يــمــســح الــدمــعــة بــشــكــوى

الجــزء # الـثـامـن عـشـر ..

انحنت امي علي اكثر وضمتني وخدها على خدي وتدعي الله يحفظني لها بصوت باكي وتدعي على نايف

غمضت عيوني مستمتع بحنان امي ... من زمان عنها ... تزوجت وانشغلت عني

ابتعدت امي عني واعتدلت واقفة والتفتت لعمي معصبة

امي = ماني متطمنة على ولدي وهم مامسكوه ... ليه ماتمسكه الشرطة ؟ .. ليش هالاهمال ...

عمي = استهدي بالله .. هم يدورونه الحين ...

رفعت حواجبي مستغرب .. عليه حظ هالنايف هذا ... قبل الهيئة تدور عليه ومالقته .. والحين الشرطة ..

طالعت الدريشة ابي اعرف كم مر علي بالمستشفى

التفتت لمصعب اللي واقف فوق راسي وهمست

عمر = حنا الحين بأي وقت ؟

مصعب = الظهر الساعة 12 .. باقي ما اذن

طيرت عيوني منصدم .. الظهر ... يعني انا من المغرب امس الى الظهر ماني داري عن حالي

قام عمي واقف

عمي = يله قربت تخلص الزيارة .. خلوا عمر يرتاح ( والتفت لي ) عمر العصر بيجي جاركم ابو احمد وعياله .. واخوياك اتصلوا على مصعب يبون يجون يسلمون عليك

ردت امي على عمي منفعله

امي = انا ودي ازوره العصر .. يمكن يحتاجني

مها = ام عمر وحنا وشوله جايين الحين .. انا وانتي مانقدر الا الصبح .. العصر للي يبي يزور من الرجال

امي بعصبية = وانا ابي ازوره العصر .. يمكن يحتاجني والا شي .. اذا كنتوا ما انتوا جايبيني العصر ابقعد هنا

زفر عمي بطفش = انا لله ( والتفت لامي معصب وبصراخ ) وش فيك انتي يامره ... تجلسين عنده وهو بقسم الرجال ... خلاص زرتيه الحين ما حنا جايبينك العصر .. يله بس مشينا

قربت مها مني وهمست تعلق على امي

مها = وش يطلعها امك الحين هههههههههه

طالعت عمي بقهر وانا اشوفه يهاوش امي

امي بعصبية وهي تكلم عمي = امه اهـم والا هـ

قاطعت امي ... وبذلت مجهود عشان اطول صوتي

عمر = يمه

مابيها تاخذ وتعطي معه ... ما اتحمل اشوفه يصارخ عليها قدامي واتفرج .. اقنع امي باسلوبي احسن

التفتت امي لي

عمر = ماعليك يمه .. ترا فيه ممرضين اذا احتجت شي اقولهم

طالعتني امي وهي ساكته .. واضح عليها تبي تبقى معي .. و ماتقدر تقول شي

ابتسمت لها