𝗦𝗔𝗞𝗨𝗥𝗔 𝗟𝗮𝗻𝗱

P_8

တခြားသူတွေကို အပိုတွေပါဟု
နှာခေါင်းရှုံ့ခဲ့ဖူးသမျှ နဖူးတွေ့ဒူးတွေ့ကျမှ
ထိုလူတွေအပိုလုပ်နေတာမဟုတ်မှန်းကို
လူဆိုးလေးတဖြည်းဖြည်းနားလည်လာခဲ့ရသည်။

မနက်ပိုင်းတွေတိုင်းမှာ
တက်တက်ကြွကြွဖြစ်သလောက်
ည အိမ်ပြန်ခွဲခွာချိန်တွေကိုတော့
လူဆိုးလေးသိပ်မကြိုက်ခဲ့ပါ။

တစ်ခဏလေးခွဲရတာဆိုပေမယ့်သူလွမ်းသည်။
အိမ်ပြန်ရောက်ရင်
ဖုန်းဆက်သေးတယ်ဆိုပေမယ့်လည်း
အသံလှိုင်းသက်သက်မို့လို့ သူမရောင့်ရဲနိုင်ခဲ့။

ဖြစ်နိုင်ရင် ဒီဆိုင်လေးမှာပဲ
ပြောင်းပြီးလာနေချင်မိခဲ့တဲ့စိတ်တွေ
ဒီရက်ပိုင်းပေါက်နေခဲ့ပါသည်။

သူငယ်ချင်းတွေကတောင်
မင်းကအရမ်းပိုလာပြီလို့
ပြောလာကြပေမယ့်လည်း
ဒါဟာသူပိုနေခြင်းမဟုတ်တာကို
သူကိုယ်တိုင်ပဲသိသည်။

ယောကျာ်းမိန်းမတွေအပေါ် အပျင်းပြေ
အီရုံသာအီပြီး အတည်သဘောကျခြင်းမရှိခဲ့တဲ့
လူဆိုးလေးအတွက် လူတစ်ယောက်ကို
သေသေချာချာသဘောကျမိသွားတဲ့
အဖြစ်အပျက်လေးက
တကယ်ကိုကြည်နူးစရာကောင်းနေပြီး
ခံစားချက်အသစ်အဆန်းလေးတွေရနေခဲ့ကာ
သေချာတာကတော့
လက်ရှိခံစားချက်လေးတွေကို
သူသိပ်‌ကြိုက်နေမိတယ်ဆိုတာပဲ။

နေ့တစ်နေ့ရဲ့ည9နာရီဆိုတဲ့အချိန်တစ်ခုသို့
ရောက်ရှိလာခဲ့ပြန်ပြီး သင်တန်းလေးက
ထပ်မံ၍ပြီးဆုံးခဲ့ပြန်သည်။

သိမ်းစရာရှိနေတာတွေသိမ်းနေတဲ့သူကို
တွေတွေလေးငေးကြည့်နေမိကာ
အခုလိုခဏတာလေးပဲဖြစ်ဖြစ်တောင်
ခွဲခွာရခြင်းတွေမရှိတော့မယ့်နေ့ရက်တွေကို
မြန်မြန်ရောက်စေချင်နေပြီ။

-"ကဲ ဒီနေ့လည်းပင်ပန်းသွားပါပြီ
ဧည့်သည်လေး..."

နှစ်ယောက်အတူတူဖန်တီးထားတဲ့မုန့်လေးတွေကို
အိတ်လေးနဲ့သေချာထည့်ပေးပြီး
လက်ထဲထည့်ပေးလာသည်။

စစနောက်နောက်စကားလေးနဲ့
အမြဲတမ်းပြုံးရယ်နေတဲ့သူက
သူ့အတွက်တကယ်ကို အေးချမ်းရာအစစ်အမှန်ပဲ။
ဒီနယ်မြေလေးထဲမှာပဲ သူတစ်သက်လုံး
နေထိုင်သွားချင်မိတယ်။