الجن العاشق

5

الصوت مخفش بالعكس زاد اكتر! مكنتش عارفة اعمل ايه ميرنا نامت بعد عناء طويل بأني اقنعها انه كله تمام 

دلوقتي الساعة 6 ونص الصبح انا ويارا لوحدنا في الاوضة مفيش اي صوت غير صوت القرأن 

قلقانة اوي ومستغربة كل اللي بيحصل حواليا لان ده لايمكن يكون حقيقة غريب اوي قطط سودا وبيضا وايميل غريب وراجل اغرب ودولاب خزين بيتفتح كل ده مش منطقي خالص مش قادرة استوعب ايه اللي بيحصل معايا ده يمكن ده بس مجرد حلم مش اكتر ومفيش حاجة زي ديه بتحصل! ايوة اكيد انا نايمة دلوقتي هو حلم طويل مش اكتر او كابوس! اكيد هصحي وكله هيبقي تمام 

مش عارفة انام ويارا نامت دلوقتي الساعة 8 ومفيش صوت خبط علي الباب ممكن تكون القطة جعانة او جاية تنتقم مني عشان مفكراني انى قتلت صاحبتها! معرفش بقي 

لازم اصحي دلوقتى وانا لسه منمتش اساسا عندى شغل ومشواير كتير وانا اساسا خايفة اقوم من علي السرير

يارا : صباح الخير

انا : صباح النور

يارا : اسفة بجد راحت عليا نومة انتي منمتيش خالص ؟ 

انا : اه معرفتش انام المفروض ابقي صاحية اساسا عندى شغل كتير النهاردة 

ميرنا : فيه ايه موتنا ولا لسه 

انا : بس يهبلة يلا نقوم نعمل فطار

يارا : انا خايفة اخرج بره انتي بتهزرى بعد اللي حصل امبارح 

انا : يبنتي متخافيش احنا مع بعض ان شاء الله مفيش حاجة 

قومنا ودخلنا الحمام نلبي نداء الطبيعة وبعد كده دخلنا المطبخ القرأن شغال زي مهو ودولاب الخزين مقفول عادى زي مسبته امبارح 

انا :  يمكن كانت تهيؤات فعلا 

يارا : او العفريت واخد بريك انتي بتهزري

ميرنا : بلا فطار بلا هبل انا هاخد حاجتي وهمشي 

انا : استنو بس 

فتحت اللابتوب وبعت رسالة لصاحب البيت القديم الاستاذ احمد عشان يحكيلي اذا كان بيحصل معاه نفس الحاجات دي لما كان عايش هنا ولا لا واستيت كتير انه يرد بس مردش , بعد يوم طويل من التفكير والشغل قعدت بالليل في المطبخ وكنت لوحدي يارا وميرنا مرضيوش يباتو معايا تاني ولكن انا اصريت اني افضل هنا 

كان في دماغي فكرة واحدة بس وهي كل ده حقيقة ولا خيال كنت محتارة جدا وخايفة فاجأة جاتلي رسالة من الاستاذ احمد هو كان راجل مش كبير اوي في السن يعني حوالي 45 سنة تخين شوية واقرع وكان دايما بحس تصرفاته غريبة بس مكنتش بتعامل معاه كتير يعني , بيقولي انتي حصل معاكي ايه ؟ ,

المحادثة بينا جريت باللشكل ده 

انا : سمعت اصوات غريبة من قطط وكأن قطة بتخربش في باب الشقة وكمان لقيت قطة بيضة ميتة قدام الباب وكان فيه قطة سودا لازقه قدام الشقة دايما وده غير اني بصحي الاقي باب الدولاب في المطبخ مفتوح وساعات القرأن اللي ببقي مشغلاه مقفول وده غير اني  بحس ان فيه حد بيراقبني وبيلمسني وانا نايمة او في الحمام والموضوع قلقني جدا معرفش ممكن يكون مجرد تهيوؤات عشان اول مرة اعيش لوحدي , ياتري حاجات مشابهة كانت بتحصل مع حضرتك؟

هو : اها, بصي انا هكون صريح معاكي 

انا : اتمني 

هو : بصراحة يعني دي مش تهيؤات مراتي الله يرحمها كانت بتعاني من الموضوع ده بردو ومعرفش سببه بس ساعات بحس انه فيه طاقة غريبة في الشقة ولكن كنت فاكر انها مجرد هلوسة او حاجة زي كده بس للاسف لا 

انا : واو انا مش عارفة اقول ايه يعني ده جن ولا ايه مش  فاهمة 

هو : ممكن اقابلك واكلمك علي راحة اكتر ؟

انا : اه اكيد 

واتفقنا علي اننا هنتقابل بكره في كافيه قريب من البيت وهنتكلم عن الموضوع ده , كلامه قلقني جدا وكنت خايفة حتي ادخل اوضتي بس جمعت شجاعتي وشغلت سورة الكرسي  واتوضيت وصليت ركعتين ودخلت احاول انام شوية , لما قعدت علي السرير حسيت حاجة لمست كتفي وحسيت بنفس حد علي رقبتي قلت دي تهيؤات وقرأت قرأن وفضلت اتجاهل الاحساس ده لحد منمت 

تاني يوم صحيت لاقيت القرأن لسه شغال ومفيش حاجة غلط وحسيت بطاقة ايجابية غريبة عملت الفطار وابتديت استعد لليوم , وقعدت اشتغل علي اللابتوب شوية وانضف الشقة لحد مجت الساعة 11:45 وانا معادي مع الاستاذ احمد الساعة 12 جهزت نفسي ونزلت وصلت الكافيه وقعدت استناه.

الساعة 12:30 وهو لسه مجاش مش بحب الناس اللي مش مظبوطين في مواعدهم ابدا قررت اتصل بيه لاني زهقت جدا 

انا : الو 

هو : انا اسف جدا يا فندم والدتي تعبت واضطريت اروح معاها المستشفي انا اسف جدا نسيت اتصل بحضرتك اتمني مكنش ضيعتلك وقتك 

انا : اوه الف سلامة علي والدة حضرتك وعادي المهم صحة والدتك 

ونهيت المكالمة وانا في صدمة وحيرة لاني كنت في قمة الفضول اني اعرف قصته 

رجعت البيت وفضلت افكر في الايميل اللي وصلي اني امشي من الشقة بسرعة وده لمصلحتي حسيت ان في حاجة بتقولي متمشيش من هنا ونفس الاحساس ان حد بيتنفس علي كتفي كنت بترعش دايما