The King of Kingston- BOOK 3 of the TULPS series

Chapter Eleven: Perspectives

Ollie

Alright den.

It look like a it this enuh. Mi and Scamma been a wait pon the fuckry fi really start. Seet deh... seet yah now.

Ana truly nah play wid di G.

She send courier service fi deliver divorce papers to the man and it's not even been five minutes since him read it and the G a head chip out.

Me and Scamma nuh know wah fi do or say, suh wi just siddung and a look pon him siddung round him office desk wid his head inna him hand a lose him rass mind.

"Geego, she nuh mean it, she just wah yuh feel it, yuh zeet?" Scamma sighed... mi hear the nervousness inna di man voice, and mi heart feel a way. "Ana nah just leff yuh suh, my boss, she a nuh like dem likkle fly by night gyal deh."

Kai nuh as much as flinch from dah position deh since him call ar and she hand up pon him.

A dem supn yah mad people enuh.

Mi know Ana vex fi true, and hurt...especially because a how deal wid the ting- basically mek she feel like she did a mad fi assume he woulda cheat- den fi guh actually see video a di dawg a wuk out Zasha hole...mi know dat cant easy.

Mi get it. Mi get the two a dem side. Him know him wrong, and willing fi wait it out til she heal...but she too hurt fi even imagine that healing could be possible at all.

Mi nuh know...

But, if Ana serious bout this... Mi nuh think Malikai will eva be the same. Mi neva see smaddy love smaddy suh yet...and she love him same suh too.

I guess that's what makes it worse.

Mi been in di same situation...with 'Pri 'Pri where Ana buss out mi secret and mi did think we couldn't come back from it..but we did. Come back betta to. Nuh know weh mi woulda do if mi neva have mi wife and daughter. Mi nuh fuck up since.

And man like mi nuh grow fi bi one burner... nuff mock and jeer mi get fi have one gyal when mi did a yute.

It's been hard fi keep faithful...and mi nah lie, a Evans mi look to when mi need inspiration or when mi feel like mi a guh fuck around and fuck smaddy...and fuck up mi life.

Him mi use as mi guide... so seeing him in this situation now? Yeah, the G a human and mek a mistake.

A still the best rass man mi know.

Scamma

Fi smaddy weh eva have them two sense, a di first mi eva nuh know wah fi say.

Mi just siddung and a try come up with words fi console him and every now and then a one-liner might fawud fi mi say, but nothing nah mek nuh difference.

Mi neva see the dawg look suh yet.

Mi get a glimpse of it when muma did find out bout the ting weh gwaan, but this look like bro out fi kill everyting.

And Mi nuh ready fi dead enuh, suh mi nuh know how wi a guh work this out.

Mi understand him situation... inna wah way. Mi and my baby mada been together fi ova ten years, and mi nah lie, mi give ar suh much bun mi can't even count. Mi love ar, and wi yute dem bad snd mi wouldn't wah lose them. Nuff time she find out bout teh bun dem, she cuss, and vex, but a wi dat again the next day. Sometime mi wonda why Keisha nuh leff mi all now.

May she just nuh expect nuh betta from me. Maybe a dat. Maybe Ana just disappointed inna him...

All mi know it rough fi a look pon di boss and see him look like him out fi stop breathe.