مديت لك قلبً ماطاله احد غيرك

البارت الثاني

قبل ٢٩سنه
كان زايد جالس  عند امه وفي حظنه اخته  منيفه الي تلعب  بيده واخته الثانيه تمد القهوه له :سم يا زايد
نطق بابتسامة :سم الله عدوتس ،اخذ الفناجيل وهو يشربه وبعدها مد منيفه لامه :انا استأذن بروح لمترك
الجوهره وبحرص :وانا امتس ما سمعت ابوك وهو يقول لاعاد تماشيه
طلع زايد وهو يضحك :والله يايمه مادري ابوي وش شايف على الرجال ما يدانيه بس وليدك المسكين ماله صاحب إلى ذا المترك . . . طلع من البيت وهو يتجاهل نصيحة امه وابوه
_____________
بعد صلاة العشاء  وفي عز الشتاء والمطر
في بيت ابو متعب كان الكل ينتظر زايد الي طالع  من العصر ولا رجع ولا احد شافه
ابو متعب بغضب :أنا كم مره قلت له لا يطلع مع ذا السربوت
متعب :يا يبه استهد بالله مهو  صاير(ن) شي ان شاءالله تلقيهم متعطلين في مكان
فهد :اي وهو الصادق خلنا نطلع ندو__ قطع كلامه طق الباب بشكل جنوني واحد يقول الحق يا ابو متعب
خرج عقاب وعياله ركض اما الجوهره الي صارت تبكي خوفاً على ولدها  ومزون تهديها
ابو متعب وهو يفتح الباب :وش علمك
الرجال : زايد تالينه الشرطة
ابو متعب بصدمه :انت تقولها صادق
الرجال اي والله .مترك قالها
ابو متعب :امش امش لا بارك الله في العدو
ركب السياره هو وعياله متوجهين لقسم الشرطة الي يبعد عن الديره مساف
___________
دخل عقاب وعياله لقسم الشرطة وهم يسألون عن زايد  قال لهم واحد من العساكر:حظرتك ابو زايد عقاب بن متعب الـ .
ابو متعب :ايه أنا ابوه قلي وش مهبب الولد .
العسكري :تفضلي معي للمكتب  دخل للمكتب الي كان فيه رايس القسم
تكلم الجندي وهو ياشر على ابو متعب :ابو المتهم زايد
تقدم يسلم على عقاب وهو يقول له يجلس :والله ما ادري وش اقول لك لاكن ولدك أنمسك وعنده ممنوعات
كان الخبر كصاعقه على ابو متعب الي نطق بصعوبه :شلون
رد عليه ببرود :والله جاني بلاغ انه يحمل ممنوعات  في سيارته وهذا هو في التوقيف ورح يتحاكم
طيب اقدر أشوفه .. معك عشر دقايق بس
_________
في التوقيف عند زايد الي كان للحين ماهو مصدق الي صار .ولا شلون بيطلع ولا كيف غدر فيه خويه قطع حبل أفكاره العسكري الي ينادي باسمه . . . طلعوه لغرفه ثانيه وأول ما انفتح الباب دخل ابوه  واخوانه
كان واثق ان ابوه رح يصدقه ولاكن كسر اماله الكف الي جاه منه :يا خسارة التربية فيك .. كان للحين ساكت ومصدوم من ابوه  لف على اخوانه لاكن شاف في عيونهم نفس النظرة الي في عيون ابوه ..نطق وهو يرتجي يصدقوه :يبه والله ما سويت شي . . . متعب فهد . . . تكفون صدقوني والله اني بري . . روحو لمتـ  قطع كلامه صوت ابوه :انت نزلت راسي بين الناس قللت من قدري. . تكلم والعبره خانقته :يبه نخيتك لا تقول كذا أنا ولدك تربيتك والله ما تطلع مني العيبه .. لا والله من اليوم ورايح مالي إلى ولدين . التفت فهد ومتعب على ابوهم بصدمه متعب :يابوي العن ابليس ماتوصل
ابو متعب :إلى والله توصل اجل ولد عقاب يدخل السجون وياخذ ذا الحرام ..زايد الي ما قدر يمسك نفسه وصار يبكي :والله ما سويت شي .
ابو متعب وهو يلف بيطلع كلامي وقلته لا انت ولد ولا أنا ابوك ليوم الدين  . . متعب فهد قدامي
خرج الكل من الغرفه وطاح زايد من طوله ماهو مصدق الي صار
____________
في بيت ابو متعب
وبعد صلاة الفجر والجوهره للحين ما غمض لها جفن تحتريهم يرجعون  .سمعت صوت الباب و فزت  هي ومزون
دخل زوجها وعيالها وهي للحين تطالع لباب
ام متعب :وينه زايد
ابو متعب بغضب لعاد تطري اسمه في ذا البيت  ماعد لي إلى ولدين
كانت تضحك بعدم تصديق لكلامه :عن المزح وقل وين زايد  نشف دمي وانا احتريه من امس .التفتت على أولدها وهي تعيد السؤال ولاكن ما لقت من احد جواب بدأ الخوف يعتصر قلبها انها معاد تشوف ولدها :يا عقاب أسألتس بالله  وين وليدي
رد عليها بجفا على غير عادته :ولدك طيح وجهي بين الناس ولا عاد ابي أشوف وجهه
كانت تبكي وبدفاع عن ولدها :والله ما تطلع العيبه من زايد
تكلم متعب بعد صمت طويل :يمه زايد في السجن
شهقت مزون وبخوف :وش سوا ليش في السجن
فهد وهو يمسك امه الي معاد شالتها رجولها ويجلسها :ممسوك ومعاه ممنوعات . حطّت الجوهره يدينها على فمها تكتم شهقاتها وهي تهز راسه بعدم تصديق
تكلم عقاب وهو يوجه الكلام للك وبصوت عالي :والله ثم  والله لو اسمع احد يطريه على لسانه اني ما يعين خير.تقدمت له الجوهره وفي عيونها زعل وعتاب :افا يا عقاب هاذي هقوتك في ولدنا وفي تربيتك .عقاب :الظاهر ما نفع فيه التربية
الجوهره :الى والله ان يجي يوم وتعرف ان  وليدي مظلوم ونها ما تطلع منه العيبه . . . لاكن معاد بيفيدك الندم وقتها
_____________
نرجع للوقت
كان الكل مصدوم واولهم منيفه الي ما تدري ان لها أخ اسمه زايد .
جميله :طيب وينه .للحين مسجون
متعب بحزن :لا يا بنتي ماهو مسجون هو طلع من السجن بعد ست شهور
عقاب :اجل وينه
متعب:ما ندري وين ارضة من سماه
سالم :وش صار الحين علشان تقولو لنا عنه
نطق  ابو متعب بعد تنهيده طويله قال لهم وش قال له ابو جابر  :أنا رحت لأبو جابر مترك الله لا يسامحه قال انه يبي يقول لي شي وليت اني ما سمعت او ليت اني صدقت ولدي ولا صدقت العريب .الي صار انه تضارب مع زايد في ذاك اليوم . . . وبغصة واضحة في صوته أكمل كلامه .والله اني اذكر  وجهه الي فيه جروح في ذاك اليوم لاكن الشيطان اعماني ولا صدقته . . .ماقدر يكمل كلامه وصار يمسح الدموع الي عاندته وطاحت بطرف شماغه
خيم الحزن والسكون على الكل والبنات صارو يبكو من بكاء جدانهم لأول مره يشوفو  كبارهم بذا الحزن
تكلم متعب بدل ابوه وهو يكمل لهم السالفه :في ذاك اليوم تضارب زايد ومارك علشان زايد عرف ان مترك يبيع الممنوعات وحلف زايد انه رح يبلغ عليه ان ما ترك درب الحرام لاكن مترك غدر في قبل لا يبلغ عليه حط له في سيارته من ذا البلا وبلغ عليه ان معه ممنوعات وبعد ما أنمسك زايد نشر مترك الخبر بين اهل الديره . . . والحين بعد ما حس انه بيموت قال لنا علشان نسامحه قليل الخاتمه
منيفه وهي تمسح دموعها :طيب بعد ما طلع من السجن ما رجع
متعب :لا ما رجع
نطق فهد بعد صمت طويل : إلا رجع
التفت الكل على فهد وكانت الصدمه واضحة على امه وابوه واخوه واخته مزمون الي مصدومين متى جا ولا يدرون
ابو متعب :شلون رجع ومتى وليش ما تكلمت لليوم
فهد وبحزن : كان وقتها عرس متعب وكنا في المزرعة بعد ما صلينا الفجر طلعت أشيك على شغل العمال وشفت واحد متلطم  ينط فوق السور ورحت له ومسكته وما كان الى زايد ...
ابو متعب :وليش ما علمتني انه جا
فهد :قال لي انه ما يبي احد يدري ولا يبي يخرب عرس متعب  ما رضيت وقلت له رح أعلمك لاكن منعني ووعدني انه رح يطلع قدامك بس بعد العرس وطلبني اسكت واخليه يحضر عرس متعب ويشوفكم ولو من بعيد . . . لاكن بعد العرس دورت عليه في كل مكان ولا لقيته لاكن لقيت له رسالة كاتبها .قالها وهو يطلع ورقه من جيبه واضح عليها أثار الزمن وتغير لونها وصارت مهترئة. . مدها لابوه .هاذي هي
اخذها ابو متعب وبيد ترجف فتحها بحرص لا تنقطع (اليوم شفت الفرح  في وجيه الكل شفت بعيوني شلون الكل مبسوط ويضحك   ما ودي انكد فرحكم لاكن ودي اقول لك للمره الاخيره اني والله ما سويت فعل ينزل روسكم .. استودعتكم الله)حط الورقه على الارض وطلع وهو يحاول يتنفس وكان يردد :يارب سامحني يارب رده لي
خرجت ام متعب وراه وهي توقف جنبه :ذنبه برقبتك انك تبريت منه وهو بري ورقبتي اني سكتت  وبكيت ورقبت فهد الي ما قال انه كان حولنا  ورقبت مترك إلي افتراء عليه ورقبت متعب الي سكت  . . . لاكن مو الحين تنكسر عزومك وتطيح الحين وقت انك تدور عليه  وترده لنا
____________
في مكان  بعيد عن الديره واهلها في بيت ابو علي (زايد)
الساعة ١١:٣٠ بليل
كانو مجتمعين في الحوش حول شبت النار وكل واحد كانت تأخذه هواجيسه لصوب وهم يسمعو صوت ابوهم الي كان يغني
.
.
.