الجن العاشق

1

"صباح الخير, يا مدام "بواب العمارة قال

النهاردة كان اول يوم ليا فى الشقة دى وبعد ما وضبت كل حاجتى كنت تعبانة جدا ومرهقة

الشقة كانت نوعا ما رخيصة فكانت مناسبة ليا جدا خصوصا بعد اللى حصل

*عودة بالزمن*

رجعت بدرى النهاردة من الشغل وحبيت اعمل لجوزى مفاجأة بس واضح ان هو كان عاملى مفاجأة من نوع تانى خالص المهم دخلت شقتى وندهت على جوزى محمد بس هو مردش عليا بس انا متأكدة انه فى البيت لآن النهاردة الاربع يوم اجازته من الشغل

بس انا سمعت صوت من اوضة النوم وقلت اكيد ده التليفزيون , دخلت الاوضة ولقيت..... صديقة عمرى مريم وجوزى على السرير!!! وقفت واتمسمرت فى مكانى مش عارفة اعمل ايه اتصدمت

صديقتى من ايام الطفولة وجوزى بقالنا 5 سنين نعرف بعض وسنتين متجوزيين يعمل فيا كده!! مش قادرة استوعب اذا كان ده حقيقة ولا خيال

اتمنيت انى بحلم, دعيت ان ده يكون كابوس مش حقيقة بس للاسف اللى قدامى ده كان حقيقة

طبعا معرفتش اعمل ايه فرجعت لورا خطوة ورا خطوة وجريت برا الشقة قعدت على السلم وفضلت اعيط مش قادرة اصدق اللى انا شوفته ده

*العودة الى الحاضر*

بعد الطلاق , بعد ما بقيت 'مطلقة' وعار على المجتمع زى ما ناس كتير قالولى والناس كمان قالوا ان انا اللى غلطانة وكمان قالوا ان انا اللى كنت 'مقصرة' معاه

تقبلت الواقع وقررت انى اعيش حياتى بالطول والعرض وانسى بقى

الشقة دى فى منتهى الجمال اهو بقالى 3 شهور قاعدة فيها ومبسوطة على الاخر بس كان فيها مشكلة واحدة وهى انها فيها حركة غير طبيعية! كنت علطول بحس ان فى حد معايا معرفش ازاى وكمان كنت بحس ان فى حد بيتفرج عليا وانا بغير هدومى او وانا بستحما! معرفش ليه وازاى معرفش اى حاجة

وكمان لما بعيط بحس ان فى حد بيحضنى حاسه ان ده خيال وعقلى الباطنى بيهيائلى بالحاجات دى عشان انا بقالى كتير عايشة لوحدى مش اكتر بس انا حاسه ان الاحاسيس دى 100% حقيقة

فى يوم كنت واخدة اجازة كام يوم من المكتب اتفاجأت بجرس الباب وهو بيرن وعادة مفيش حد بيزورنى اصلا ففتحت الباب ولقيت شاب فى منتهى الجمال ومعا شنطة ظهر كبيرة وواضح انها تقيلة

''السلام عليكم"