العـشــق الصــحــيــح 𝐓𝐡𝐞 𝐂𝐨𝐫𝐫𝐞𝐜𝐭 𝐋𝐨𝐯𝐞

أروينـــي بعشــقك 22

إحساس متناقض داخلها .. بين رغبة والنفر .. باغاه يرجع .. يفهمها مالو .. ويعاود ليها شنو لي بيه .. يفهمها إحساسو وشنو لي عاش بلا بيها

وفنفس لوقت باغاه يبقا بعيد .. مبغاش ترجع تقرب ليه باش متآداش كيف الأول .. أصعب مرحلة دازت منها فحياتها .. ومتبغيش أي بنت تجربها ولا تعيشها .. هي الإغتصـ ـاب .. باش تصبر على قبلو وتخاطر بروحها لي قادرة تمـ ـوت من جديد بأسم الحب .. وتنازل عن نفسها لي يمكن تنسجن في مايسمى بإحتضار نفسي ..

داكشي علاش قررات تحمي روحها .. وتبعد على الراجل لي كتبغي ولي يقد يآديها .

بلاما تحط منتوج واحد على لحمها لغير عادتها .. ضورات فوطة على لحمها .. خلات شعرها سارد ورا ضهرها .. وخرجات ..

كانت كريمة جالسة فوق السرير .. كتسناها وضميرها كيآنبها .. حيث خلاتو ياخدها تما وينفارد بيها بوحدهم ...

بقات مراقباها بلاما تكلم ولا تقرب ليها .. خلاتها حتا  لبسات حوايجها قدامها بلاما تحشم منها .. علاش لي غاتحشم منها وهي لي كانت كدوش ليها ... فاش كانت غاطسة فحزنها .. وآكتئابها فصغرها.

وغير  سالات قربات لسريرها .. لمحات علبة فإيد كريمة .. فيها أساسيات تنضيف الجـ ـرح وتعقيمو ...

بدون حوار قربات ليها .. هزات شعرها لي كان باقي سارد ومطلوق .. عقمات ليها جرحـ ـها في صمث .. داواتو ودارت فوق  منو ضمادة .. وشافت فيها

كريمة : سمحي ليه .. واخا هكاك ماشي لخاطرو .

زينب : (بصوت خافت ) عييت .. بغيت نعيش مرتاحة ولكن حتا حاجة مكتجي عندي مقادة .. حتى من راجل لي كنبغي .. بغا يتعدى عليا

وسعات عينيها وبقات كتشوف فيها بصدمة ملقات متقول ..

كريمة : كتبغيه ؟

زينب : مقالهاش ليك !؟ أنا سبب فكلشي كون مقربتش ليه مكانش غايطرا هادشي

كريمة : كتكدبو عليا ؟!! واش هو كيقول ليا هضرة ونتي هضرة

زينب : شنو قال لك

كريمة : قال لي كان سكران وقرب ليك .. و بالغلاط جرح ليك عنقك .. قول ليا شنو طرا .. عاودي ليا الحقيقة واش بصح كتبغي سيف ؟

زينب : بغيت نعس .. تقدري تكاي حدايا بينما غفيت .. كيف كنتي كديري فصغري

قربات ليها قبلات خدها .. وتكاتها فوق سرير .. جلسات حداها حاطة رأسها .. فوق رجليها .. كدوز على فروة رأسها بصمث .. دقائق قلال وغفات .

                      عند يــاسـمــين

كانت سالات شغلها من بعد مابدلات حوايجها حيدات ديك لكسوة لي قال ليها ولبسات نفس الكسوة الكحلة لي كانت بيها لبارح .. شقات بيها ونضفات بيها دار .. وغير سالات .. صايبات ليها وليه الغدا ضانة بلي غادي يجي ..