كانت فاطيما اول ما وصلت الفندق وعرفت ان الفندق دا الل كل موظفين الشركه بينزلوا فيه فتره تواجدهم راحت الريسبشن تسأل عن معتز لكن مكنش موجود وعرفت انه ف خلال يومين ممكن يكون موجود علشان هيحضر الاجتماع ... راحت اتعشت واتعرفت ع رويدا واتكلمت معاها واخدت الايس كريم وراحت قعدت جنب اصحابها وفتحت موابيلها علشان تبعت لسلمى وماريا وتطمن اهلها كمان وتشوف معتز لاقته بعتلها رساله الصبح بيطمن عليها وبيقولها " وحشتينى جداا ..اشوفك قريب ""
ابتسمت فاطيما وردت عليه وهى قاعده شافت اصحابها متجمعين عند واحد منهم فضول فاطيما شدها
فاطيما: فى ايه يا جماعه كده
هاله: واضح اننا هنسمع خبر خطوبه رويدا قريب
فاطيما :بجد وعرفتوا منين
هاله: اها انتى متعرفيش ..دى بقالها سنه مرتبطه بواحد اتعين جديد ف الشركه بقاله سنتين وع طول مع بعض وع حسابه وحسابها صورهم مع بعض فى كل سفريه وكلام وكده هما شبه مخطوبين بس الرسمى قريب
فاطيما بفضول: ورينى كده شكله ايه دى نخله
محمد: بصى اهو دا الاكونت بتاع معتز
فاطيما تلقائى : خساره فيه الاسم .. ورينى
بصت فاطيما وكانت الصدمه شافت معتز هو الل متصور مع روايدا وبصت ع الاكونت لاقته غير الل معاه ...مكنتش مصدقه الل شافته وبصت كويس لاقت ان دا الاكونت مختلف فعلا عن الل معاه ...
فاطيما مصدومه : هو دا الل بتتكلموا عنه مع.. مع..معتز
هاله: يابنتى انتى مبتشوفهمش مع بعض دول ع طول قاعدين مع بعض وبياكلوا مع بعض خلاص يعنى كل الموجودين ف الشركه مستنين ارتباطهم رسمى خلاص وبينى وبينك سمعت انه قريب اووى
فاطيما مش مجمعه الل سمعاه ولا الل شايفاه عقلها وقلبها رافضين يسمعوا ويصدقوا لكن عنيها الل شافت بتفكرها بالصور زى الفلاش وهى واقفه الايس كريم وموابيلها وقعوا محستش ..
هاله: طيما.. فى ايه يابنتى موبيلك وقع عليه الايس كريم وبهدلتنى الدنيا
فاطيما بصت : سورى .. سورى
وطت فاطيما تمسح وايديها بترتعش والموبيل بيقع منها
هاله: مالك يا بنتى .. اوعى اوعى خدى موبيلك واطلعى ارتاحى ف الاوضه
فاطيما مسكت موابيلها وطلعت ع الاوضه عماله تتخبط وهى ماشيه ف الناس راحت اوضتها قاعده مش فاهمه الل شافته مسكت موابيلها فتحت الرسايل شافت اخر رساله من معتز وتوقيتها " وحشتينى " وافتكرت اخر مكالمه معاه وعاشت لحظه نكران : لالالا اكيد هما فاهمين غلط .. علاقتهم علاقه زمايل شغل وعادى بيتصوروا ... عادى دى الحقيقه زمايل وعادى
فضلت طول اليوم تراجع رسايل معتز وكلامه وكلام الل سمعاه وقلبها رافض وعقلها وقف عن التفكير ودخلت ف حاله نكران الل شافته وسمعته رفضاه ف معرفتش تنام .. نزلت المطعم ف الفندق وطلبت اكل بكميه غريبه
وقعدت تاكل وهى مش حاسه بالاكل وبتقول ل نفسها: اكيد مش صح .. اكيد زمايل شغل وهما فهموا غلط معتز بيحبنى انا بس .. مبيحبش غيرى انا واثقه ..مفيش حاجه بينهم انا متاكده لالا
وفاطيما عماله تاكل مش اكل جوع بتاكل تلهى نفسها بطريقه غريبه بتاكد لنفسها ان كلامهم غلط وبتطلع مبررات ل معتز ع صوره وع ايميله الجديد ... ف الوقت دا كان عامر موجود فى الفندق ونزل عادى لاحظ فاطيما والاكل الكتير الل قدامها فقرب منها : طيما
فاطيما بتاكل ومش سامعاه
عامر قرب: طيما
فاطيما انتبهت بصت لاقته عامر راحت وقفت الاكل : مستر عامر
عامر: انتى بتتعشى متاخر ولا ايه
فاطيما بصت ع الاكل اتفاجئت بالكميه وان دا مش عشا ل انسان طبيعى
بصت ل عامر : ها.. اصلى جعانه
عامر:تسمحيلى اقعد اتعشى معاكى
فاطيما بتوتر: ها.. اتفضل
عامر قعد وطلب الاكل ولاحظ فاطيما متغيره مبتتكلمش وبتاكل بطريقه غريبه حس ان فى حاجه : فاطيما..انتى كويسه
فاطيما متوتره: ها.. اه كويسه كويسه جدااا
عامر: انا مش شايف كده ..لو ف مشكله قوليلى يمكن اقدر اساعدك
فاطيما بصت ل عامر وكانت عاوزه تسأله ع اخته ومعتز لكنها مقدرتش او معنى اصح مش عاوزه تسمع تاكيد منه عاوزه تسمع من معتز : لالالا مفيش جعانه ..جعانه
راحت بصت ل الاكل وبتاكل وعامر مستغرب من حالتها ومش فاهم فى ايه ...
خلصت فاطيما الاكل بسرعه وطلعت اوضتها وشويا معدتها وجعتها دخلت الحمام رجعت كل الل اكلته وقعدت ف الحمام وبتردد : اكيد هما كدابين ..اكيد هما كدابين معتز بيحبنى انا ..
أنت تقرأ
طيارة ورق
Romanceالحب لا يهتم بالوقت او المكان يحضر عندما لا نتوقعه ..الحب يمكن ان يسبب الم بقدر ما يسبب سعاده هناك من يفقد صوابه وهناك من يحلق فى الاحلام ويطير ع اجنحه الحب كـ الطيارات الورقيه وينفصل عن الواقع ومادياته ... فهل ستستمر الطياره الورقيه فى الطيران ام...
