قواعد الجنس العشر 🔞

الثامن والاخير 🔞🔥

💥 قواعد الجنس العشرة 💥
بقلم: Basma Mokhtari & Nohaila Atzli
الفصل الأخير 🌃 الليلة الأخيرة 🌃
بارت 71:
سالات العراضة فوقت متأخر و خوات الدار نسبيا و طلعت ياسمين لبيتها هي و مارك ترتاح لبست بيجامتها و مسحت المكياج و تكات فوق الناموسية شوية جا مارك حتى هو ناشط
ياسمين فرحانة ليه: باينة دوزت ليلة زوينة
مارك: اه صراحة فينما كتجي لهنا مكنسخاش نمشي و كنولي واحد آخر
ياسمين: yes I noticed ( اه لاحظت هدشي)
مارك حيد التيشرت و تكا حداها: و باش نكون صريح معاك أكتر أنا مكنجيش لهنا بزاف حيت كنولف هاد الاجواء و كتجيني صعيبة نرجع للوس أنجلوس للروتين و الوحدة
ياسمين: يعني نتا كتحاول تبعد من عائلتك باش متعلقش بيهم و فين يجي وقت الرجوع متقدرش ترجع
مارك: كنتأزم نفسيا
ياسمين: صراحة كنلومكش أنا هدي أول مرة ليا و تعلقت بيهم و عجبني الحال عساك نتا لي ولدهم و تبارك كلهم كيبغيوك و مرتبطين بيك
مارك: اه كنت كنسحابهم غدي ينساوني و ميبقاوش يتسوقو ليا مع مكنتواصلش معاهم بزاف ساعة كل مرة كيستقبلوني بحرارة أكتر من المرة الفايتة حتى كنحشم
ياسمين: علاش تحشم بالعكس خاصك تعرف بلي نتا عزيز و غالي و متقطعش معاهم الاتصال
مارك ضار عندها: عندك الحق.. هي قلتي عجبك الحال هنا؟
ياسمين قادت الجلسة بحماس: بزااف و مكرهتش نبقا هنا عمري كامل و اكيد نتا معايا
مارك: نتي عارفة هدشي شبه مستحيل منقدروش نخليو املاكنا و حياتنا و كلشي لينا فأمريكا و نسكنو هنا
ياسمين: معرفتش أنا غير كنعبر ليك على باش كنحس دابا
مارك لمس خدها: عارف و حتى كنحس بنفس الشي.. المهم ارتاحي ليك و نعسي مزيان غدا غير نفطرو نخرجك ضوري شوية فالمدينة و تعرفي عليها
ياسمين رجعت تكات : اوك حبيبي تصبح على خير
مارك غطاها و حط ايدو تحت راسو: و حتى نتي
فاقت على صوت رشاشة الدوش و عرفت بلي مارك غدي يكون ناض و كيدوش.. ناضت و رتبت السرير شوية حست بالدوخة و دخلت تجري للدوش كتقيا و مارك كان داير الستارة مكيشوفهاش غير كيسمع فيها
مارك: love are you okay؟ ( حبيبة نتي بخير؟)
ياسمين: نو متخلعش هدشي عادي فالحملits the morning sickness ( الدوخة الصباحية)
مارك وقف الرشاشة و مد ايدو للفوطة لواها على نصو التحتاني و حيد الستارة لقاها كتسغل فمها و طرف حالتها.. باسها فالخد و خرج و هي بقات كدير روتينها الصباحي.. لبس لباس ديال الخروج و فنفس الوقت مريح و هي لبست شوميز بحال كسوة قصيرة حزمتها بسمطة و معاها ليبة كحلة مكتبينش لحمها.. هبطو التحت سلمو على أمينة و خالاتو حورية و جميلة (لي مريضة نفسيا و لي مقابلها أمينة)
حطت ليهم حنان الفطور لي جلست تبات هي و ماماها (حورية) طبعا الطبلة مشكلة بگاع الرغايف المغربية و الحلويات و الكيكات.. كلات ياسمين شوية حيت فالصباح كتكون باقي شادة فيها الدوخة و الشهية مكايناش و هدشي شرحو ليهم مارك و وصاهم ميكتروش ليها الماكلة الدسمة و يقوي من الخضرة و الماكلة الصحية
حورية كضرب فالمسمن: الموحمة اولدي مكتعرفش هدي تنفع ولا ضر كتتبع غير دكشي لي كتشهى و حنا مخصناش نحرموها من دكشي لي كتوحم عليه بغيتها تخرج فالولد؟
أمينة: علاش كاينة شي ماكلة كضر؟ كلشي كينفع خلي البنت تاكل و دير ما بغات ( شافت فياسمين) أنا جبتك لعندي باش لي توحمتي عليها نطيبها ليك و باش نتهلا فيك متسمعيش لكلامو و قتلتي راسك و الولد بالجوع
ياسمين: مارك غير خايف عليا و صافي اما انا صراحة مكنتشهاش بزاف ديال الحوايج الا كترت غير طاجين ولا شي شلاظة مغربية باردة و مرة مرة كنتوحم على شي حاجة حارة
أمينة: گاع لي تبغي أنا نوجدو ليك اكبيدتي لهلا يحوجك
مارك: صافي تكاترتو عليا.. زيدي اياسمين خليني ننساحب على تاكلوني و شكون يعتقني
حنان ضحكت: أنا نعتقك اولد خالتي الله ينعل بو الوقت
أمينة شافت فيها: لا تسبو الدهر فإن الدهر هو الله
مارك: ها هي تبدلت للموعظة و الفتوى
حنان: دار الإفتاء شخصيا.. سير اخويا ساري مرتك فالمدينة
مارك باس راس أمينة و خرج هو و ياسمين مشادين ايد بعضهم💥 قواعد الجنس العشرة 💥
بقلم: Basma Mokhtari & Nohaila Atzli
الفصل الأخير 🌃 الليلة الأخيرة 🌃
بارت 72:
توادع مع عائلتو و واعدهم بلي غدي يرجع فالقريب و ياسمين قررت توصلو للمطار و تبقا معاه حتى يركب و كان معاهم خالد و عصام أقرب الأشخاص ليه
خلاو حتى قرب النداء و هوما يخرجو مخليينو على راحتك مع مرتو و هو استغل الفرصة باش يهدر معاها فموضوع كيخصهم بجوج و لي كان شاغل تفكيرو من النهار لي جاو
مارك: ياسمين بغيت نسولك و لكن جاوبيني بكل صراحة و من قلبك بلا مجاملات
ياسمين عقدت حواجبها: ياك لباس؟
مارك: الا قلت ليك نسكنو هنا المحمدية بقية حياتنا شنو تقولي؟
ياسمين: بلاتي واش غدي نستقرو هنا؟؟
مارك: شفتك تعلقتي بهنا و بعائلتي و حتى الواليدة كنا أنا و هي كنهدرو هاد الصباح و اقترحت عليا نشريو شي دار ولا فيلا هنا و نكونو قراب منها
ياسمين: واو مارك هدا أحسن اقتراح أنا بعدا موافقة عليه و مستعدة من هاد اللحظة نبيع املاكي كلها فأمريكا و نستقر هنا
مارك: يعني ما عندك حتى مشكل؟؟
ياسمين: بالعكس أنا من الاول بغيت هكا و لكن نتا كنت رافض و قلت بلاش ما نحرجك
مارك: صراحة هاد القرار ماشي غير جيت و خديتو راه خدا ليا وقت كتير نفكر فيه و درت حساباتي و شنو يصلح ليا و شنو لي لا و حتى ولدنا فكرت فيه كيفاش غدي يكبر و فين و مع من لقيت بلي أمريكا ماشي مناسبة ليه
ياسمين: كيفاش؟
مارك: أنا نويت نتوب كيما نتي تبتي و وليتي كتصلي و تقربي أكتر من الله
ياسمين تشوكات و دمعو عينيها: يعني صافي قررتي..
مارك: اه و نتي كنتي وحدة من الأسباب لي خلاتني نقرر هاد القرار يمكن ليك تقولي زدتي حفزتيني
ياسمين: ممكن تشرح ليا اكتر؟
مارك: فين كنتي معايا فالصبيطار و كل نهار كتقراي القرآن قلبي كان كيسمع ليك واخا كوبين ليك ممسوقش و أكتر سورة قريتها بقات راسخة ليا فراسي و حفظتها " و الضحى و الليل إذا سجى ما ودعك ربك ولا قلى ولا الاخرة خير لك من الأولى و ليس يعطيك فترضى ألم يجدك يتيما فأوى و وجدك ضالا فهدى و وجدك عائلا فأغنى فأما اليتيم فلا تقهر و أما السائل فلا تنهر و أما بنعمة ربك فحدث
ياسمين كتقرا معاه و عينيها مغرغرين السعر بدنها و تخلطت ليها الفرحة بالدموع
مارك: هاد الآية كتعلم الواحد ميكونش ناكر الخير لي عاديه الله و أنا ناكر للخير فشحال من حاجة أولا فين مات الواليد ديالي و بقيت بوحدي و قريب نخسر كلشي الله صيفط ليا باباك عاوني نوقف على رجليا حتى وليت على هاد الحال لي أنا فيه دابا فلوس و أملاك و بدل ما نشكر الله دوزت حياتي كندير الحوايج لي تغضبو.. تاني حاجة فين شفت الموت بعينيا و عطاني فرصة باش نعيش و لي كانت معجزة متعلمتش منها و تقربت منو و فين عطاني وحدة بحالك كتبغيني و مستعدة دير أي حاجة على قبلي واخا كانت غدي تقتلني و عندها الصح حيت أنا واحد ميسواش و نستاهل القتل بدل ما نحطك فعينيا عاملتك خايب و هنتك و دابا فين حملتي و غدي نولي أب مزال ما بغيت نحشم و نحمد الله و مع ذلك الله مغرقني فالنعم عطاني عائلة كتبغيني مرا فجنبي فكل الأوقات و الفلوس و حياة مزيانة ما خاصني والو جا الوقت لي ندير اقل حاجة و هي نكون ممتن.. أنا عارف الله معندو ما يدير بأعمالي حيت قلها فمصلحتي أنا اما هو غني عنها و لكن بغيت نتوب و نتقبل منو و نولي مسلم بالفعل ماشي بالاسم و نشكرو على گاع لي عطاني و نعيش حياة متوازنة خالية من الحرام و من أي حاجة سلبية و بلا معنى
ياسمين ترمات فحضنو: هدا أحسن خبر كنسمعو اليوم حاسة بلي الدنيا ما قادنيش امارك!!
مارك: بقاي عيطي ليا عمر واخا مكنحملش هاد السمية
ضحكت وسط دموعها: بويا عمر هههه
مارك: المهم هاد الهدرة غدي نطبقها من هاد اللحظة و بغيتك تعرفي بلي واخا غدي نطول فأمريكا معمري غدي نشوف فبنت أخرى من غيرك بغيتك تيقي فيا.. غدي نبيع أملاكي لي تماك و هدشي غدي ياخد الوقت
ياسمين: فين نرجع للدار غدي نصيفط ايميل للمحامي ديالي باش يعرض الفيلا و الشركة للبيع
مارك: لا نتي ديالك حتى تسالي ليه و تمشي لأمريكا💥 قواعد الجنس العشرة 💥
بقلم: Basma Mokhtari & Nohaila Atzli
الفصل الأخير 🌃 الليلة الأخيرة 🌃
بارت 73:
وصل للوس أنجلوس و كان فاستقبالو صاحبو جوني لي وصاه يتسناه و هوما غاديين فالطريق اقترح حونؤ يوقفو فشي بار و يشربو ليهم شي حاجة كيفما كانو موالفين و مارك رفض
جوني مستغرب علاش رفض: why؟ (علاش؟)
مارك ساهي فالطريق: I don't drink now.. I quit ( مبقيتش كنشرب دابا.. قطعتو)
جوني: since when؟ ( من ايمتى؟)
مارك: for a while ( من مدة)
فعلا من نهار لي دخل الصبيطار ولا قطرة من الشراب دخلت فمو حتى لدابا و هو ناوي يقطعو فمرة و ميبقاش يضور بيه
جوني مبقاش سولو و وصلو للفيلا بلاما يدخل حيت عارف مارك جاي عيان و غدي يبغي يرتاح و هو مدوز نهار و ليلة بين الطيارة و ختها
دخل مارك الفيلا خدا دوش و سخن ليه شي حاجة سريعة ياكلها و مشا ينعس واخا يلاه الليل فأوله بحكم منعسش مزيان البارح
صبح الحال صاوب قهوة و بدا فالخدمة و الاتصالات مبغاش يضيع الوقت و يتعطل على ياسمين بغا يسالي كلشي و يرجع ليها قبل ما تولد
هدر مع المحامي ديالو و مستشاريه لي تصدمو من القرار المفاجئ و لكن احترموه و بداو عملية البحث عن مشتري.. سالا اتصالاتو و عرض الفيلا ديالو للبيع فالانترنت و وصا واحد الاجونس تقلب على شاري بالشروط لي بغا هو
دوز الصباح كامل و هو خدام فالبيسي و من بعد مشا للشركة قاد مسائلو المعلقة و عقد اجتماع باش يعلم گاع الموظفين بالقرار و الأسباب ديالو.. داز كلشي مزيان و الموظفين كانو متفهمين واخا بقا فيهم الحال و كل واحد ودعو بكلام مؤثر
كمل شغلو فيها و تلاقا بالمحامي تناقش معاه فموضوع البيع و عرض عليه وحدين كيقلبو على فيلا بنفس المواصفات ديالو و دوز العشية كاملة معاه يدرسو الموضوع و فالاخر متفاهمش مع أي شاري فيهم و هو يرجع للدار
اول حاجة دارها قبل ما يرتاح أو ياكل صونا على ياسمين لقا راسو توحشها بزاف و محتاج يسمع صوتها.. لقاها فأحسن حال و ناشطة و هدشي خلاه يرتاح
ياسمين: خاصني غير هنا ترجع ليا و صافي
مارك: أنا عاد جيت بلاتي حتى نسخن بلاصتي بعدا
ياسمين: مبغيتكش تسخنها خليها باردة
مارك: بان ليا غدي تسخن مزيان
ياسمين: متقوليش غدي تعطل
مارك: يمكن.. ماشي ساهلة تبيعي شركة قدها قداش خاص بزاف ديال الإجراءات
ياسمين: المهم بقا طل متغبرش
مارك: منقدرش حيت فأي لحظة نلقاو شاري و نكون أنا فالمغرب يصدق كلشي مضروب فالزيرو
ياسمين: و لكن الا شفت راسك غدي تعطل بزاف رجع و خلي حتى نولد و نرجعو بجوج
مارك: ان شاء الله
ياسمين: صليت؟
مارك ضرب جبهتهو: نااري فكرتيني كنت ناوي هاد العشية نمشي للجامع نهدر مع الإمام و نبدا الصلاة.. ساعة المحامي شدني عندو العشية كاملة
ياسمين: ايوا غدا قبل ما تمشي للشركة سير للجامع و هدر معاه و أنا نفكرك
مارك: علم الشاف ديالي
قطع معاها و شد نوامر گاع لي كيعرف و كان كيتلاقا بيهم بلوكاهم و مسحهم من التلفون و وقف عند نمرة فاليري للحظة.. و فجأة صونات عليه حاجة مكانش متوقعها دابا نهائيا و هي من آخر نهار شافها فيه ما هدرتش معاه.. جاوب بتردد و ندم علاش جاوب حيت واعد راسو و ياسمين قدام الله يبعد على البنات نهائيا
فاليري: hey I am sorry I didn't call before (هاي سمحلي حيت معمري هي عيطت ليك من قبل)
مارك الحوار بالإنجليزية: هاي شنو بغيتي؟
فاليري: كيفاش شنو بغيت؟ بغيتك نتا أنا عارفة مقصرة معاك و لكن من داك النهار لي جاوبتني مرتك مبغيتش نجبد ليك الصداع و قلت حتى تبان بوحدك ساعة مبقيتش شفتك
مارك: فاليري عفاك نساي هاد النمرة و متبقايش تاصلي بيا أنا كنبغي مرتي و علاقتنا تحسنت
فاليري سكتت شوية و رجعت تهدر: واو مزيان هدا خبر زوين
مارك: عارفك متبغيش علاقتي بمرتي تدمر بسبابك و نتي كنتي قلتي ليا من قبل بلي مبغيتيش تكوني سبب المشاكل بيناتنا
فاليري: اه و مزال عند وعدي بسلامة امارك كنتمنى ليك حياة سعيدة مع الناس لي كتبغي
قطعت بلاما تسمع جوابو و كانت هدي آخر مرة يسمع فيها صوت فاليري💥 قواعد الجنس العشرة 💥
بقلم: Basma Mokhtari & Nohaila Atzli
الفصل الأخير 🌃 الليلة الأخيرة 🌃
بارت 74:
دازت أيام فشهور و تأقلمت ياسمين فعيشتها الجديدة مع عائلة راجلها لي دارت بلاصتها وسطهم و عرفتهم واحد واحد و حتى هوما تقربو منها و ولات علاقتها بيهم قوية.. كانو بنات خال مارك كل فترة كيخرجو بيها يضورو ولا يديرو الشوبينغ و أمينة مكتخليها دير حتى مجهود و دابا ولات فالشهر السابع خاصها تقلل من الحركة و ترد البال.. داز عليها الوحم صعيب شوية و لكن الحمل كان اصعب منو رجليها كيتورمو و كرشها كلما كبرت كلما كتقل عليها واخا صغيرة و لكن هي متقدرش على الاقل حيت بنيتها ضعيفة.. تبعت مع طبيبة فالمحمدية و ارتاحت ليها و هي لي غدي تولدها و اتفقت معاها متعلمهاش بجنس البيبي و تقولو غير لحنان لي اقترحت عليها دير حفلة يعرفو بيها جنس البيبي فين يرجع مارك و يديرو مفاجأة ليهم بجوج.. حنان تكتمت على السر و بدات توجد الحفلة بعيد عن ياسمين و فين عرفو مارك باع الشركة و الفيلا و قطع لنهار معين كملو وجدو كلشي ليلة قبل و بداو فالديكور.. خلطو الأزرق مع الغوز جابو نفاخات و زينو الصالون و ياسمين غادية جاية جاها الفضول تعرف جنس الجنين
الغد ليه جاب عصام و خالد مارك من المطار و وجدو البنات كلشي فوق طابلة طويلة و تجمعت العائلة.. لبست ياسمين كسوة طويلة فالغوز بارد كتبري و دارت مكياج جات كتحمق كالعادة و انضمت للعائلة تتسنا على أحر من الجمر
و بعد طول انتظار جا مارك و استقبلوه بحفاوة و على راسهم ياسمين لي توحشاتو فوق القياس و مبغاتش تعرف جنس البيبي حتى يرجع.. بدات الحفلة و الكل واقف يتسنا النفاخة لي غدي يطرطقو اشمن لون فيها ازرق ولا غوز خداوها بجوج و ياسمين متشوقة أكتر منهم تعرف و حنان كتصور فيهم
طرطقو النفاخة و كانت الصدمة اللون الغوز يعني بنت!
فرحت ياسمين حيت هدي هي كانت امنيتها و حتى مارك كان عاجبو الحال واخا تمنى ولد و لكن كان راضي بالكتوب و فرح فين شاف ياسمين و أمينة ما عاطيين فرحتهم لحد
احتفلو جميع و فرقو الطارطة و طلقو الموسيقى كلشي ناض يشطح و كان أفضل نهار بالنسبة ليهم
جمعو البنات الروينة و جلسو العائلة يباركو للكوبل و من بعد كلها مشا لدارو بعد يوم حافل.. استأذن مارك منهم و خدا ايد مرتو طالع بيها لبيتهم بغا يبوسها يعنقها و يدوز وقت خاص معاها و دكشي لي دار
حيدت كسوتها و لبست تريكو حدو مغطيها من الفوق و تكات فحجرو و هو كيلعب فشعرها
ياسمين: حبيبي نتا فرحان حيت غدي تولي عندنا بنية ياك؟
مارك: معلوم فرحان علاش ما نفرح و أنا غدي تجيني ياسمين صغيرة و تنور حياتي؟
ياسمين: معرفتش حيت كنت قلت ليا مكرهتش تولدي ليا وليد
مارك: اه و لكن الله كتب علينا بنت و أنا المهم عندي غير الصورة الكاملة و المرة الجاية يولي عندنا ولد
ياسمين: ان شاء الله.. عاود ليا شنو درت فأمريكا
عاود ليها كيفاش باع الفيلا و الشركة و كيفاش ولا ملتزم فدينو و كل فرض كيصليه فالجامع حتى ولا موالف و مبقاش كيفوتو وقت و كيفاش دوز 5 شهور كلها بلا بيها و لي كانت بالنسبة ليه اطول فترة حيت هي ماشي معاه و كيفاش تبدلت علاقتو بمريم و حمزة لي كان يوميا يعرضو عليه يتعشا معاهم و يدوز مع الدراري وقت كينسيه الوحدة و تعب الخدمة
و هي عاودت ليه كلشي طرا ليها فغيابو بالتفاصيل و لاحظ السعادة لي هي فيها و عرف بلي قرارهم كان فمحلو بجوجهم كانو محتاجين هاد التغيير الجذري فحياتهم و كيفاش نفسيتهم رحبت بهاد التغيير
بقات كتعاود ليه حتى نعست فحضنو و هو كيستمع لأنفاسها و مبتسم ساهي فملامحها البريئة كتبقا بالنسبة ليه أطهر و أصدق وحدة و معمرها تتبدل و هو كيحاول بكل ما فجهدو باش يحافظ عليها و ميخليهاش ضيع من ايديه حيت مستحيل يلقا بحالها.. هي الجوهرة الثمينة ديالو مالكة قلبو💥 قواعد الجنس العشرة 💥