فضل فيصل يفكر في كلام وعد وكلام سته فوزية ويتكلم مع نفسه: "هو أنا فعلا غيران عليها؟ طب أنا غلطت برد فعلي دا؟ طب أنا ليه عملت كده؟ علشان هي زي أختي ولا حاجه تانية وكنت غيران؟ وممكن فعلا أكون زي عم إبراهيم زي ما وعد بتقول ولا لأ؟ إيه دا؟ أنا مش عارف أعمل إيه والصح فين والحقيقة فين، ومش قادر أحدد مشاعري...".
فجأة يقطعه صوت فاطمة بتنادي عليه للغدا... يطلع فيصل ويقعد على الطبلية ويلاحظ غياب نجاة.
فيصل: "هي أمي فين؟ وباقي العيلة؟".
وعد ترد بعد ما تجاهلت فوزية: "أمي بتأكل جدك جوا... وأبوك انت عارف نزل يبيع المحصول مش هيرجع قبل أسبوع...".
فيصل: "آه... صح أنا نسيت"، وعيونه تحوم حوالين الدار يفتش عن شخص معين.
وعد: "عن إذنك يا ستي، أنا قايمة...".
فوزية: "ماشي يا حبيبتي... ركزي كويس في مذاكرتك".
فيصل: "أنتِ ما كلتيش يا وعد، رايحة فين؟".
وعد: "أنا هجاوبك بس علشان عيونك اللي تعبت من كتر اللف عليها، طالعة أكل مع نجاة فوق علشان مش راضية تطلع من أوضتها".
فيصل: "عيون إيه والكلام دا اللي بتقوليه؟ دا أنا غلطان اللي سألتك! إن شاء الله عنك ما طفيتِ... لسانك بقى طويل يا وعد ودا آخر إنذار ليكي، فاهمة؟".
ويسيبهم ويروح المكتب وهو بيزعق: "عاااايز شاي حالًا...".
تطلع سعاد أم فيصل: "إيه في إيه؟ ماله فيصل ولدي بيزعق كده ليه؟".
وعد: "علشان الحقيقة بتتعب شويه، وابنك طول ما هو ما كبر دماغه كده هيفضل يتعب، والأيام مش هتسيب حاجة لحد...".
وتطلع وعد لغرفة نجاة وتحاول تخليها تاكل... إنما تحت، فيصل في المكتب وتدخل عليه فاطمة بالشاي.
فيصل: "إيه ده؟ فين الفايش اللي مع الشاي؟".
فاطمة: "حضرتك ما قلتليش يا سعادة البيه، هروح أجيبهولك على طول".
فيصل: "هو أنا لازم أقول ولا إيه؟ ما نجاة كانت تجيبه من غير ما أقولها"، وهنا الكلمة ترن في ودنه... فعلا، نجاة كانت تعرف اللي محتاجه من غير ما يقول، ودي أول حاجة لازم يعرفها...
فيصل يبلع الشاي بقرف: "إيه ده يا بنتي؟ ده منظر شاي؟ مين اللي عمل الشاي ده؟".
فاطمة: "الست هانم سعاد يا بيه...".
فيصل بزعيق وعصبية: "يا مااااا... يا مااااا...".
سعاد ملهوفة من المطبخ: "إيه في إيه يا فيصل بتزعق كده ليه؟".
فيصل: "انتِ اللي عاملة الشاي ده يا ما؟".
سعاد باستغراب: "أيوه، في إيه يا فيصل يا ولدي مالك أكده متعصب اليوم؟".
أنت تقرأ
صعود امراه
Mystery / Thriller"في قلب صعيد مصر، حيث العادات تقيد الفتيات، نشأت هي في عائلة لا تقدر قيمتها. رغم كل الصعوبات والعقوبات، ما استسلمتش. بإرادتها الحديدية وعزيمتها التي لا تلين، أثبتت للجميع، ولعائلتها بالذات، إنها قادرة على تحدي كل الصعوبات. هي زي الشاي في النار، ثابت...
