الجن العاشق

2

"السلام عليكم "الشاب المجهول قال 

"وعليكم السلام ورحمة الله وبركاته... اساعدك فى ايه ؟ "قولت فى توتر وثقة فى النفس فى نفس الوقت 

"انا اسمى (كمال) وجيت لحضرتك عشان عندى فرصة شغل ليكى كمصورة يعنى "قال بثقة واضحة فى نفسه 

و (كمال) كان اسم على مسمى زى ما بيقولوا! بس انا معرفهوش 

لكن طالما هو عنده فرصة شغل ليا زى ما بيقول ليه مكلمنيش على صفحتى على الفيس البوك او حتى كان بعتلى بريد الكترونى ثم انا اصلا محامية والتصوير ده موهبة وانا لجأت ليه بعد الطلاق لآنى حسيت انه المجال الوحيد المناسب ليه طول الفترة دى وكنت على حق 

ماشى يا فندم بس حضرتك عرفت عنوانى منين ؟؟! فعلا عرف عنوانى منين انا متخفية اصلا ومش بصور حد فى البيت عندى ومعنديش اى عنوانين ليه على مواقع التواصل الاجتماعى 

"لاقيته على صفحتك "قال فى توتر شديد

"بس انا مش كاتبة اى عنوان ليا على الصفحة" 

"ممكن طيب نتكلم فى اى كافية ؟"

اعمل ايه ؟ مينفعش اروح معاه فى اى مكان, انا معرفش حاجة عنه اصلا فقررت انى ارفض ولو هو عنده شغل ليا بجد يبعتلى بريد الكترونى وببساطة هو مشى وسابنى فى حيرة وفضول تام عنه

بس فى الاخر قدرت اتابع روتينى اليومى العادى الممل 

فى اليوم التالى صحيت بدرى عن معادى بشوية على حوالى الساعة 6 كده , النهاردة عندى جلسة تصوير مع موديل صديقة ليا على الساعة 10 يعنى بعد كام ساعة 

قررت انى اقوم من السرير وابطل الكسل اللى انا فيه ده بس فى حاجة بتقولى متقوميش وحسيت ان فى حد نايم جمبى على السرير خفت جدا وجريت على الراديو الصغير فى اوضتى وشغلته على محطة القرأن الكريم على اعلى صوت 

المشكلة انى اتفرجت على فيلم رعب امبارح باليل لوحدى وهى مش ناقصة رعب اساسا 

حوليت اكمل يومى عادى وادخل المطبخ واعمل فطار بس دخلت لقيت الباب بتاع دولاب الخزين مفتوح وانا متأكدة انى قفلته امبارح , بس كبرت دماغى وقولت عادى يمكن نسيت وتجاهلت الموضوع تماما 

الوقت جرى والساعة بقت 10 الا ثلث فقررت انى اجرى بسرعة على العربيةعشان متأخرش ولما فتحت باب الشقة لقيت قطتين واحدة سودة وواحدة بيضاء انا بحب القطط جدا بس ده مش وقته المهم وانا نازلة بسرعة على السلم القطة كانت نازلة ورايا تجاهلت الموضوع وقلت عادى بس لما روحت على عربيتى كانت عاوزة تركب معايا بس انا قفلت الباب بسرعة والقطة السوداء قعدت تنونو وكان وراها القطة البيضاء قاعدة تتفرج على الموقف لما تبص فى عنيها كده تلاقى شموخ مش عارفة بس كانت نظيفة اوى وحبيت انى اخدها او احتلها اكل بس انا مستعجلة , انطلقت بالعربية وكملت يومى عادى جدا ولا كأن اى حاجة حصلت ورجعت البيت متأخر شوية لآنى خرجت مع صحابى من زمان كان يوم طويل جدا

لما دخلت الشقة اكتشفت انى هسلم الصور بعد يومين ولازم ابدأ شغل عليهم من دلوقتى دخلت المطبخ ولقيت الباب بتاع دولاب الخزين مفتوح بالظبط اللى حصل النهاردة الصبح تجاهلت بردو الموضوع وقولت اى يعنى اكيد صدفة وانا سبته مفتوح جبت اكل وخرجت على الصالة وقعدت اكل فى صمت مفيش اى حاجة غير صوت القرأن اللى شغال والليلة مشيت على نفس النمط