင်တဲ့ အိမ်။ ဘယ်နေရာပဲဖြစ်နေပါစေ။ မင်းသာရှိနေမယ်ဆိုရင် အဲ့ဒီ့နေရာက ကိုယ့်အတွက် အိမ်ဖြစ်နေမှာပဲ"
ကောင်ကလေးက သက်မရှိုက်လိုက်ကာ သူ့ရင်ခွင်ထဲ မျက်နှာအပ်လာသည်။
"ကျွန်တော် ကြောက်နေခဲ့တာ။ ဟိုတစ်နေ့က Hyung မေမေပြောနေတာကိုကြားပြီးကတည်းက တကယ်ပဲကြောက်နေခဲ့တာ။ အဲ့ဒီ့ကြောက်စိတ်ကြောင့် ဆွဲထားမိမှာမျိုးလည်းမဖြစ်ချင်လို့ ကိုယ့်ကိုယ်ကိုနည်းအမျိုးမျိုးနဲ့ဖြောင့်ဖြကြည့်လည်း အဆင်မပြေဘူး။ ကျွန်တော်တကယ်ပဲ Hyung ကိုကျွန်တော့်နားက ထွက်မသွားစေချင်ဘူး"
သူ့အားပို၍တိုးကာ ဖက်လာနေသော ခန္ဓာကိုယ်ငယ်ကို သူသည်လည်း သူ့ရင်ခွင်ထဲ အံဝင်ခွင်ကျရှိနေစေလိုက်သည်။
"Halley's comet ဆိုတာကို သိလား ဂျီ"
ဂျီဆောင်းက ကြားဖူးတယ်ဟု ခေါင်းငြိမ့်ပြသည်။
"လူတစ်ယောက်အနေနဲ့ တစ်သက်မှာ တစ်ခါပဲတွေ့နိုင်တဲ့ ကြယ်တဲ့။ နောင်နှစ်၄၀လောက်နေမှ ပေါ်လာနိုင်တာဆိုတော့ အဲ့ဒီ့အချိန်အထိ အသက်ရှင်နေနိုင်ပါ့မလားမသိပေမဲ့ ကိုယ်အဲ့ဒီ့ကြယ်ကို မင်းနဲ့အတူတူကြည့်ချင်တယ် ဂျီဆောင်း။ အဲ့ဒီ့ကြယ်ကိုစောင့်ရင်း ကိုယ့်ရဲ့တစ်သက်တာကို မင်းနဲ့အတူတူဖြတ်သန်းချင်တယ်"
ဂျီဆောင်းက သူ၏နှုတ်ခမ်းအစုံကို ခပ်ဖွဖွတစ်ချက် နမ်းသည်။
"ချစ်တယ်။ ကျွန်တော်ကတော့ Hyung လို metaphor တွေသုံးပြီး ကွေ့ဝိုက်မပြောတတ်ဘူး။ စတွေ့ကတည်းက သဘောကျခဲ့တယ်။ အနားမှာရှိတာ ကြာလာလေလေပိုပြီးသေချာလာလေလေပဲ။ Hyung ကကျွန်တော့်အတွက်တစ်သက်မှာတစ်ခါထက်ပိုပြီးရှာမတွေ့နိုင်မယ့်လူမျိုး။ ချစ်တယ်။ ရင်ထဲနင့်နေအောင်ချစ်တယ်"
မင်ဟို နှစ်နှစ်ခြိုက်ခြိုက်ပြုံးလိုက်မိချိန် ဂျီဆောင်း၏ သူ၏နှုတ်ခမ်းများပေါ် နောက်တစ်ကြိမ်ထပ်၍ ဖိကပ်လာ၏။ ဤတစ်ကြိမ်တွင်တော့ ထိုအနမ်းကို သူဦးဆောင်သည့်ဘက်သို့ ဆွဲခေါ်လာမိသည်။
ကျေနပ်သွားပါပြီ။ သူ၏ဘဝတွင် ထို့ထက်ပို၍ မျှော်လင့်စရာမရှိတော့။ အခက်အခဲများကြုံရသည့်တိုင် မျက်လုံးနှစ်ဖက်ကိုပိတ်ချလိုက်ပြီး ပြန်ဖွင့်လိုက်သည့်အချိန်တိုင်း ဤချစ်ခင်ရပါသောမျက်နှာနုကို မြင်တွေ့ရမည်ဆိုသော အတွေးက သူ့အားခွန်အားပေးနိုင်ပါ၏။
ဤမျှ သာယာချိုမြိန်ပါသော အိမ်ငယ်ကိုသာ သူ့ဘဝနှင့်ရင်း၍ သက်ဆုံးတိုင် ကာကွယ်နိုင်ရန် ကြိုးစားဖြစ်တော့မည်သာ။
~
#ReddyBombax
