مديت لك قلبً ماطاله احد غيرك

البارت الخامس

وقفت ورا الباب وهي تشوف شخص غريب يتقدم لاخوها .كان اطول من اخوها ولابس ثوب اسود شاد عل أكتافه ومشمر اكمامه وفوق كتفه شماغ احمر له شعر طويل نسبين يتطاير مع نسمات الهواء ..لاكن كان بنسبه لها شخص مهيب .. كانت خايفه على علي الي كان قدامه هذا الشخص وبعدها تقدّم شخص ثاني .. شعرت ان ضربات قلبها تتسارع من  الخوف وهي تشوف العصبيه في وجه الشخص الي قدامه وما هي الى ثواني وطاح اخوها وبدون اي تفكير ركضت له
.
استند على الجدار بجنب الباب وهو يحس الدنيا تدور فيه بسبب راسه الي صقع في العتبه  وانفه صار ينزف  . . . جاه صوت وهج الي جلست على الارض بجنبه وهي تبكي  :عـ علي
علي وهو يحاول يرد عليها لاكن حس ان لسانه ثقيل والدنيا تدور فيه . . . صارت تبكي بشكل هستيري وهي تشوف الدم الي غرق ثوبه وهي تهزه علشان يرد
شد علي على يدها يبي يطمنها ونطق بصوت ثقيل :أنا بخير ادخلي
ما وقفت بكي وهي تهز راسها  وصارت  ترجف بشكل ملحوظ  :لا تموت لاتموت  .لا تخليني
قاوم علي الوجع الي يحسه وضمها لصدره وهو يقول  . مارح اموت شوفيني مافيني الى العافيه . . . . بهاج لا تموت لا تخليني . . . اغمض عيونه بعمق وهو يشد عليها  لين حس فيها ترتخي وصوتها ينقطع . . . أبعدها وهو يضرب وجهها بخفه . . . وهج وهج . .
.
.
.
وقف مصدوم من المشهد الي صار  قدامه ولا قدر يرفع عيونه عنهم وسالم  الي صد مكان اقل صدمه منه
سالم :الله يلعنك يا عقاب وش سويت . . مكان من عقاب اي رد صح كان متقصد يضرب علي بس ما فكر ان معه احد ثاني
سالم وهو يهزه :عقاب اكلمك أنا وش نسوي
حط يديه على رقبته من الخلف  وهو ما يدري وش يسوي
.
.
طلعت منيفه من البيت تبي تروح لبيت فهد الي كانو البنات مجتمعات فيه لاكن صدمها شكل عقاب وسالم والشخصين الي على الارض  رجعت للبيت وهي تركض دخلت المجلس الي فيه ابوها واخوانها
ابو متعب :علامتس يا بنتي
منيفه وهي تلقط نفسها :عقاب عقاب وسالم
ابو عقاب وهو يفز :وش فيهم احتسي 
منيفه :طاقين جارنا
خرج الكل على عجل
.
.
.
عند علي الي ما كان قادر انه يوقف  ويحس الدنيا اظلمت في عيونه واخته الي مغمي عليها حالها اردا منه رفع نظره لعقاب وبكلام ثقيل :سـ ـيف نادو سيف
سالم وهو يعقد حواجبه :منهو سيف
علي وهو بالغصب يتكلم :اخوي جوا نادوه
تقدم سالم وهو يدخل لبيت علي وينادي :يا اهل الدار يا سيـ . . صدّ بسرعه وهو يشوف البنت الي فتحت الباب
.
.
قامت وهي تشوف ان وهج ماهي موجوده خرجت من الغرفه تشوف وينها لاكن ما لقتها في البيت توجهت لباب البيت تفتحه لاكن رجعت وراه بسرعه وهي تشوف شخص غريب :مين انت
سالم نادي سيف
الجوهره بستغراب :وش عرفك فيه ووش تبي
سالم بقل صبر :يابنت الناس ناديه اخوتس علي برا يبيه
ركضت لغرفة سيف وهي تفتح الباب بقوه لدرجه فز سيف
سيف :بسم الله
الجوهره :بسرعه قم  قم في رجال غريب يقول علي يبيك برا ولا لقيت وهج لا يكون صاير لها شي
قام سيف بسرعه وهو يلبس ثوبه ويركض لبرا
.
.
خرج وهو يشوف على الي طايح ومليان دم و وهج الي في حضنه :علي وش فيك وش صاير وش فيها وهج
علي بصوت خافت :جب السياره بسرعه
قام سيف وهو يدف عقاب وسالم  من قدامه وشاف الرجال الي طالعين من البيت الي قدامه صار يركض لسياره الي كانت تبعد مسافة من البيت
.
.
خرج فهد ومتعب والجد
تقدم ابو عقاب وهو يسحب عقاب :انت وش مسوي لرجال
تقدم ابو سُلاف لعلي  يبي يساعده لاكن وقف وهو يشوف البنت الي في حضنه
ابو متعب الي تقدم بخطوات ثقيله :يا وليدي قم خلني اساعدك
علي وهو يحس بحقد عليهم  ماتكلم
ابو متعب وهو يلف على عياله :تعال يا متعب شيل البنت
علي وهو يرفع صوته  الي بلقوه يطلع :لا احد يلمسها
عقاب للحين واقف ولا نطق
سالم :خلاص خلوه اخوه الحين يجي
ابو متعب بعصبيه :شلون نخليه وانتو الي طاقينه التفت لعلي لاكن معاد  قدر يحرك ساكن وهو يشوفه قدامه

.
.
كانت تلف في وسط البيت ومو قادره تصبر قررت انها تاخذ عبتها وتطلع لاكن وقفها صوت ابوها :الجوهره وين بتروحي
الجوهره وبسرعه :يبه علي ووهج مو موجودين وجا رجال يبي سيف اخف صار فيهم شي
ابو علي الي ركض اول ما سمع كلامها للخارج وهي وراه جلس عند علي الي شبه فاقد للوعي ووهج ولا انتبه للموجودين
ابو علي :علي  تسمعني وش صاير
الجوهره بخوف :يبه وش فيهم
علي الي كان يسمع الأصوات بعيده  نطق بثقل :وهـ ج يبه
رفع راسه يدور سيف لاكن تعلقت عيونه في عيون الي قدامه
.
.
وقف الكل بصدمه الى عقاب وسالم الي مو عارفين الي قدامهم
كان ابو متعب مركز عيونه على الي قدامه وهو يتأكد ان نظره مو خاينه لف على فهد ومتعب .:هو
فهد هز راسه اما متعب لازال مركز على الي قدامه
ابو متعب الى عينه في عين الي قدامه :زايد
صار يضحك بعدم تصديق :اي والله انك زايد
وصل سيف وهو يدق بوري
ابعد الكل ونزل توجه لوهج وشالها وراح لسياره ورجع  شاف ابوه مو مركز معاه وعيونه على الأشخاص الى قدامه :يبه .  رفع صوته اكثر .يبه
التفت ابو علي على سيف الي نطق :ساعدني نوديه لسياره .  سندو علي الي فقد الوعي كل واحد من اتجاه يتجهو لسياره حطوه عند وهج في المقعد الخلفي وركب سيف التفت زايد على الجوهره :ادخلي عند امتس وبنتس ولا تعلميها بشي توجه لسياره لاكن كانت يد متعب اسرع . . شال يد متعب :مو الحين 
مو الحين ..
.
وقف الكل يناظر لسياره الين ما اختفت
ما قدر اي احد انه يتحرك من مكانه شعور  غريب اجتاح الكل وشلون بعد كل ذي السنين . . عند عقاب الي مو مصدق الي صار للحين الي صار لدقايق يحس انه صار بدهر  في تساؤلاته كثيره براسه .هل علي بخير .من ذي البنت وليش  انهارت كذا .هل هذا الشخص عمه .يعني سيف وعلي عيال عمه . . .
سالم وهو يحاول يرجعهم للواقع :يبه خالي فهد خالي متعب عقاب .خلونا ندخل شوفو الناس تناظر
انصاع الكل لكلامه بشكل غريب واتجهو للبيت .الي عقاب
سالم :عقاب ادخل
عقاب بهدوء :بروح للبيت
.
.
جلست هي وامها في الحوش ينتظرو 
احد يجي يعلمهم وش صار
فزت منيفه وهي تشوف الباب ينفتح :وش صاير .مالقت منهم اي رد
ام متعب بخوف :يا متعب وين ولدك . . . هاو عالمك انت وهو وش صاير علمونا نشف دمنا
تقدم متعب وهو يجلس عند امه :يمه ابشرتس
ام متعب :خير ان شاءالله . . خير خير يا يمه
نظر لابوه وبعدها امه :قرت عينتس يمه زايد رجع . . انت تقولها صادق . . اي والله اني صادق . . وقفت وهي تتجه لأبو متعب :هو صادق زايد رجع . . هز راسه والدموع في عينه . . اي والله انه رجع . . وينه وينه ودوني له . . تقدم ابو سُلاف  وهو يطمنها:بيجينا بيجينا راح مشوار وراجع
ام متعب :متاكد بيجي . ايه بيجي وان ما جا اوديتس له . جلست وهي تبكي بفرح :الحمدلله الحمدالله
.
منيفه وهي تقرب لسالم وتهمس له :عقاب وش مسوي . . اسكتي بس تخيلي انه طاق ولد اخوك الي ما بعد نعرفه . . ياويلي وينهم الحين . . في المستشفى . . بسم الله وش فيه عقاب انهبل . . والله مادري وش صار كل شي صار بلحظة. . واخوي كيف شكله . ضحك وقال :بتشوفيه ان شالله. . معاد فيني صبر . .  تصبري كم ساعه
.
.
دخل البيت ولقى امه قدامه قرب يبوس راسها . نطقت امه بتفحص صاير شي .. عمي رجع . . صارت تبتسم بفرح :يا سعد عينك يا متعب .يمه أنا بروح أريح شوي . انت وش مكدر خاطرك مو قلت عمك رجع . . ولا شي يمه بس تعبان شوي بريح . . . . . قام وهو يتوجه لغرفة قفل الباب وهو يرمي نفسه على السرير  حاول ينام لاكن تأنيب الضمير ما خلاه  كل ما تذكر شكل البنت وخوفها على علي . وناقد على نفسه ليش ضرب علي من الاساس ما قدر ينام ولا قدر يرتاح وقام وهو يخرج من الغرفة ومن البيت متجاهل سؤال امه وين بيروح

____________________