قيود من فولاذ( قيد التعديل اللغوي)

مناقشة وشوية رغى

صباح الفل على الحلوين ، يارب كلكم تكونوا بخير 💙

عايزة أشكركم على الكلام الحلو والتشجيع والڤوت والحاجات اللي بنتناقش فيها بعد الفصول .. بجد وسط كل الظروف اللي كنت فيها كنت بتبسط أما أشوف كلامكم وأن الرواية عجباكم

حابة كمان أشارك معاكم شوية حاجات كدة

دي مش أول رواية كتبتها بس أول رواية انشرها للآخر وابقى عايزاها توصل لأني فعلاً عندي منها هدف .

الفكرة في الأول كانت نفسية بحت   و واخدة تايب التشويق والإثارة النفسية ،وكانت رُبى هى البطلة وشاهنده مجرد شخصية ثانوية ، بس في يوم سمعت بودكاست عن الثقافة الجنسية والصحية للست ومن هنا جت الفكرة .

عمري ما عرفت أتخيل شاهنده وجاسر كابل بيحبوا بعض وبينهم مشاهد رومانسية .. فأتمنى أكون عرفت أخليهم حلوين سوا .

أنا مش فيمينست ومش مع أن الست متساوية مع الراجل، بس مبحبش الضعف عامة لا في الستات ولا الرجالة .. مبحبش الست الضعيفة ولا اللي بتتنازل في كرامتها أو أحلامها  وحياتها وعايشة شمعة تحترق من أجل الآخرين .. ، مش كل الستات مستنية أمير ييجي ينقذها ويغير حياتها ، ومبحبش أن الست دايماً هى بس اللي تسامح وهى بس اللي تقبل ، ولا أنها دايماً خجولة والراجل مفيش منه   اتنين ، ودايماً غرقانة في شبر ماية من غيره .. من الآخر يعني  ، القلب الأبيض كالأطفال ده وإنها تسامحه عشان وسيم ويا حرام عنده ماضي مش عندي .

هدفي دايماً في كل الروايات  اللي  كتبتها وهكتبها  هو التربية .. لو الطفل أتربى في بيئة سوية قدر المستطاع وبقى عنده مساحة آمنة أنه يغلط ويعتذر  ويقع ويقوم وأنه مقبول و محبوب تحت كل الشروط .. نحتسبه ان شاء الله هيطلع بني آدم كويس .

تاني حاجة مهمة بالنسبة لي هى التوعية بالمرض النفسي ، النفس حاجة لازم نعتني بيها زى الجسم بالظبط ، ومش هرغي دلوقتي في النقطة دي كتير .

" قيود من فولاذ" كانت خفيفة وكل مشاكلها باينة في السرد والفلاش باك أو المرور الزمني ، شاهنده ست قوية عايزة تتعافى وعندها دعم من صاحبتها ، وجاسر أب كويس مدرك اضطرابه ومشكلته وبيتعالج  منه على مدار سنين .. جاسر راجل سوي ، ناضج ، حبه سليم ، ومسمسم 😂

شايفين الكلمتين اللي فوق دول ، انسوهم خالص بقى في الرواية الجاية ، واللي بعدها كمان .. لحد ما نوصل بالسلامة لرواية ابن المسمسم اللي ربايته حاجة قمر وعليها بوسة كدة .. مفيش جو أحنا ناس عاقلة وفاهمة مشكلتها أيه ده.

أخيراً أكتر من مرة حد سألني في الكومنتس عن اسمي وبعتتلي خاص ان ( آن) أسم أجنبي

آن هو أسم موجود في اللغة العربية معناه ( دلوقتي ) ، من بين معاني تانية كتير ، اخترته تحديدا عشان ليه  معنى خاص عندي ، بس طبعاً هو مش أسمي وأنا كاتبة كدة على صفحتي .

بصوا ..مش حاسة أني مستعدة أقول أسمي دلوقتي ، بس ممكن أجاوب على كام سؤال  ناس سألتني عليهم

سني ومجال دراستي ؟

أنا عندي ٢٤ سنة وكام يوم  كمان وهدخل ال٢٥

" أنا مش دارسة علم نفس .. بس بحبه جداً وكنت عايزة أدرسه ولحد دلوقتي الموضوع في دماغي .. بس أنا دارسة طب أسنان وهخلص امتيازي آخر الشهر "

بكتب فين تاني ؟

مش بكتب في أى مكان غير هنا معاكم ، ومليش أى روايات منشورة غير دي

بنشر بعد ما أجمع فصول ؟

لا مش بعمل كدة .. الرواية الوحيدة اللي عندي فيها حصيلة كويسة هى حتى الأزل ، عشان بكتب فيها من وأنا في تانية كلية ، بس مش حصيلة فصول  لا ..مشاهد ، أفكار ، رغى ، شغبطة وكدة يعني .. غير كدة أول ما بكتب بنشر على طول ..

المواعيد ؟

بصوا يا جماعة ، أنا بحاول التزم معاكم دايماً بس في ظروف أحياناً بتكون خارجة  عن أرادتي ، زى الشغل مثلاً ، وأنا شغلي مرهق وبيتعب الضهر والرقبة والأيدين ،  فمفيش طاقة بعد يوم جامعة وشغل برة وعيانين إني أقعد تاني أكتب ..ضهري هيشتمني !.

أو زى أى حد بيكتب ممكن فجأة يحصلي بلوك كدة .. اللي هو طب وبعدين هنعمل أيه في خالد ؟، شاهنده هتقول أمتى أنها بتحب جاسر ؟.. جوازهم ، خناقهم، مصالحتهم ..وهكذا ، ساعات بعطل ولازم اشحن كدة عشان أعرف أكتب .

وأخيراً

أتمنى تكونوا لقيتوا فايدة في الرواية غير أنها حاجة بتسلي الوقت ، قريتوا أكتر عن نقطة اتطرحت فيها في السرد أو في الحوار ، أو حتى اتقالت في سطر كدة على الماشي .

ميعادنا الأسبوع ده أن  شاء الله في حتى الأزل

بحبكم ..دمتم بخير 💙💙