မာရှယ်ကြီးတို့အတွဲကပင် စုံတွဲအကဖြင့် ညဦးပိုင်းပါတီအား ဖွင့်လှစ်လိုက်လေသည်။ ထို့နောက်တွင်တော့ စုံတွဲတစ်တွဲပြီးတစ်တွဲ ၎င်းတို့၏မိတ်ဖက်များဖြင့် dancing area ထဲဝင်ကြ၏။ မမထံသို့ လက်ကမ်းလာသည့်အယ်လ်ဖာအမျိုးသမီးမှာ ငွေမှင်ရောင်ဆံနွယ်ရှည်များကို တစ်ခြမ်းထဲငါးရိုးကျစ်ဆံမြီးထုံးထား၏။ ထိုအယ်လ်ဖာအမျိုးသမီးမှာ အိုင်းဖို့ဒ်တက္ကသိုလ် နည်းပညာတက္ကသိုလ်၏လက်ထောက်ကထိကဖြစ်ကာ အိုင်းရစ်ရှ်မိသားစု၏ အကြီးဆုံးသမီးပင်ဖြစ်လေသည်။
အိုင်းရစ်ရှ်တို့၏ ရုပ်ရည်မှာအနောက်တိုင်းဆန်လှကာ မြင့်မားသည့်အရပ်နှင့်ခန့်ညားချောမောမှုကြောင့် အမျိုးသားဖြစ်စေ၊ အမျိုးသမီးဖြစ်စေ ထင်ပေါ်ကျော်ကြားကြလေသည်။ သို့ဖြစ်ရာ ရေးလ်၏အိုမီဂါသမီးကြီးထံ အိုင်းရစ်ရှ်၏ အယ်လ်ဖာသမီးကြီးမှ လက်ကမ်းလာသည့်အခိုက် ဧည့်ခံပွဲ၏အာရုံစိုက်မှုမှာ ထိုအတွဲပေါ် လုံးလုံးလျားလျားကျရောက်သွား၏။
မမမှာ ပါးနှစ်ဖက်ရဲတက်လာကာ ခြေမလှမ်းရဲရှာ။ လက်နှစ်ဖက်ကိုအပြန်လှန်ဆုပ်ကိုင်ထားလျက် မေမေနဲ့ဘတ်ဟျွန်းဘက်သို့ငဲ့စောင်းကြည့်၏။
"ဟိုမှာ စောင့်နေတယ် သွားလေ"
မမပခုံးတစ်ဖက်ကို မေမေက ကြင်နာစွာသိုင်းဖက်ရင်း အားပေး၏။
"အန်ဒရီယာ ဒေစီ အိုင်းရစ်ရှ်ပါ"
"ဟုတ် ယွန်နာ နေဆန်လ် ရေးလ်ပါ"
အိုင်းရစ်ရှ်ထံကမ်းလင့်လိုက်သည့် မမလက်ကလေး တုန်ချင်နေတာကို ဘတ်ဟျွန်း သတိထားမိသည်။ သူတို့မောင်နှမမှာ မည်သည့်အယ်လ်ဖာနှင့်မှ ထိတွေ့ဆက်ဆံဖူးခြင်းမရှိသလို လူကြားထဲ အခုလို လက်တွဲထွက်ဖို့ဆိုသည်မှာ စိတ်တောင်မကူးထားသည့်အးာများဖြစ်ကြသည်။
ဤဂလက်စီ အင်ပါယာ၌ အသက် ၁၂နှစ်ပြည့်လျှင် အယ်လ်ဖာမိသားစုများမှ အိုမီဂါမိသားစုများထံစေ့စပ်ကြောင်းလမ်းကြကာ အသက် ၂၀ပြည့်လျှင် လက်ထပ်ကြသည်မှာ အလေ့အထဖြစ်သည်။ အသက်ငယ်ရွယ်စဥ် စေ့စပ်ကြောင်းလမ်းသည်ဆိုခြင်းမှာ လူပျိုဖော်၊ အပျိုဖော်ဝင်ချိန်၌ ခံစားရသည့် စိတ်ပိုင်းဆိုင်ရာမတည်ငြိမ်မှုများအတွက် ကိုယ့်တွဲဖက်ပါတနာ၏ဖယ်ရိုမုန်းဖြင့် နှစ်သိမ့်ရန်ဖြစ်လေသည်။ သို့ဖြစ်ရာ စေ့စပ်ကြောင်းလမ်းပြီးတွဲဖက်ထားကြရာ ဖယ်ရိုမုန်းငြိမ်သက်တည်ငြိမ်ခြင်းနှင့်၊ စိတ်ပိုင်းဆိုင်ရာဖွံ့ဖြိုးတိုးတက်ရေး၌ များစွာအထောက်အကူဖြစ်သောကြောင့် ဤစနစ်ကိုကျင့်သုံးလာခဲ့ကြသည်မှာ ဘတ်ဟျွန်းတို့တစ်သက်ပင်ရှိလေပြီ။