مديت لك قلبً ماطاله احد غيرك

البات الثالث

———
في الديره اليوم الثاني
وفي وسط السوق
كان ابو متعب وعياله في محل فهد
ابو عقاب :يبه أطع شوري أنا كلمت رجال اعرفه له قريب في المباحث وقال رح يجيب لنا علم زايد
ابو الهنوف بتأييد لكلام اخوه :اي والله انه صادق احسن من اننا نطلع ندور له على عماها وان ما جانا علم(ن) اكيد وقتها نطلع ندوره بانفسنا
ابو متعب وبقل صبر :انا داري ان كلامكم صح لاكن معاد فيني صبر
ابو عقاب :تصبر يايبه تصبر اقل شي اسبوع
ابو متعب وهو يوقف :يصير خير .المهم امكم تقول الغداء عندها
رد الاثنين بـ ابشر وتم
_________
في بيت الجده
ام متعب :يا منيفه
منيفه :لبيه يمه
ام متعب:وانا امتس أبيتس تكلمي حرمة اخوتس و اختس يجون للغدا
منيفه :ابشري هالحين
________
في بيت ابو عقاب كانت نوره وبناتها قاعدين في الحوش وقدامهم القهوه
لطيفه وهي تشرب من الفنجان:امي انتي الحين كنتي تعرفي ان ابوي عنده اخ غير عمي فهد
ام عقاب :اجل وش رايتس
جميله :يعني تعرفي
ام عقاب :اي اعرف وانا امتس
لطيفه :وليش ما علمتينا
ام عقاب :لو ابوتس يبيتس تدرين قال لتس .وعن القاف انتي وهي وقومي شوفي التلفون من يدق
قامت لطيفه وهي للحين عندها أسئلة كثيرة بس ما احد رح يجاوبها .رفعت التلفون الي كان شوي ويقفل وهي ترد:هلا
منيفه:اخيرا ما بغيتو تردو
لطيفه وبضحك على عصبيتها :انتي للحين مسويه تحديد على الكل
منيفه :لا تذكريني والله اني ما سكت(ن)نفسي لا انفجر على احد . ولا في ناس طبيعيه تخبي عن بنتهم ان لها اخ
لطيفه وهي تمزح :احمدي  ربتس علموتس بعد ٢٩ سنه
منيفه بقل صبر :أنا اقول اذلفي وقولي لامتس ان امي تقول الغداء عندنا . . .
طالعت لطيفه التلفون الي تقفل في وجهها وهي تضحك بصدمه :لا والله واضح العصبيه . . وطلعت لامها تعلمها بكلام جدتها
________
في نفس الديره وفي بيت ام سالم (مزون)
الي كانت فيه سُلاف و الهنوف وترف وامها
الهنوف وبهمس لترف :ها عرفتي شي عن العم المجهول
سُلاف بنفس الهمس :اي والله من امس احاول اطلع الحكي من ابوي ما طلعت بشي(ن)
ترف بنفس الهمس:اسكتو بس حاولت أفتح الموضوع مع عمتس أكلتني بقشوري
ام سالم  الي كانت تسمع همسهم :أنا اقول بدل الحتسي الي ماله داعي قومي انتي وهي سو الغدا ...... قاطعهم صوت سعود من ورا الباب :طريق يا ولد
تغطو الهنوف وسُلاف  وهو دخل
سعود وهو يقبل راس امه :السلام عليكم
ام سالم :وعليكم السلام .وينه ابوك
سعود بمزح :اي اي بس انشدي عن مساعد اما سعود له الله
ام سالم :ايه سعود هذا هو شفناه ليش ننشد عنك
سعود بضحك :اي اي . . . ابوي في المحل مع سالم
ام سالم :وانت وش تسوي هنا ما تروح تساعدهم
ترف بضحك :أنا اعرف اخوي جا يدور علم لاكن لا تحاول قد حاولنا أنا والهنوف من قبلك
سعود :وش قالو لتس انتي وبنت خالتس حرمه أدور علوم
ترف :والله انت ابخص بحالك
قاطع  هواشهم صوت التلفون. . . قام سعود وهو يروح له وبعد ثواني رجع
ام سالم :من الي دق
سعود :منيفه تقول جدتي قالت الغداء عندها
__________
في المدينه بتحديد في بيت (زايد)
كان الكل جالس  عى الارض يفطر
المها وهي تدور حولهم لين توصل لامها وتاخذ لقمه وترجع تدور  والكل يضحك على حركاتهاالى وهج الي كانت تأكل بصمت بجانب ابوها 
زايد الي لاحظ سكون بنته الي ما تعودو عليه للحين قرب وهو يقبل راسها .وفزت بخوف
زايد :بسم الله عليتس وانا ابوتس اسف ما قصدت افجعتس
مكان منها رد الـ انها. تهز راسها
زايد وبحزن على حال بنته الي تغير من سنه .اكمل كلامه :متى تبون نسري لديره
علي وبفرح عكس وضعه قبل ثواني :تقولها صادق
ابو علي :اي والله صادق
الجوهره وبغرور وهي تناظر أخونها :أنا وش قلت
سيف وبضحك :من يسكتها ذي الحين
ام علي وبغرور مشابه لبنتها :قد قلت لكم خلوه علي
علي بضحك :ها خذ لك تلقاها من البنت ولا امها
وقام الكل يضحك.لاكن قطع صوت ضحكهم كلام وهج:وين بنروح
ابو علي بحنيه :بنروح لاهلي. . . أكمل وهو يترقب ردها . . ما ودتس نروح
وهج بعد صمت لثواني : عادي 
قالتها وهي تقوم من مكنها تتجه لغرفتها
كانت بتلحقها امها لاكن استوقفها علي :أنا بروح لها
.
.
.
توجه لعرفتها وهو يتنفس بعمق .طق الباب
مكان منها رد رجع طق مره ومرتين وبعد ما عرف انها مارح ترد فتح الباب وهو يطلّ براسه:ممكن ادخل . . . مكان منها رد الي انها تهز راسها با الموافقة . تقدم وهو يجلس بجنبها على السرير :ليش زعلتي
وهج:. . .
ما تبين نروح اقول لابوي لا نروح
وهج وبصوت مهزوز :بس ابوي يبي يروح
علي :صح ابوي يبي يروح بس ليش انتي ما تبين
وهج :اخاف
علي وبحنيه :افا من وش تخافي وعندك علي
وهج بعد صمت لثواني:اخاف أنسى بهاج
علي وبنفس النبره الحنونه:مارح تنسينه صدقين رح تتذكريه مع كل كلام ومع كل ضحكه ومع كل هواش وراح تشوفيه في وجوه الناس مارح يغيب عن بالتس. . لاكن وانا اخوتس حالتس الحين مارح يسر بهاج لو كان يشوفتس انتي لازم تطلعي وتختلطي في الناس مو تجلسين تبكي وتقفلي على نفستس بهاج ما يبي منتس إلى أنتس تدعي له . . . كانت تسمع كلام اخوها وتبكي بصمت هي تعرف ان كلامه صح لاكن ما هي قادره تتخطى شعور الفقد 
_______________
بعد مرور ثلاث ايام
في الديره في وسط السوق وبتحديد في القهوه الي تطل على السوق كان سالم وعقاب جالسين يسولفون
اقبل سعود وصقر وهم يضحكون
سالم :بشويش انت وهو الي يشوفكم يقول مجانين
صقر بضحك : لو شفت اخوك الي طاح على وجهه وهو يناظر على خلق الله ماتقول شي
عقاب وهو يقد حواجبه :على من تناظرون يمال ال. . .
سعود وهو يدافع عن نفسه :هوب هوب لاوالله كنت أناظر برجال (ن) غريب جا لديره
سالم بستغراب :غريب
صقر :اي يقولو انه اشترى بيت مضحي الله يرحمه
عقاب : بيت مضحي ما غيره الي قدام بيت جدي
سعود :اي اي هو
صقر وهو يهمس لهم :شوفوه هذا هو
التفت الكل على الشخص الي قاله صقر
سالم :انت متاكد هذا هو
سعود :اي هو
سالم:شفه يا خي يبين نفس عمرنا
قطع كلامهم توجه الغريب لجهة القهوه . . .السلام عليكم
الكل :وعليكم السلام
علي وهو يوجه السؤال لصاحب القهوه (سهيل)
يا خوي وين اقدر ألقى حمال يساعدني في شيل الاغراض
سهيل :والله وانا اخوك منت بلاقي
على وهو يخرج :مشكور ما قصرت
كانو للحين يناظرونه
سعود :يا حليله يحسب نفسه في المدينه
قام عقاب وهو يتوجه لعلي الي كان واقف وسط السوق
.
.
.
عند على الي قرر يمشي قبل اهله بيومين يجهز البيت  لاكن حس نفسه ضايع وسط ذي الديره الي ما يعرف فيها احد ابتسم على حاله بسخريه :هاذ وهي ديرتك
قاطع تفكيره صوت من وراه :يا الغريب
التفت لصوت :تقصدني
عقاب :في غريب غيرك
علي وبقل صبر :سم وش بغيت
عقاب :سمعتك تبي احد يساعدك
علي :اي والله .انت تعرف احد
عقاب وهو ياشر على الشباب :أنا وعيال عمي نساعد
علي :لا لا مشكور ما ودي أتعبكم وهي حجات بسيطه
عقاب وهو مو عاجبه ذا الغريب :براحتك . . الى ما قلت لي من انت
على وهو يعطيه ظهره :تقدر تناديني الغريب
كان يضحك عقاب بصدمه من وقاحته . . سالم وهو يمشي لعقاب :عقاب وش فيك
عقاب وهو متنرفز: هذا واحد ماتنفع معه الجمايل
سالم :عرفت من هو
عقاب بسخرية:يقول نادني الغريب
صقر وهو يوقف عندهم هو وسعود :العب يا الغريب
سعود :والله انه يدور حرش من اول يوم
عقاب :ما علينا منه امشو نروح لجدي قال يبينا اليوم
.
.
.
.
.
عند بيت الجد
دخلو البنات عند الجده وبعد ما سلمو عليها سالوها من منيفه وقالت انها في المطبخ راحو لها ركض
ترف :منيفه منيفه
منيفه::بسم الله . . وش بلاتس .ومتى جيتو
ترف وهي تلقط انفاسها وتتجاهل اسألت منيفه :صار عندكم جيران
منيفه :يا كثرهم
الهنوف :لا جيران جداد في بيت مضحي
منيفه:وش رجعو عياله
لطيفه :لا يقول انهم باعو البيت
جميله بحماس :يعني ناس جديده ما نعرفها
ترف وهي تسحب منيفه وتمشي لشباك المطبخ .. منيف :يا مالا الماحي تبين الرجال يشوفونا
ترف :اسكتي بس وحطي الشال على راستس
وتجمع الكل عند الشباك يطالعو جارهم
سُلاف وهي تدف ترف :وجع يا ترفوه خليني  اعاين
ترف بضحك :وش تعايني والله انتس طالعتيه عند الباب لين قلتي امين
الهنوف وفي تكمل لترف:بس باقي ترسمه
كانو بيتهاوشون بس قاطعهم صوت منيفه :بنات  يشبه ابوي
جميله بضحك :الله يقطع شكلتس يا منيفه
التفتت عليها منيفه وهي تضربها :وجع يوجعتس أنتي الضاهر نسيتي اني عمتك
سُلاف : معليش منيفه بس جميله صادقه ولا تشبهي ذا الزين كله بجدي
منيفه بشهقه وهي تضربها :الى ابوي عاد
لطيفه وهي تقفل الشباك بسرعه :بنات عقاب
جميله بخوف :ليكون شافنا
لطفه :ما اتوقع كان يتكلم مع سالم
.
.
.
كان علي مشمر أكمام ثوبه ولاف شماغ ابيض على راسه ويدخل الاغراض الي كان محملها في سيارته . . نزل آخر شي بعد شغل ساعه وهو يمسح جبينه ويجلس على عتبة الباب يناظر لباب جده وهو يفكر ان ورا هذا الباب الناس الي غربو ابوه حس بحقد يسري في قلبه وهو يتذكر حزن ابوه
:والله ثم والله اني لطلع حقه من عيونكم
قطع تفكيره نفس الشباب الي شافهم قبل ساعه وهم يتجهو لبيت جده وعرف انهم عيال عمنه وابتسم بسخريه وهو يطالع في عقاب الي كان واقف يناظره .بمعنى في شي
ما اعطاه اهتمام وهو يشيل باقي الاغراض ويدخل للبيت
سالم الي رجع لعقاب لأنه ما دخل :عقاب خير وش فيك واقف برا
عقاب :ابد ولا شي لاكن واضح انها بتصير مشاكل
سالم بعدم فهم :وش تقصد
عقاب :ابد سلامتك .خلنا ندخل
___________
في بيت زايد
كانو جالسين يتقهوون زايد ومنال  ومعاهم ولدهم سيف وفي حجره بنت اخته نايمه
دخلت الجوهره وبابتسامه لاخوها :يا بعد حيي يا سيف .والله انك مسوي فيني خير ماسكها لي
سيف بضحك :اي ماسكها لتس بس كل شي بحقه وانا اخوتس
الجوهره :ايه هاذي علومك خابرتس
ابو علي وهو يرحب في وهج الي أقبلت عليهم :
مرحبا ماهيب مره ولا عشرين مره
لين يقطع صوتي ويبتدي ترحيب عيني

تقدمت وهي تقبل راس امها وأبوها وتجلس  .الجوهره وهي تتصنع الغيره :اي أما أنا ما حد يرحب بي
ابو علي :معليش لاكن لزوم نرحب في آخر العنقود .كملو سوالف وضحك الين نطقت وهج الي التفت عليها الكل :يبه
ابو علي: لبيه امري وانا ابوتس
وهج :متى نروح لعلي
ابو على وهو فاهم خوفها على علي :متى ماتبون لو باتسر 
الجوهره وبحماس :اي يبه حنا  مجهزين كل شي
سيف وبتأييد:ومنها نساعد على اكيد انه محتاس بروحه
لف ابو علي لمنال :ها وش شورتس
ام علي :والله أنا معك ان رحت ولا قعدت
الجوهره وهي تصفر :اوه يا يمه والله منتي بهينا . . . فزت ألمها من نومها
سيف وهو يضرب الجوهره :بشويش طيرتي عقل بنتس
شالتها الجوهره وتتكلم معها بلطف وبعد كل كلمها تطبع قبله في جميع أنحاء وجهها: يا روح امتس يا قلب امتس ياعيون امتس يا بعد حيي وحياني  فجعتس وانا امتس .. ارتفع صوت ضحكت ألمها البريئة الي خلت الكل يضحك معها
.
.
.
.
في الديره بيت الجد
عند البنات في المطبخ يجهزو الغداء
سُلاف :بنات وش تتوقعو اسمه
لطيفه:منهو
سُلاف:الجار
منيفه بضحك :انتي للحين تفكري فيه
ترف :شكلتس طحتي وما احد سمى عليتس
سُلاف وهي ترمي الي في يدها عليها:يأملا الماحي لا تسمعتس جده
الهنوف وبضحك :يعني معترفه
سُلاف :والله إذا تبو الحق انه جازلي
منيفه وهي تضربها:استحي على وجهتس يا بنت
سُلاف وهي تحك مكان الضرب :هو وانا وش قلت
منيفه:اقول شغلي يدتس بدال لسانتس
سُلاف:زين زين يا دافع البلا ما تخلو الواحد يسرح بخياله
منيفه بتهديد :سلافوه
سلاف :سكتنا سكتنا
________________________