اسكريبتات متنوعة

♥️♥️

_يا سعاد قلتلك كام مرة متضربنيش قدام الولاد، يا ستي اضربيني في الأوضة حتى  بعيد عن عينهم.

=يا أخويا وهو أنت بيحوّق فيك، كلت المانجا اللي كانت في التلاجة ليه يا مـــرسي؟

_هه! مانجا! أنا مكلتش مانجا، مين قال إني كلت المانجا؟

=عيالك فتنوا عليك.

بصيتلهم بجنب عيني وأنا مستحلفلهم، وأولهم أمهم اللي عاملة قادرة دي.

=سرحت في إيه يا مـــرسي؟

_هه! ولا حاجة.

فتحتلي إيديها وهي بتبص لي بصات شريرة وقالت:
=هات اللي في جيبك يلا.

بلعت ريقي ودخلت إيدي في جيبي طلعت اليومية بتاعتي واديتهالها، كنت هعترض بس هنول إيه من الاعتراض غير زعيقها بتاع كل يوم والاسطوانة اللي بتسمعهالي.

=شايفاك عايز تعترض.

_وأعترض ليه؟ هو أنتِ يعني بتاخدي الفلوس ليكِ ما هي بتروح على أكلنا وشربنا ولبسنا وطلبات عيالي اللي ما بتخلصش واحنا ورانا هموم مش بتتلم و..

=أنت بتتريق عليا يا مــــرســــي؟

_والله العظيم أبدا، ينقطع لساني لو اتريقت، أنتِ ست الكل.

سيبتها وقمت وأنا ببلع في ريقي لحد ما نشف، منها لله مـ..

_مـــرســـي

يادي اليوم اللي مش هيعدي، لأ ولازم تمط الاسم يا مــورصي.

_نعم يا سعاد؟

=انزل هات كيس ملح عشان اللي هنا خلص.

_هنزل عشان كيس ملح؟ ما تبعتي حد ما الولاد.

=هتعترض كمان؟ وبعدين الولاد مينزلوش لا حد يرخم عليهم.

_حاضر.

نزلت جبت الملح وطلعت بحال غير الحال، ربنا يريحني من دي ولية قادرة كل مشاكلي من تحت راسها، خبطت على الباب وفتحتلي وبان على وشها الصدمة وهي بتقول:

=يا حوستي إيه اللي عمل فيك كدا؟

_دخليني بس أقعد، خدي الملح ده.

دخلت قعدت وجت قعدت جنبي وللعجب عنيها كانت مدمعة وهي بتسألني بخوف حقيقي:

=مالك يا مرسي إيه اللي شلفط وشك بالشكل دا؟

_بلاش عشان متضايقيش.

=هضايق ليه؟ قولي مين عمل فيك كدا وأنا أجبلك حقك منه تالت ومتلت.

جملتها عصبتني جدا فاندفعت:

_جرى إيه يا سعاد؟ هو أنا معرفش أخد حقي ولا إيه؟ لتكوني فاكرة عشان أنا هنا بسيبك تزعقيلي براحتك يبقا أنا مش راجل ومعرفش أدافع عن نفسي وأهلي.