أذان مثقوبه لنيشان الخطوبه

٧

الفنجان السابع

عندما تطرق الفرصه الباب بعضهم يشكي من الضوضاء

حكمه اعجبتني

لست سلبيه فقط منطقيه انساق لعقلي وتحليلاته اكثر من قلبي ... اخاف على قلبي من الجرح ليس جبنا وانما حذرا فقط

باب الغرفه يفتح بدون قرعه ( نعم انها امي )

=== شذر ماما
*** نعم حبيبتي ... حياتي روحي
=== بلا لواكه وكومي جيبلنه جم شغله عمتج وبناتها حيجون اليوم
*** شنووووو ؟؟؟ شوكت كالو اليحجي هسه
=== ليش ينرادلهم موعد مثلا همه اهل البيت
*** بس اني متواعده ويه البنات شلون
=== اخذي البنات وطلعو منو لازمج
( متاكده انكم تشعرون بورطتي .... علي رؤيه احمد اليوم فنحن نحاول الحصول على اطول وقت ممكن معا واستثمار كل لحضه )

اتصلت به
### هلو حبيبي

*** هلو حمودي شلونك

(بلنسبه لي لا لكلام معسول لست متاكده منه )

### ماكو شي بس مشتاقلج ... اكلج خليها فد ساعه ونتلاكه ليش للعصر
*** ممممم المشكله اصلا محكدر
### ليش ؟؟؟
*** بيت عمتي جاين يمنه
### زين ؟؟
*** بناتهم بعمري .... ماما كلتلي اذا تطلعين اخذيهم
### اي حبيبتي اذا حلوات شكو بيه ميت هلا

احسست بحقد عليه .... قد لا اكون متيمه به ولكنه لي انا لوحدي
انهيت المكاله متعلله بلاستعجال وبلحقيقه من غضبي الذي يبدو انه شعر به رغم محاولتي الفاشله للاخفائه

رساله
### اموووووت على اليغارون وميحجون

ثقته القاتله تزعجني .... قد تسبب في لحضه عناد مني الى كارثه فهذي الثقه تستفزني كثيرا

********
حينما وصلوا ضيوفنا ... كنت قد اندمجت تماما مع
ايه ( ابنه عمتي ) ونسيت حتى موعدي
تشابه كبير في شخصيتي معها .... وقد نتشابه حتى في الملامح

*** احجيلي شكو ماكو اخبار
،،، والله حبي الاخبار يمج
*** على حطت ايدج
لم استطع اخبارها باي شي فلا تسميه لوضعنا بعد والتفاصيل التي اعتبرها مهمه هيه مجرد نقاط بسيطه لا تشكل اي معنى للغير ... ففي العلاقات وحدهم المعنيون هم من تشكل البسمه والتنهيده علامه فارقه ...

حين وصلت رساله منه كان هاتفي بين يدي ايه .... انقذتني سما في تلك اللحضه بعد ان لاحظت ارتباكي

--- شووو انطيني التلفون ايه .... عوفيج منه واحجيلنه شصار وياج
،،، بعدني نفس المعناه لتذكريني

بصراحه شت تفكيري عنهم .... لقد كان فحوى الرساله بسيط جدا وعادي... ولكن لا اعرف لماذا حروفه تجرني الى مكان اخر

--- مو بله شذر
*** هو اني اصلا شفاهمه من موضوعها .... احجيلي من الاول

*****
حين اتصلت شذر والغت الموعد احسست بفراغ شديد ..... عاده حين كنت اتي الى هنا كنت مشغول طوال الوقت بين الاقارب والاصدقاء .... ولكن الان لا يحلو لي امضاء الوقت سوى معها