مر يومين علىَ موت ياسر دفنوه وسوُ الفاتحة وزعُو ثواب
گاعد گاضم يم أميمة التبچي بگُل حرگه يم گبر ياسر وتُن بأسمه
آسر وأكف وراهم ويبچي بصمت
آسر:ولگعبة أموته أموته الگتل أخوية أگطع رأسه.
وگف گاضم وأخذ أميمة للسيارة ولزم آسر وگال
:عرفنا الگتل أخوك
فز آسر وگف يم أبوه بصوت ضعيف وعصبي
آسر:وينه دليني عليه بويه ولعباس أچيب رأسه گدام أمي..!
گاضم:مچان بوعيه آسر چان سگران الضرب أخوك
آسر:لو مخبل أجيبه وأگطع رأسه أبن الگحبة سگران ويگتل بالعالم
صرخ گاضم وگال
:اهدئ آسر أحنه مو نلزم ولد العالم ونگتل بيهم نروح لأهله ونتفاهم وياهم
آسر:صدك تحچي بويه؟!.شنتفاهم أجيب رأسه وأخليه يم أمي مَتشوف حالها يا تفاهم گتل ياسر بويه گتله لاخوية
نزلت دمعة من آسر وهو يحچي مَگدر يتحمل يجب سيرة ياسر على لسانه ويتذكره
"أبتسامته وضحگته وطوله فرفوش العائلة مايگدر يستوعب البيت بدونه منو حيضحگنه ويسوي أجواء منو اليتحارش بيهه منو اليجمعنه ويسوي خبصية علمود رسمة رسمها.!منو..!"
ضم گاضم راس آسر بصدره وگال بصوت حنين
:بويه أدري بيك گلبك محترگ على أخوك بس هذا قضاء ربك كُل شخص ويومه وهسه ياسر بأفضل مگان يم الله يم ربك العظيم.
