កូនកម្លោះក្នុងឈុតពណ៌ខ្មៅ

ភាគទី២

ភាគទី២: ចចកកំណាច !!

ព្រលឹមស្រាងៗម៉ោងប្រមាណជា៦យើងក៏ឃើញវត្តមានរបស់ស៊ុននូយ៉ាចេញពីបន្ទប់នោះមកវិញ ដោយមិនបានដឹងទេថាគេចូលធ្វើអ្វីក្នុងបន្ទប់នោះរហូតដល់ស្មើនេះ។

រាងតូចដើរចូលទៅសម្អាតខ្លួនក្នុងបន្ទប់ទឹកមួយស្របក់ក្រោយគេចេញមកវិញជាមួយសម្លៀកបំពាក់យ៉ាងសមសួន។ គេដើរសំដៅទៅមុខកញ្ចក់សារ៉េក្រវាត់-ករបស់គេបន្តិច រួចក៏ឈោងដៃទាញដបទឹកអប់តម្លៃថ្លៃមកបាញ់ឈីតៗដើម្បីបន្ថែមមុនស្នេហ៍បន្តិច ទើបគេចុះទៅក្រោមបន្ត...

«ស៊ុននូយ៉ាចុះមកដល់ល្មម ប៉ារៀបនឹងអោយអ្នកបម្រើទៅដាស់ហើយទេតើ» សំឡេងធំក្រលបន្លឺសម្តីរាក់ទាក់ទៅកាន់អ្នកដែលទើបនឹងមកដល់ ស៊ុននូទាញកៅអីអង្គុយចុះពីមុខបុរសចំណាស់ដោយញញឹមតបទៅកាន់គាត់វិញ។

«យប់មិញកូនគេងមិនសូវលក់ទើបព្រឹកនេះក្រោបរាងយឺតបន្តិច» រាងតូចពោលប្រាប់ហេតុផលដោយកុហកខ្លះនិងជាការពិតខ្លះទៅកាន់គាត់។

គាត់?? អូ៎! មែនហើយបុរសដែលកំពុងឆ្លងឆ្លើយសន្ទនាជាមួយស៊ុននូយ៉ាពេលនេះលោកគឺ លោកម្ចាស់ស៊ូ ដែលត្រូវជាឪពុករបស់ស៊ូ ឈិវូ!! ចំណែកឯភូមិគ្រឹះដែលរាងតូចកំពុងស្នាក់អាស្រ័យបច្នុប្បន្ននេះគឺជាកម្មសិទ្ធិរបស់លោកហ្នឹងឯង.. ទោះបីជាស៊ុននូយ៉ាមិនទាន់បានរៀបការជាមួយកូនប្រុសរបស់គាត់ក៏ដោយក្តី ប៉ុន្តែដោយចិត្តសន្ដោសប្រណីលោកបានអោយគេមករស់នៅទីនេះ ហើយថែមទាំងស្រឡាញ់មើលថែស៊ុននូយ៉ាបានយ៉ាងល្អប្រៀបបាននឹងកូនម្នាក់ទៀតរបស់លោកយ៉ាងដូច្នេះដែរ។

«អា៎...»
«បើថាមិនស្រួលខ្លួនទេមិនចាំបាច់កុំប្រឹងធ្វើការពេកទេកូន សម្រាកយកកម្លាំងខ្លះក៏ល្អ» លោកម្ចាស់ពោលទាំងបារម្ភខ្លាចក្រែងកូនប្រសារធ្វើការហួសកម្លាំងនាំអោយឈឺស្កាត់ណាមួយកើតឡើង... ស៊ុននូក្រវីក្បាលបែបបញ្ចាក់ថាមិនអាចធ្វើតាមសម្តីលោកបាន។