الوصب

2

"تبين الصدق؟" دانة قالت بعد ما اخذت رشفة من قهوتها الحارة اللي بعكسي كانت باردة ومع حليب ، أومأت عليها وانا انتظر الرد

"امورها مستتبه ، ما عليها خوف واللي سمعته انها مو مرتبطة ، ممكن انها للحين تحبك مثل ما انتِ تحبينها"

" وش مصدرك؟"

" نورة" قالت بغمزة ، ابتسمت و وجهت نظري للكوب اللي بيدي

_______

كان فعلا يوم مجهد ليارا ، هي من زمان ما اشتغلت مثل كذا ، دخلت بخطوات ثقيلة للقصر وما تفكر الا بسريرها

"لحول انتم ما عندكم بيوت؟" قالت تمثيل للانزعاج لما شافت عيال اخوانها

"والله طفشانين وقلنا ما لنا الا يارا" قال سعود وهو جالس على الكنب

"رح غير ملابسك ليه لابس البدلة؟ بروح ابدل و بعدها نطلع ، تبون نلعب بادل؟" سألتهم ، وكلهم اتفقوا معها

" تم ، من زمان ما جلدتكم " قال عمر وهو يقوم

"يلا كل واحد على بيته" قالت بضحكه ، ما تحب تكسر بخاطرهم لانها من زمان ما شافتهم وتحس انها ظالمتهم

"متأكدة تقدرين؟" سألتها نورة اللي كانت مستندة على الجدار

"ان شاءالله" قالت و ابتسمت بخفة وهي تضغط على زر المصعد

"اصبري لي بجي معك ، ريما روح غيري ملابسك و تعالي انا باخذ من ملابس يارا" قالت نورة لاختها اللي هزت راسها بتأفف و طلعت من الباب الخلفي

"والله وجهك شين" قالت نورة في المصعد

"بسم الله علي ، انا ملكة جمال العالم" قالت يارا بغرور وهي عارفة ان قصد نورة ما كان عن الجمال ، المقصود هو تعبها

"بس بالنسبة لنجد" قالت نورة بدون قصد و الواضح انها زلة لسان ، سكتت يارا وهي تحس ان قلبها يتقطع لأجزاء

"اسفة ما كان قصدي" قالت نورة بفزع وهي تشوف تغير الملامح في تعابير وجه خالتها

"لا عادي" قالت يارا بغصة واضحة وهي تحاول تبين ان كل شيء طبيعي ، نورة كانت تبي تتكلم زيادة بس قاطعتها يارا قبل تتكلم

"الله يعافيك قفلي الموضوع" قالت بهدوء وهي ماشية لغرفتها ، تنهدت نورة وهي تشوف وضع صديقتها المفضلة

بعد خمس دقايق طلعت يارا من غرفتها مخليه الباب مفتوح عشان نورة تقدر تدخل تبدل في حمامها