بقيت نطلع ونهبط قلبي نغزني من داخل تكيت راسي على المخدة مقبيل كنت فرحانة وعلى أساس رايحة نعرس ونزهى ضهرتلي حكاية عموم وجدود وماعرف واش تاني .. وانا تايهة دخلت عمتي لقاتني في دي الحالة قاتلي - متحيري موالو دك أنا نفهمك بدات تحكيلي على بكري وعلى عروشهم وعاداتهم وبدات تسميلي فيهم بال الواحد من الجد للأطفال تامنو بربي مهزيت في راسي حتى إسم تالمو بزاااف بنات وأولاد والأغلبية ولاد كملت تحكيلي كي وصلت لحكاية الزواج وكيفاش قوانين عندهم لحمي شوك قتلها- عمتي أنتي راكي تحكي من نيتك صح راكم هكذا في بلادكم ولا غير تتمسخري قاتلي كيفاش نتمسخر لازم عليك تعرفي هاد أصلك ودك كبرتي خليني نكملك واتصنتي - كملي هذا راهو فيلم ا عمتي قاتلي- انا بكري صديت منهم وهربت عند باباك ضحكت قتلها-ضهرتي فحلة حطت راسها قاتلي كنت صغيرة حبو يزوجوني بولد عمي نكرهه ف الدم مزية لي هربت -هيه وعمي البشير تحبيه قاتلي- هو لي كنت نحوس عليه حليت عينيا - كيفااااش - هيه عمك البشير صاحب باباك خطبني منهم ومحبوش يزوجوني ليه قال مهوش من ولادنا - ايييي وشكون كان يحكم ا عمتي قاتلي جدك وجداك - يعطيهم العما شافت فيا قاتلي مشي موضوعنا هذا كملت تحكي وانا مخي بلوكا وغاضوني بناتهم واولادهم كيفاش دمروهم ضهر غير بابا وعمتي لي خاربينها معاهم الباقي الكل تحت السيطرة هي تحكي وانا نتخيل فيهم جدي وجدة كيفاش جاوني شغل من هادوك تاع قبيلة ابن الوهاج وليت نضحك وحدي قاتلي - انا نهدر وانتي تضحكي اضحكي جات نايضة وليت حكمتها -خلاص عمتي ودك وش المطلوب مني انا علاه لازم نعرف هاد البروتوكولات تبانلي معندها حتى معنى نعرفها مجرد ثقافة برك قاتلي مشي كما هنا كما تم ا موني قتلها - زعما مسافرة عبر القارات ديجا راهو سماطلي العرس منروحش بطلت كنت نحسب فيه عرس كما عراسنا وعراس خوالي خفيف ضريف قاتلي - يعني متروحيش!-- منعرف والله دوختوني وزيد خفت منهم انا نروح عند خوالي وانتم روحو عندهم ، راحت خرجت وخلاتني في مد وجزر وش العامل واش المعمول كل متفكر كاش موقف ملي حكاتو يجيني الضحك ...وصل العشا عيطولي تعشيت سقساني ابراهيم - ها عزيزتي وش قلتي نروحو شفت فيه منعرف منين طاح عليا هاد الجواب جيت نقولو منروحش وليت قتله نروح هززلي براسو قتله- ابراهيم - امم- نروح معاكم بشرط - ولي هو - نقعدو في اوتال- وعلاش نقعدو في اوتال راهم عندهم قصر يلم نص من وهران- لاشتا بصح منيش حابة نبقى في دار ناس منعرفهمش سمانة كاملة نروحو اوتال ولا أكريلنا دار ف النهار نروحو عندهم وف الليل نباتو في دار ودك انت قولي وش هو جوابك اذا قابل ياخويا أنا هاد الناس منيش عارفة علاه قلبي هارب منهم وخايفة راني حاسة حاجة راح تصرا ونندم قالي- ميكون غير خاطرك عزيزتي دك نشوف دار ولا اوتال مهم انتي كوني على راحتك مي راني متأكد غير تروحي تبدلي رايك وتعجبك مهمش وحوش راني نشوف فيك خايفة منهم وشاف في عمتي قالها منعرف وش حكيتيلها عليهم حتى خافت هكذا قاتله- قلت وش لازم تعرف عليهم كاين منهم لي ملاح وكاين لي لا خبرتها وفهمتها كيفاش تتعامل مع كل وحدة فيهم نطق يوسف - ما خوالي هادو انا منستراحلهمش زاد إدريس وإسحاق قالولي - موني متخافيش كش مشفتي اتصال برك نكونو عندك ( وصح كانو قد.كلامهم ربي يحفظهم ) ..كمل العشاء وناضو انا وليلى غسلنا المواعين تفرقت الحالة بيت عمتي روحو واما بديت نوجد في قشي باسكو الصباح نبكرو ....
راهي 3:30 تاع الصباح لابسين وواجدين أنا وليلى وإبراهيم وأنس والباقي مبعد يلحقو ..ديمارينا وهنا رايحة تبدأ المغامرة تاعي ...طريق طويلة من الغرب للشرق صرا فينا الباطل أنا وليلى هي بالحمل وانا متساعدنيش الطريق البعيدة نمرض شفت الموت دخنا كل شوية نحبسو ونغسلو وجوهنا بالدالة أنا وهي نتقيا أنا وتزيد هي 8 ساعات رجعنا شيفونة حتى انس مسكين ابراهيم كي شافنا هاكداك قلق ولا يسب ندم لي جابنا معاه هبلناه ف الأخير رقدت حسيت بطمبيل حبست هزيت راسي قتله- ابراهيم وصلنا ياك مجاوبنيش كان ينسف قاتله مرتو - وش كاين قالها - طمبيل حبست أنا سمعتو قال حبست وياااااا وين رانا كيفاش نديرو ضك قالي- موني اسكتي متزيديش عليا بقيت نشوف من الكارو الحالة شهبا لهبة مكان لا جبل لا شجر شغل رانا ف تكساس قتله - وش اسمها هاد بلاصة قالهالي ومشفيتش ، هبط هو يطل وش بيها حتى حبست طمبيل جديدة قتلها نخرج نشم الهواء بلاك نفطن غير خرجت قالي- ادخلي موني لوين خارجة - ابراهيم عيشك رايحة نموت بالسخانة طلقت روحي في لرض سمعتو يهدر بالتلفون عرفتو مع واحد من مالين العرس كي كمل قالي نوضي ادخلي واقعدي ، دخلت شفت ليلى مسكينة في حالة وانس تان دايخ زاد قلبي دار عليا قتله خويا شحال مزال ونوصلو قالي- دك شوي يجي يهزنا من - شكون هذا قالي عيطت لولد عمي دك يجي خوه يهزنا اعدلو رواحكم وشبيكم مطلوقين هكذا مبقاش بزااف قال لمرتو اعدلي خمارك تباني ميتة ، وحد نص ساعة قارات طمبيل توالنا هبط خويا عندو سلم عليه وجا طل علينا - يالله اهبطو تروحو معاه يوصلكم وانا دك نلحق نستنا ديباناج ونجي ناضت ليلى هبطت هي الأولى كان انس في يدي سمعتها تهدر معاه جا طل خويا هز الطفل داه وانا كي تقعدت عاود دار قلبي فتحت الباب درتلو بيدي بعد بعد ورحت طحت في لرض خرجت قلبي جابتلي ليلى قرعة ماء باردة غسلتلي وجهي ورقبتي وقفني خويا حطيت راسي على صدرو مشاني للطمبيل تاع ولد عمنا حتى جاتني وحد المرا سلمت عليا قالت ل ليلى - هاذي ختك قاتلها - لالا خت ابراهيم انخلعت شافت ف خويا قاتله - صح حركلها براسو ايه ختي موني لعزيزة تاعي حتى نسمع في واحد نطق من هيه قالو - متمسخرش بينا ياك انتم غي 4أولاد شفت منين جاي الصوت قابلني وحد الجان حبة بقلاوة قاله - ابراهيم ياك معندكمش طفلة قاتله ليلى - والله ختو هادي ، صونا تلفون خويا كان بابا هز عليه باف وهما يسمعو قاله - وش بابا لباس- لباس وشراهي أختك -شوية هاك احكي معاها راهي تسمع فيك قالي وشراطي بنتي العزيزة - مريضة ا بابا توحشتك تشوف وش صرا فيا أ بابا رانا ف وحد بلاصة جيت نكمل نغزتني ليلى قالي - بنتي توحشتني نطقت ماما تواله - موني كي توصلي روحي لسبيطار يديرولك لبرا وشوية سيروم كيما مالفة صحا بنتي -ماماا توحشتك - ي بنتي عميرتي توحشتني علابالي اول مرة تبعدي هكذا هيا منبعد نعاودلك واتهلاي في روحك بنتي ، كوبيت عليها شفت هادوك مخلوعين فينا نطقت ديك المرا ل خويا - والله نحسب فيها نسيبتك ههه(أنا نشبه لخوالي زي ماما فوطو كوبي ) حكممي خويا من وجهي بيديه قالي - شوفي عزيزتي دك تروحي معاهم وهاي معاك ليلى روحو لسبيطار ومبعد للدار لي نقعدو فيها هكذا و انا نشوف مع ميكانيسيان ونلحقكم هو قالي هكذا حسيتهم راح يخطفوني تكبشت فيه بديت نبكي بالشهقة نقعد معاك ( أنا جاية منيش إجتماعية ونخاف من الناس الغريبة ) قاتلي ليلى - وشبيك العزيزة راني معاك انا نطقت ديك المرا تكون بنت عمي اخت هذاك لي واقف قالت - هاذي ذلوعة خوها هما يهدرو وانا مخبية راسي ورا ابراهيم حتى نطق هذاك الجان قالي - والله م راح نخطفوك جيست ندوك للطبيب برك وتروحي للدار حتى يلحق خوك ، شحال وخويا يفهم فيا بالسيف قنعني باه قبلت ركبت معاهم م لور ورقدت على كتف ليلى وحد 10 دقايق دار عليا قلبي درتلها بيدي تاع حابة نرد قاتله حبس ...غير حبس هبطت نجري نرد هبط هو وختو قالي - لباس قرب مني حكملي شعري وحكمني من يدي شميت بارفان تاعو زاد لعبت على قلبي عاودت طحت في لرض خلاص ليسطومة فرغت ملقيت وش نخرج حسيت بيد دارت على وسطي ووقفني وأختو مسحتلي وجهي بالماء بلا منحس حطيت راسي على صدرو وهو حط يدو على ضهري وشدني ليه وأنا حاطة راسي على صدرو سمعت ليلى عيطت لخته قاتلها جبيلي الماء لأنس راحت وانا جبت الخبر لروحي جيت نجبد عاود شدني ليه وداني ركبني تكسلت طابست عندي ليلى - موني مبقاش بزااف ا عمري اتحملي شوي سمعت كلامها ومن تم مزدتش استوعبت منعرف رقدت ولا دخت جابتني الفطنة وانا ف سبيطار والسيروم ف يدي وهو فوق راسي كي حس عليا فطنت طابس عندي يهدر بصوت واطي - لباس اكي مليحة قتله- ليلى وين قالي - عند الطبيب مع سامية - شكون سامية هادي - اختي لي كانت معانا حركتلو براسي وسكتت مبعد عاود قرب مني وحط يدو على راسي قالي - يخلاص السيروم ونروحو للدار صوتو يهبل لقيت روحي نتمعن فيه قلبي منعرف علاه راهو يخبط جبد هو شوية ودار لهيه وانا نتأمل فيع طوييل بزااف اكثر من خاوتي جسمو مخدوم بشرتو بيضاء شعره اكحل عينيه تان وشفارو خير من تاعي يهبل وعندو لي فوسات يا يما أجري لبنتك منعرف وش صرا فيها ، غير دار ليا بدلت وجهي ولعبتها رقدت عاودت فتحت عينيا لقيتو مفيكسي فيا جات العين ف العين حكمت فيه نضرة بلا منرمش من الصدمة والحشمة حتى حركلي براسو تاع وشي رمشت عيوني قتله- وين راهو خويا - يفري امورو ويجي دورت وجهي عاودت جاتني حالتي بديت نبكي جا مسحلي دمعتي قالي - وشبيك ي بنتي حنا هاكداك وهو دخل وحد الفرملي مع الطبيب قالي- وشراهي الشابة تاعنا لاباس - حركتلو براسي لاباس قالي معلابالناش بلي عندنا بنت عمنا شابة هكذا وياااا راهي تبكي ب الدموع وشبيك دلوعة شفت في هذاك لي كان فوق راسي تاع واش يقول هذا قالي- هذا محمد ولد عمي جمال حركتلو براسي برك حتى شفت ليلى دخلت زادو دموعي جات عمقتني- اييي وشبيك أنس وميبكيش هكذا نطق قالها - لي يشوفها هكذا يقول خاطفينها قاتلهم - هادي الدلوعة تاعنا ومزلتو مشفتو والو ثارو يضحكو عليا خبيت وجهي فيها جا داك فرملي نحالي سيروم سمعت هذاك يقولو - هنا مكانش فرملية غير الرجال قاتله سامية ختو - وشبيك ياك رانا ف سبيطار مهم رتاحت حسيتو يهدر بالقلقة مع الفرملي وشبيه هذا زاد نطق الطبيب قالي - منبعد نتلاقاو عند نانا يا الدلوعة وتتعرفي بينا كامل هززتلو براسي .. بعد.شوي عاونوني نضت ووصلوني للطمبيل حسيتو ورايا قالي -بالعقل عليك اصبري، فتحلي الباب دخلت وركبت ديمارا بينا نطقت سامية خته قاتلنا دك نروحو للدار ترتاحو وف الليل نجو ندوكم عند نانا ...وصلنا لوحد باطيمة جاية ف بلاصة شابة وباالحراس تاعها يعني سيتي مغلوقة هبطنا قالت ليلى لسامية - هادي دار من - تاع خويا مالك راهي فارغة اقعدوا فيها وصيبو راحتكم سمعتو كي قالي - تقدري تمشي ولا نهزك ناضو يضحكو قاتله ختو - زيد فششها انت تاني كي شغل حشموه ولا هز أنس من عند ليلى سبقتنا سامية تحل الباب زادت وراها ليلى ومبعد انا وهو اللخر فينا طالع ورانا ..دخلنا ليها دار شابة فيها صالون كبييير فيه القعدة كانت موجودة القهوة والقاطو بقيت نشوف ف تفصال تاع الدار جاية ستيل غربي كوزينة محلولة على الصالو وشنابر زوج مقابلين رحت ديراكت للدوش غسلت وجهي وفتحت وحد الشمبرة فيها سرير طحت عليه و رقدت خليتهم يشايخو مع ليلى منعرف شحال من وقت وانا راقدة حسيت بيد تحطت على راسي فطنت لقيتو خويا ابراهيم قالي-موني نوضي نروحو راهو الوقت - منيش قادرة روحو انتم برك خليني نرقد - يالله موني عيب راهم يستناو فينا - شحال الساعة قالي - 19:50 هزيت روحي تقعدت عاود دار قلبي تقييت فوق السرير ولا عيط على ليلى وهزني للدوش غسلي وجهي جات ليلى وقفت معايا شوي حتى فطنت مبعد دوشت رحت لهاديك الشمبرة كان يحكي بالتلفون دار ليا قالها لبسيها نديها لسبيطار ..داوني ورجعني ف طريق عيطلهم قالهم سامحونا منقدروش نجو موني مريضة غدوة إن شاء الله ..غير وصلنا للدار دخلت تكسلت ف الصالو وحد ربع ساهة سمعنا الباب يصوني راحت ليلى تحل كانت سامية ومعاها مرا سلمت عليا قاتلي هادي عمتي زهية اخت عمتي نبيلة هي صح والله تشبهلها فوطو كوبي سلمت وعاودت عليا وتبكي وتحضن فيا بدات تسقسي فيا عليها وعلى بابا وعلى ماما عرفت بلي توحشوها ف الدار شوية ودخل مالك قعد شوي مع خويا وكي عادو خارجين قدم عندي قالي- لباس -ايه راني مليحة ، راحو خرجو جات ليلى بقات تحكي مع ابراهيم على عماتي نضت وخليتهم يتناقشو ورحت رقدت للصباح نضت مكسرة ليسطومة تعصر بالشر لقيت قهوة حليب قاطو من كلشي فطرت عمرت كرشي لبست وديمارينا عندهم غير وصلنا لوحد الكوتي فيه خضوريا بزاااف دخلنا طريق فيها شجر من ومن حت وصلنا توال وحد الباب كبير تفتح دخلنا بالطمبيل لداخل كانت لاكور واسعة معمرة بالورد من كل أنواع وألوان مخدومة شغل كولوار ب الورد قابلنا باب كبير تاع لوح وزجاج مفتوح قدمنا قلت بسم الله و دخلنا منو كاين هول واااسع واقف فيه واحد الراجل شاف مع ابراهيم وضحك- مرحبا بولاد خويا سلم عليه وقال الحاج شوف شكون جاو عندنا ولاد ولدك ، في دقيقة بداو يخرجو بالواحد قالي خويا -موني سلمي على عمامك وجدي شفت فيهم كامل يتشابهو فوطو كوبي على بابا جبدني واحد منهم حب يسلم عليا وانا كبشت في خويا ودخلت راسي قالهم خويا - خلوها شوي توالفكم وتسلم قاله - معليش براحتها ، احنا واقفين نسمع في صوت مرا جاية قالت - وعلاش راح ناكلوها ياك حنا مناكلوش العباد يا يما صوتها برك يرعب شفت فيها بالتخبية مرا كبيرة وطويلة عندها وشام في جبهتها عينيها كبار نوازات ومكحلتهم شفت فيها صورة بابا نفس الوقفة ونفس العينين( اصلا اكل هنا عندهم نفس العيون متوارثين فيهم ) فيها شوي تجاعيد لابسة جبة شاوية وفي يدها عصا عندها وحد الهيبة تقول راجل واقف نطق ليها خويا - أهلا نانا سلم عليها وأنا في حضنو معنقني قاتلو - أهلا بيك وهادي علاه لاصقة فيك وخايفة منا مش حابة تسلم جيت نجبد عليه ونسمع وحد الضربة تاع البارود عيطت على طولي وزدت دخلت فيه ونبكي قالي - موني صاي راهو غير بارود برك نطق جدي قالها - خليها براحتها توالفنا قبل والسلام ساهل شفت فيه جاي طوييل ابيض حتى هو عيونو كبار ونوازات ضحك معايا وقالنا ادخلو اتفضلو ، دخلنا لداخل للصالو تاعهم مقسوم على زوج ب باب كبييير تاع زجاج هادوك لي ڤليسيار فيه زوج قعدات همسلي خويا قالي روحي اقعدي جيهة النساء مع ليلى زدت تكبشت فيه قاله جدي - معليش خليها تقعد معانا قعد جدي وانا في النص بينه وبين خويا زاد جا قعد عمي إبراهيم ( بابا وعمتي سماو ولادهم على عمومي ) زادو قعدو عمومي لخرين مع ولادهم عينيا تزرولو مشكل اكل نفس الطابع صعيب تفرق بيناتهم كي الكبار كي الصغار ونفس الشبه تاع بابا وعمتي ، بداو يشايخو والأغلبية طايحين أسئلة على خويا ويسقسو على خاوتي لخرين وهو يجاوب فيهم مديت عيني نشوف لجهة النساء قاعدة جدة ونساء معاها وليلى داخلة ف الجو تشايخ وتضحك معاهم تقول تعرفهم من قبل نطقت وحدة من بينهم وجهت كلامها عليا قاتلهم- وهاديك وشبيها قاعدة وسط الرجال لا حيا لا حشمة قالها جدي - فتيحة سكتينا راهي وسط عمومها نطق ليها خويا - عمتي فتيحة موني تربات وسط 10 رجال كيفاش حبيتيها تكون سكتت قتله - شكون هاديك قالي عمتي هادي اخت بابا من جدي وأنت وين تعرفهم هادو كامل قالي منبعد ونهدرو شوفي عزيزتي كامل راهم يستناو فيك بش يتعرفو عليك مكان والو علاه تخافي منهم راهم عباد كما احنا هيا نوضي سلمي عليهم عيب هادو كامل لي هنا عمومنا وعماتنا وجدك ونانا هزبت راسي نشوف فيهم كامل يخزرو فيا قالي جدي - راكي مليحة بنتي حركتلو براسي بدأ يسميلي فيهم هذا عمك إبراهيم وهذا يوسف وجمال يونس واسماعيل والياس ومنير وادريس وإسحاق فيهم لي متزوج وكاين العزاب نضت سلمت عليهم حتى دخت ورجعت لبلاصتي قالي - ها عرفتيهم دك قتلو نفس سماوات خوتي وولاد عمتي ضحك قالي - ودك نوضي سلمي علا ولاد عمومك هذا رضوان وهذا احمد نذير عبد النور (لي هو العريس) ويكون خو مالك وزدت درت للكوتي لاخر ولاد عمي إبراهيم محمد سمير سامي توفيق أسامة.... مهم الله يبارك ويزيد مقدرتش نحفظهم سلمت عليهم غير باليد برك ، جيت رايحة نقعد قالي خويا زيدي روحي عند نانا شفت فيها عندها وحد الخزرة تبو..تحتك خفت قعدت واقفة ونشوف ليها ناضت سامية جات حكمتني من يدي قاتلي تبعيني زيرت على يدها ونمشي شغل تشليت بدات تعرف فيا عليهم هادي عمتي زبيدة وهادي مريم زهرة زهية نرجس حتى وصلت عند نانا قاتلي هاذي نانا الويزة كلشي تحت يدها قربت منها وسلمت على راسها قاتلي - أهلا بيك وزدت كملت على نسا عمومي اسمهان نور فدوى حليمة خيرة وزدت بنات عمومي بزاااف خدي طار من تسلام قعدت شوي ونضت رحت عند خويا قالي جدي - ها خلاص تعرفتي علينا دك حنا حابين نعرفوك ضهرتي كي الهلال تاع العيد نطق واحد من عمومي قالي - من نهار قالنا منيير بلي احمد عندو طفلة شابة تقول للقمر طل ولا نطل واحنا حابين نشوفوك تعجبنا علاه خباك علينا وكي جا عرس عبد النور طلبنا نشوفوك قالهم خويا - مخبيناها م والو - وعلاش مسمعناش بيها حتى صار ف عمرها 17 سنة ف نص كلامهم دخل مالك بكل وهرتو تحبو الصح كامل ولاد عمي بڤاڤس بصح مالك طيرلهالهم فايتهم ف الزين دخل ديراكت قعد بين جدي وعمي إبراهيم(باباه)
كملو يشايخو وعمي منير يقلهم -انا كي شفتها نحسب فيها فاميلة نسابو تشبه ل يماها بزاف نطق عمي اسماعيل - ها عرفينا بروحك وش ديري تقراي ولا قاعدة ف الدار ، جاوبهم خويا قالهم-ربحت الباك وراح دير صيدلة قالي- مبروك عليك ودارولك حفلة جا خويا يجاوب قالو خليها هي لي تهدر نسمع صوتها وليت نطقت قتله -مزال رايحة عند خالي إيدير ونديرها مع بنتو في بجاية بعد منروحو منا انا نهدر ونسمع وحد الصوت تاع العصا من جهة نانا ضربت بيها الطابلة تخطفت شفنا كامل فيها قاتلنا - الله الله حتى رجعو نسابي يديرولها الحفلة وانتم مكمش رجال شاف فيها جدي وجبدني عندو خلعتني نضت نبكي قالها خويا - يا نانا احنا موالفين عندهم من صغرنا كبرنا عندهم وسيرتو هي وكل عام نروحو توالهم نبحرو عليها تفاهمنا نديروها تم مع بنتو حتى هي ربحت الباك كيفها سمعتها قاتله - اييه الله يبارك نطق عمي من هيه قالها- حنا تان نديرولها حفلة وب البارود تان ورجع كل واحد يهدر من هيه كاين لي يوتوت مع خوه وكاين لي يضحك وكاين لي يشايخ مع خويا شفت في مالك برك ساكت وحاط رجل فوق رجل ويشوف جيهتي شغل مش عاجبو الحال ولا منعرف يبان مشي آلاز نطق خويا ل نانا قالها علابالك وش اسمها هزتلو براسها قالها - مونى الويزة تبسمت اففففف بالسيف نطق واحد من ولاد عمومي قال - موناليزا هههههه شفت فيه خصني غير أنت تزيد تضحك عليا ولات سامية قاتلها - نانا علابالك خبرتني مرت ابراهيم بلي موني عندها الحساسية من باذنجان كما انتي لوكان تاكله تمرض زاد نطق خويا قالها - حتى الخانة لي في قفاك عندها وحدة كيفها لقيت جدي هبطلي راسي وطلعلي شعري شافها باسني منها شاف في خويا وقاله- أحمد مسماهاش لويزة باطل باباك يميز قبل ميدير الحاجة نطقت عمتي فتيحة- يا درا الا شاطرة كما ناناها ولا فيها غير الفشوش والبكاء نطقت ليلى قاتلها- هادي لي راكي تشوفي فيها مفششة طيبلك للعرس كامل يعني مفششة وشاطرة شاف فيا جدي قالي - صح طيبي للعرس كامل - إيه قاله خويا - حنا في عراس ولاد خالي ولا نهار نعرضو صحابنا هي لي طيبلنا قالي جدي غدوة عبد النور راهو عارض صحابه طيبيلهم انتي وغمزلي قالي بش تسكتي عمتك فتيحة وناض يضحك نطق عبد النور من هيه قاله- لالا جدي مكان لاه تغامر بينا راهم صحابي وناس برانيين قاله خويا متخافش لوكان مجيتش تاكل على ختي والله منهدر زين نيتك وخليها عليها وعلى ليلى وليت نضحك جات عيني على مالك عوجلي راسو تاع من نيتك شغل مهوش مأمن ويشوف مع ولاد عمه بالواحد كانو يضحكو ويشوفو معايا شغل يعس فيهم وأخيرا نطق بدل كامل الموضوع عندو وحد الهيبة اكل ركزو معاه وحبسو الضحك باين عليهم يحبوه ويهابوه نفس الوقت سيرتو من جهة جدي ......وصل وقت الغدا اصلا محسيتش كامل كيفاش جاز الوقت حطولنا الشخشوخة سلاطة شربة بدينا نوكلو غير حطيت المغربة الأولى نار شعلت في فمي وخرجت من وذني حارة تقتل شاف فيا خويا قالي وشبيك مقدرتش ننطق دمعة هبطتلي ضحك قالي - واش حارة حركتلو راسي حطلي سلاطة في فمي -أشربي الماء ناضو يضحكو كامل عليا قالي جدي - دك تتعودي على الحار هزيت راسي نشوف في نانا من هيه تشوف لينا حطيت راسي خفت نركز معاها يعاود يحكمني الرعب لي فيا يكفيني وش هاد النهار ي ربي ..كملنا الماكلة هزو الطباسا وجابو الديسار وفاكية سمعتها عيطتلي - ارواحي هنا توالي الفشلة حكمتني نغزت خويا - منيش حابة نروح قالي روحي عزيزتي راهي ليلى توالك نضت رحت وصلت توالها حبست حكمتني سامية - اقعدي توالها قعدت وانا حاسة الشوك تحتي وليلى تضحك عليا شفت خويا غمزني ويضحك وحتى عمامي كامل يشوفو لينا قاتلهم - وش بيكم تشوفو هنا منيش راح ناكلها وبدات تهدر بوحد اللهجة مفهمت والو هبطتلي راسي وشافت مع رقبتي وتبسمت قاتلي تعرفي طيبي هزيتلها براسي قاتلي ماتبهدليش بينا الا متقدريش قولي - لالا نقدر ورايحة نطيب مع ليلى ، شافت معاها تاع راكم تحكو صح ولات قاتلها خلاص مالا روحو للكوزينة مع سامية وزهية ينعتولكم ودك يجيكم عيد النور خبروه وش يقضي ...رحت تبعتهم للكوزنية صبت بنات بزااف تم هادو بنات سامية وبنات عماتي وعمومي تعارفنا اكل شابين عندهم زين سبيسيال شعرهم نوار وعيونهم كبار يشبهو ل نانا الويزة اكل يضحكو معايا غير وحدة يسموها سمية حسيتها مش حاملتني هي تان شابة بصح تحسست منها حتى خزرتها مشي تاع وحدة عادية شغل قاعدة فوق راسها دخلت عمتهم فتيحة قاتلها - سمية بنتي شمري على ذرعيك غدوة نتكلو غي عليك لازم تحمريلي وجهي قدام صحاب ولد خالك وجبدتها على جيه قاتلها - وش نشمر انا وش من صحاب هادو- صحاب العريس غدوة جاين وناناك قالت لهادي البكاية ديرلنا الفطور شافت فيا هزت حاجبها يهدرو توالي نورمال عمتي فتيحة هاذي تبان متحملنيش هي وبنتها بقيت نشوف معاها حتى شفتها رجعت تتبسم وحدها شفت وين تشوف لقيته مالك عاطينا بالضهر يهدر مع خوه وعاود تلفت جات عينه عليا بقا حاكم فيا النضرة حطيت راسي وعاودت هزيته شفتها تشوف ليا وجها مقلب ......
أنت تقرأ
#موني ♡#مالك قلبي
Storie d'amore♡♡♡♡♡ موني فتاة رمى بها القدر وسط قوانين أسرية وأعاد التاريخ نفسة بعد ما تمرد الاب والعمة عن هذه القوانين لكن هل تخضع أم تتمرد هي الأخرى ♡♡
