غرام إبن العم ( باللهجة الجزائرية )

البارت الاول 🔥

🥀 غرام إبن العم 🥀

قوانين العرش ⚜

بقلم إدمان سيما ... Sima jarisse 🍷🥀

⚖ محمية بموجب حقوق المؤلف والحقوق المجاورة : نقل القصة وإزالة إسمي أو عنوانها او محتواها يعتبر إنتهاك قانوني .. 

*بسم الله بسم الله، بسم الله يبدا البادي

محمد نبينا هو خير الاسيادي

*محمد محمد صلوا يا الامة عليه

سيدنا وحبيبنا يفرح من صل عليه*

حني حني يا الحناي والحنة في طبسي البلار

يربطها سيدي وليدي بجاه النبي المختار

قاعدة مقابلة الياقوت وهي ديرلي في الحنة دموعي تسرسبو تحت البرنوس لي مدايراتو كي خلصت حطت حبة لويز فوقها والقطن قربت مني طلت من البرونوس عينيها الزروقا لي يلمعو قالتي افرحي هذا عرسك يا طفلة خزرت فيها بكل حقد قتلها ليوم دفينتي فهمتي ليوم الدفينة تاعي زيرت على يدي قالي تبلعي فمك وتسكتي قتلها بعدي عليا خليني نروح حبيب يستنى فيا قالتي تنساي حبيب تاعك ليوم عندك وليد عمك هو راجلك هو سندك هو حبيبك من اليوم وما تخزري لواحد غيرو قتلها هذاك النص راجل ديريه في الما ونشريه يشيح  يا الشايبة ولله ما نسمحلك طول حياتي زادت زيرت على يدي توجعت مالغري عجوزة بصح تقول راجل بصحتو قالتي ابقاي تهدري هكا ولي تفاهمنا عليه ننساه كي قالتي هكا حسيت قلبي نغزني قتلها صاي بعدييني طلقت يدي وراحت هزت البرنوس فوق راسي نشوف في الناس يشطحو مقلبينها بشطيح والرديح قربت ماما وخياتي مني قالتي عمري يا بنتي خلاص .. والنسا ملهيه يقولولي خلاص متبكيش حسبتلهم راني نبكي كي نفارق دارنا بصح لي في القلب يبقى في القلب وزواجي راح يكون موتي من ولد عمي لي جامي عرفتو ولا عرفني وزيد متزوج بولادو ولمحتو مرة وحدة  ...أنا إسمي أسيل عمري 17 سنة نقرا الثالثة ثانوي عندي الباك هذا العام  .. عايشة مع بابا وماما وزوج خياتي صغار عليا يعني انا البنت البكر في دارنا .. ختي شيماء عمرها 14 وختي كوثر عمرها 10 سنين  عايشين الحمد لله لاباس بينا قدنا قد رواحنا بابا خدام ماصو وماما تعاونو تخدم القاطو تاع لعراس وربي كافينا الحمد لله صباح وعشية جامي بتنا جيعانين ولا خصتنا حاجة ومحضرتش عندنا بابا كان يحبنا بزاف يقولك انا بناتي يدخلوني للجنة وصح مشريفنو ديما الاولين في القراية وديما يعيطولو باه يكرمونا في 16 أفريل زاد دخلنا نقراو القران وحفظت 5 أحزاب وخياتي نفس الشي .. مكانوش عندي صحاباتي من غير بنت عمي شهرة  لي كبرنا مع بعض وعمومي لخرين  عندنا عداوة معاهم من زمان معلابليش المشكل وين ديما نسقسي ماما نقولها علاه منروحوش ليهم وحنا نسكنو في نفس الولاية تقولي منروحوش وصاي وتبدا تتهرب من الحكاية عرفت منها انو دار جدي دار تاع عروش يعني شادين في العادات والتقاليد لدرجة كبيرة عندهم الطفلة متقرى ما دير والو في حياتها تتعلم حرفة الريف وين عايشين وصاي حاسبين القراية عيب وهذا لي قلقني والحمد لله بابا مخرجش كيفهم قداه من مرة نخمم ونقول كون تربيت ثما كيفاه تكون حياتي زعما نحلب البقر ونرعى الغنم مجرد فكرة رعشتلي جسمي يخاه مزيا لي ربي يحبني وبعدني عليهم ... مام عمي يسكن عندنا  متخاصم معاهم من زمان وجا يعيش هنا  مالغري بناء فوضوي بصح من داخل الدار تلمع لميع مرتبة وشابة تهبل ماما تموت على النظافة مام مرت عمي .... مقابلة البحر انا وحبيب نشوفو ليه وكوثر تلعب نطق ليا قالي وين غايسة عمري شفت فيه قتلو راني هنا برك قالي امم حاسك مكيش مليحة قتلو صراحة ماما صباح خليتها في حالة وجها صفر وتتقيا ( حشاكم ) قالي كون عمي داها للطبيب قتلو معرف بلاك يكون داها ضك وزيد منيش حابتها تمرض والباك قرب قالي متتقلقيش ضك تبرى نشاله .. حبيب يكون ولد عمي لي عايش معايا ( الطاهر ) عمرو 25 سنة من وقت كنت صغيرة نشفالو يديني ويخرجني معاه مع الوقت تعودت ليه بدات علاقتنا تطور حبينا بعضانا بطريقة مش نورمال دخلنا في غولاصيو وهو ديما يقول لبابا اسيل ليا وراح تكون مرتي وبابا يقولو غير ايه ايه من بكري عارفينا نحبو بعض انا الهوا تاعو وهو عينيا لي نشوف بيهم منقدرش نتخيل واحد خلافو في حياتي اصلا شكون يجي كيما هو كي نمرض يسهر معايا ولا نتوجع يتوجع معايا راجل لي تحلم بيه اي طفلة ( شاوي حر ) .. قالي مالا هيا نوضو قتلو اصبر نعيط لبنات  قالي امشي مليح متبقايش تتلاوي وتهزي في هذاك المسلان هزيت حاجبي فيه قتلو انا نمشي هكا قالي طيري ضحكت عليه وعلى غيرتو لي تقتلني بصح هكاك وحلوة عيطت لبنات وروحنا حكمنا طاكسي ركب هو القدام وحنا لور وصلنا للدار هبطنا ستغربت من زوج طومبيلات بزاف شابين توال دارنا وحدة بيضة ولوخرا كحلة كبيرة قتلو شكون جا لينا قالي هيا نشوفو طارت كوثر تمس في الطومبيل وتقولي وكي شابة وشيماء هازة الطابلات وتتصور بيها صراحة حتى انا عجبتني نطق ليا حبيب قالي هيا قتلو اسبقني ضك نجي هزلي براسو ودخل وانا حكمت تلفوني قتلها اسمعي شيماء ارواحي زعما انا نمشي ونجي نحل الطومبيل ونتي صوري كي نضرب على القفلة حبسي الفيديو قالتي اوكي اجري تصورت معاها الف مرة باه دخلت سمعت الحس زدت ستغربت كثر قابلتني ماما هي ومرت عمي زهرة هازين السنيوة وماما مزال وجها صفر شفت فيها وشافت فيا قالتي بنتي أسيل جيتي يا عميرتي مدت السنيوة لمرت عمي وقربت مني حكمت وجهي قتلها واش كاين قالتي مكاين والو يا عمري مكان والو باستني من جبهتي قتلها علاه وجهك اصفر قالتي تاعبة برك قتلها وشكون عندنا قالتي الصراحة دار جدك قتلها من وقتاه داركم عندهم هذا الخير والطومبيلات تاع الملايير قالتي دار باباك اسيل كي قالت هكا حسيت بحاجة مشي نورمال قتلها واش جابهم اااه واش فكرهم فينا بسلامة غلقتلي فمي ومرت عمي تقولي اسكتي يا الموصيبة قتلها بعدي تشوفي من بكري معروفة بلساني السليط لي يبرد قلب جميع الناس دخلت عليهم قابلوني زوج نسا وعجوزة ووحد لبنات وحدة تبان 25 ولوخرا 30 سنة هكاك صغرت عيني فيهم لعجوز قاعدة قعدة الرجال وهازة السبحة لابسة حجاب ابيض تاع حج مع  خيمارو مكحلة عينيها وموشمة وشم الشاوية ولخرين كامل بلجلباب لحقتني ماما قالتها دادا ( فيها الشدة معنديش لوبسيو ) هذي تكون بنتي الكبيرة أسيل قالتي قربي هنا خزرت فيها قتلها شكون نتي اصلا حتى نقرب ليك ؟؟ ووشكون هذو قرصتني ماما قالتها متعرفكمش علابيها نخلعت قالتها بنت الشاوية يكون كلامها موزون ورزينة بنت عايلتنا وبنت عرشنا تلبس الجلباب وتستر روحها بنت عرشنا تقعد في الدار تخدم اهلها وناس دارها متخرجش للرجال يشوفوها وهبطت راسها تسبح طرطقت عيني فيها منبعد ضحكت بقد ما عندي شافو فيا كامل حتى الرجال خرجو من الصالو وحبيب معاهم حكمني من يدي قالي امشي قتلو لا بعدني خليني نهدر قتلها جامي حوستي علينا مالا تحملي قرب بابا حكمني من زندي قالي اسكتي وطيري اطلبي السماح من جداك نحيت يدي قتلو بابا وخزرت فيه دموعي راح يسيلو قالي روحي طبعني توالها جامي بابا ذلني هكا توال الناس ديما مطلعنا الشان تاعنا كي شفتو محمر وجهو فيا غمضت عيني كارهة حياتي قربت منها قتلها سمحيلي نطق بابا قالي سلمي على راسها قربت سلمت بلخف وبعدت ضربتني ريحة المسك لي دايراتو بزاف شباب قالتو علم بنتك التقاليد قالها يما بنتي معلمها من بكري وهي طلبت منك السماح مالا حتى نتي عامليها مليح قالتو الطفلة لي تخليها تخرج هكا واش حكايتها شفت في روحي لابسة سروال وليكات طويلة كنت عادية جدا مهيش مفضوحة قالها هذي واش نحب انا نديرلهم بناتي شافت في مرت عمي قالتها عيطي للعروسة شفت لماما قتلها شكون العروسة نطقت هي قالتي سلمي على عمومك ونساهم وعرايسهم قتلها ااه قالي بابا هيا سلمت عليهم بلواحد وزدت عمومي لي كانو زوج جبدني حبيب توالو قالي اشش قالتو انت يا وليد الطاهر ارواح هنا سلمت وجبدت روحك قالها انعم قالتو واش تخدم قالها خدمة تاع رجال قالتو ارواح اخدم ارض جدودك خيرمن تبقى عند البراني قالها عاجبتني اجدة سكتت عليها وبقات مركزة معايا تكيل فيا من الفوق لتحت دخلو خياتي وسلمو عليهم وهي تسقسي على شيماء شحال عمرها وعلاه مشي متحجبة شفت انو نساهم ميهدروش بزاف قلقوني حتى نلمح في شهرة جاية من البعيد ودمعتها على خدها هي تكون خت حبيب الكبيرة عندها 27 سنة مكملة قرايتها وتخدم استاذة فاتت عليا حكمتها قتلها واش كاين قالتي راح يزوجوني يا أسيل قتلها وااش قالتي ولله ودخلت توال جدة تسلم عليها قعدتها تمس في يدها وتقولها شغل الدار مهوش مطبوع على هذو اليدين الكسرة شكون يعجنها والشخشوخة شكون يدلكها والطعام شكون يفتلو زادت جبدت شيماء تشوف فيها قالتهم بناتكم مشي تاع شغل قتلها حنا تاع قراية وبس خزرو فيا كامل حاوزني بابا وقالي روحي جا ورايا حبيب قتلو وشبيهم هذو راح يزوجو ختك ونتا عارف قالي كلمة بابا واش ندير قتلو متقوليش عمي قابل قالي ايه قتلو واااش منتيك قالي ولله مراني نزيد عليك قتلو حبيب ختك تتزوج ثما وهي قارية واستاذة قالي معندي ما ندير يا اسيل دورت وجهي عليه قرب باسني من خدي قالي لعميرة تاعي وشبيها قتلو منيش مرتاحة ليهم خاصة العجوزة تخوف قالي تخافي وحبيبك هنا ااه قتلو غاضتني شهرة قالي ساهل كلش غير يروحو نتفاهمو هو خرج تكيت فوق الماطلة نشوف للسقف ونخمم في هدرة عجوزة النار كرهتها من ضك وغاضتني شهرة شوي هكا وسمعت الباب تحل دخلت منو هي اذكر القط ينط تقعدت من بلاصتي هي قعدت قالتي ارواحي هنا قتلها وي قربت منها حكمتني من يدي تشوف فيها قتلها واش تشوفي قالتي الشقا هارب منك يديك بيوضا وطرايا فرماج قتلها كيفاه زعما حكملتي وجهي تشوف فيا قالتي شحال عمرك قتلها 17 بعدي عليا صراحة خفت منها نضت وهي تهز راسها لعندي قالتي 17 سنة كنت قدك بزوج ولادي باباك وعمك قتلها حابتني نجيب زوج ولاد مثلا ؟؟ منين نجيبهم بلويفي ولا وااش ناضت عاونتها قالتي جدك مريض ويحوس عليكم تحضرو كامل قتلها انا راني نقرا وعندي الباك قالتي فلخر القراية ما تفيد ودار راجلك هي الصح قتلها هذي معلومة غالطة اجدة كيلتني من لفوق لتحت وخرجت طليت من الباب خرجو كامل وبابا ولخرين خرجو معاهم يودعو طريق السد لي تدي ما ترد عاودو دخلو وشهرة ولات تنوح وتعيط وتقطع في شعرها خرجت ليها نجري قتلها اشش هبلتي دخلو هوما وعمي جا ليها قالها ابنتي وشبيك قالتو انا نتزوج بهذاك الطفل منيتك انااااا نتزوج معاه راه بمرتو  يا بابا قالها ايه علابلي بصح بنتي جدك مريض حنا ميهونش علينا تخافي يموت وهو غاضب قالتو خليييه يموت خليه عوام كامل غاضب عليكم وضك حب يضحي بيا باه نتزوج حفيدو ونجيبلو لولاد الله يلعنهم هذو العايلة من بكري نكرهم وزيد نتزوج سليم لي جامي تفاهمت معاه ناض من بلاصتو قالها خلاااااااص تقبلي وتبلعي وليتي تقابحي باباك ولا وشنو راح بابا يصلح في الاحوال وانا واقفة نشوف زاد دخل حبيب درت لمرت عمي قتلها متخافوش ربي قالتي واش ندير يا اسيل دخلت للشمبرة غلقت الباب على روحي وقعدت حكمتني غصة في قلبي كيفاه شهرة راح تتزوج بسيف عليها غاضتني وزيد عمي قابل ... فاتت سمانة على هذاك الحال سماط كلشي كل واحد.حاكم شمبرتو نتلاقاو في العشاء ولا الغدا ( ساكنين مع بعض مام الكوزينة وكل واحد بشمبرتو ) كنت لاهية مع القراية والتحضير للباك زاد لحق فوتو ... ايامات تاع تعب جازو عليا وسمعت من ماما بلي بابا وعمي وحبيب راحو شافو جدي وقالك راه تاعب بزاف قلت الله لا يردو المهم يخطونا وزادو اكدو بلي يتزوج سليم هذا بشهرة ساءت حالتها وكل يوم تبات تبكي تصبح عينيها منفخين حتى للنهار لي سمعنا فيه بلي جدنا مات فرحنا انا وشهرة بسك قلنا صاي عمي مراحش يجبدلها على الزواج مام الجنازة محضرناش قعدنا في الدار انا وهي راحو ماما ومرت عمي وبابا وعمي وخياتي ومام حبيب فاتو ليام على هذاك الحال ولحق النهار لي تبان فيه النتيجة تاع الباك كانت صدمو بنسبة ليا مجبتوش مام ماما بابا كامل تصدمو كيفاه انا لي موالف نجيب المعدل 18 ديت 7 في الباك صدمة عمري لي جامي ستنيها بصح صبرني بابا قالي عاوديه وصاي بنتي قالتو ماما هذا الشي مشي نورمال قالها معليش مكتوب دعيت ربي وقلت كل عطلة فيها خير .. حتى لوحد النهار قالنا بابا جداكم عيطت وقالت ارواحو لعندي قتلو منروحش للريف انا قالي تروحي بسيف وداني صح ... صباح على 9 سمعت ماما تنوض فيا تقلبت قتلها واش قالتي بنتي نوضي نروحو لدار جدك زادت نوضت شهرة ولبنات قتلها منيش حابة قالتي تروحي قتلها وحبيب ؟؟ قالتي ايه يروح جداك طلباتو قتلها اوكي معليش هزيت روحي غسلت فطرت وروحت حليت الخزانة نشوف واش نلبس جبدت سروال جين وشوميز زرقة لبستهم مشطت شعري يعني انا عادية في الزين شعري قصير كيما بيناروس من نهار قطعتو مزاد كبر عينيا مارو بشرتي خمرية فيا لطاي تاعي صح شابة جاية رقيقة منبعد عريضة الطول منيش طويلة بزاف ونشبه لعايلة ماما اما خاوتي يشبهو لعايلة بابا خاصة شيماء تقوليها الياقوت .. كملت وهزيت شوي مكياج درتو منبعد معجبنيش شعري قلت لشهرة تمشطي كشما حاجة خزرت لروحي قتلها تتسمخري بيا اني نشبه لامنحوتب الرابع ( الكراش تاع الصغر 😍 ) ناضو يضحكو هي وشيماء ودارتلي حاجة سامبل حكمتلي شعري لور وقطعتلي لاماش هبطتها على جبهتي شفت روحي وليت شابة هزيت البارفا عمرت روحي وخرجت لاقاني حبيب لابس وضارب الحطة قتلو واش اسيدي حبيبي وقيل راح تتزوج وانا لا خبر قالي ونتي وقيل راح.تتخطبي شوفي تدخلي تنحي هذا الخماج لي لابسة خرج بابا من الشمبرة ووراه ماما قالنا واش كاين حشمت منو خاصة اني كبرت وهي يعرف قصة حبنا دخلت هزيت صاكي وتلفوني لبست باسكات توال الباب وراح عمي جاب الكار لي تدينا ركبنا كي الخرفان وروحنا طول الطريق وانا حاسة بقلبي يوجع حطيت يدي عليه اهداي اسيل فيقتني كوثر كي قالتي اعطينؤ تلفونك درت ليها قتلها طيري راهي هابطة الباتري بدات تبكي وراحت لبابا .. خرجنا من المدينة للريف الشمس تصرع والسخانة غير تزيد درت لبابا قتلو وقتاه نوصلو هذي سخانة الجمل يدموندي قرعة كوكا ديجا فكرتني في الكوكا يا بابا سخفت عليها قرعة باردة قالي نوصلو لدار جدك .. واخيرا بدينا ندخلو للبلاصة تاعهم بابا كان يقولي شوفي اسيل هذو كامل تاع جدك وجداك وعمومك قتلو اوو ونتا بابا قالي راكي عارفة باباك وزهرو بقيت مخلوعة من الاراضي لي عندهم الحيوانات لي عاطينهم للناس ترعى بيهم خير كبير اللهم لا حسد بانولي ديار على طول الطريق كل مرة نقول هذي هيا فلخر باه وصلنا فيلا كبيرة باج كامل فيها قداه من ايطاج توالها بير كبير والشجر دايرين بيها قالي هذي هي دار جدك قتلو امم الله يبارك هبطنا وشهرة تقولي يا يما كنت راح نتزوج هنا قتلها اسكتي برك كنت راح نلقاك تحلبي في المعزة صباح وهازة خمس ولادك وزيد اونسانت سمعتني مرت عمي ناضت تضحك شفنا الباب تحل خرج عمي لي جا المرة لي فاتت قالو مرحبا خاوتي سلمو على بعضاهم وزيد علينا قالنا مرحبا لبنات هيا دخلو شفت حبيب حكمني من يدي قتلو احشم رانا توال بابا قالي هاتي بوسة نطلقك قتلو يا الكشفة وليد الحرام حاب على موتي تبوسك جرانة ميتة امشي تشوف طلقتو وهو فاسخ بضحك دخلت انا الاولى نجري خبطت في عبد طلعت راسي لقيتو عمي الثاني قالي هذي نتي بنتي سلمت عليه وشراكي قتلو لباس ونتا قالي حمد لله ادخلي راهم في الحوش هزيتلو براسي وروحت دخلت نمشي كولوار طويل فيه شي سبعة بيبان خرجت ليا مرا صغيرة في العمرة شي 28 هكاك قد شهرة قالتي سلام شكون نتي ؟؟ قتلها جيت سياحة ختي هزت حاجبها قالتي سيريو قتلها انا بنت عمكم فلان ونتي كي قلت هكا وجها رجع اصفر مع هي بيضة بزاف دخلت بلا هدرة ستغربت من هذي الجاست حتى سمعت صوت ورايا قالتي جيتي يا طفلة درت ليه شكون من غيرها الياقوت قتلها لالا مزال تخنزرت فيا روحت سلمت عليها قالي وشنو هذي اللبسة جيت نهدر دخلو لخرين راحت سلمت عليهم كامل وانا نشوف من ومن درت يديا ورايا نمشي ونستكشف في الدار طلعت دروج تاع حطب عجبوني يشعلو الضو كل درجة تطلع فيها كملت لفوق بلا ما نفيق لقيت روحي في الايطاج اللخر فيه فوطوات بزاف تاع شيخ مع الياقوت ومع عمامي عرفتو جدي زدت مشيت للبالكو لي ثما حليت الباب حتى نلقى طفلة قاعدة وتبكي تكون شي 7 سنين عقدت حواجبي قتلها صغرونة كي شافتني طارت حطت يديها على فمي قالتي اششش بعدتها قتلها وشبيك متخبية هنا وكيفاه غلقتي الباب علابلك متقدرش تحليه قالتي راني زعفانة قتلها من واش قالتي ماما ضربتني قتلها وعلاه زعما قالتي سمعتهم يهدرو وانا بقيت نوقب انا كي كشفتني ضربتني قتلها شكون سمعتيهم يهدرو قالتي مع papa قالتو راح تتزوج طفلة قد بنتك حطيت يدي على فمي قتلها اسكتي اسكتي الهدرة تاع الكبار مشي مليحة قالتي وسمك نتي قتلها أسيل حلت عينيها فيا قالتي انا ثااني اسمي اسيل وطارت حضنتني ضحكت قتلها هيا خلينا ندخلو قالتي ارواحي نوريلك شمبرتي دخلتني غير ثما في الايطاج شمبرة كبيرة وطفلة راقدة قتلها شكون هذي قالتي ختي جبدتلي الالعاب تاعها وانا نشوف صونا تلفوني كان بابا هزيت عليه قالي وينك قتلو لفوق مع طفلة صغيرة قالي ارواحي تتعرفي على عايلتنا ازربي ديجا دخلتي ووليتي تعرفي الدار قتلو اوكي كوبيت ونضت قالتي وين مروحة قتلها نهبط قالتي نجي معاك حكمتني من يدي وجينا خارجين تحل باب الشمبرة لي مقابلتنا راحت تجري ليه قالتو papaaa هزها في السما كان راجل في الثلاثينات ولا اقل لابس سيرفات في البلو عينيه كحولا نايمين وسمر عندو ضربة في وجهو تبان جرح بصح قديم قالتو راني تعرفت على أسيل وهي تكون صحبتي الجديدة خزر ليا مش نورمال حطها وهبط بلا ما يهدر ........

الحلقات القادمة .....

" راح تتزوجي وليد عمك وتجيبي طفل للعايلة يكون هاز اسمنا ملينا من لبنات وحكايتهم واذا مكيش حابة ساهل نزوجو ختك ما أحنا تزوجنا على الصغر بقيت مشوكية فيها كيفاه  تهدر ......."