الجن العاشق

6

حسيت انه كان بيكذب عليا او بيحاول يتهرب مني لان من صوته حسيت انه كان متوتر جدا ومش عارف يقول ايه وكان بيتهته في   الكلام, الموضوع اكبر من كده  وانا حساه ان فيه سر كبير مدفون جواه ومش قادر يخرجه او مش عارف يخرجه... فيه حاجة بتمنعه وانا هموت واعرف ايه هي. 

 قررت ابعتله رساله اطمن فيها عن صحه والدته يمكن اكون ظالماه وتكون الست تعبانه فعلا, بس رده فاجأني جدا وهو ان والدته عندها سرطان الثدي حاله متأخره! المهم اتفقنا ان احنا هنتقابل في كافيتيريا المستشفي اللي والدته محجوزة فيها. اتحمست جدا وكان عندي استعداد اروح ابات في المستشفي من دلوقتي من كتر فضولي!

واخيرا جه المعاد واتقابلنا 

انا : استاذ احمد ازاي حضرتك؟

هو : مقولنا بقي بلاش الرسميات دي يا نورهان, انا كويس وانتي عامله ايه؟

انا : الحمد لله, وايه اخبار والدتك ربنا يقومها بالسلامة ان شاء الله 

هو : بأذن الله, خلينا نختصر بقي واديكي اللي انتي جايه عشانه

انا : اها ياريت

هو : مراتي اتوفت من 5 سنين بعد متحجزت في مصحه نفسيه اكتر من 3 سنين كانت ابتدت تحس بطاقه غريبه وحركات اغرب في الشقه بس هي مكانتش بتصدق في الجن فاقنعت نفسها انها مريضه ولازم تتعالج بس انا متأكد انها مكانتش مريضه اللي كان بيحصلها في الشقه خالها توصل لحالتها دي, انا اسف جدا بجد انا ندمان اني اجرتلك الشقه انا كنت بس بحاول اتخلص منها ولكن الايام دي ضميري ابتدا ياكلني وحقيقي مبقتش مستحمل انا خسرت اعز الناس عندي بس الشقه الملعونه دي ومش عاوز ابقي مسئول عن خساره حد تاني!

انا : انا مش فاهمه حاجه يعني انت تقصد ان فيه جن فعلا في الشقه والجن هو اللي خلي مراتك تتجنن

هو : ايوة وانتي لازم تمشي من الشقه دي في اسرع وقت قبل متنضمي لمراتي

انا : من كام يوم جالي ايميل من شخص مجهول بيقول اني لازم امشي من الشقه وكلام غريب كده بس انا محطتش الموضوع في دماغي اوي 

هو : غريب محدش يعرف موضوع الشقه ده غيري! 

انا : مش عارفه انا حقيقي خوفت جدا غير ان اول يوم ليا في الشقه شاب جه وقالي انه عنده شغل ليا مع اني معنديش اي عناوين او اي حاجه يوصل لشقتي بيها معرفش الموضوع ليه علاقه ولا لا 

هو : الشاب ده كان شكله عامل ازاي ممكن توصفيهولي؟ 

انا : هو انا مش فاكره تفاصيل بالظبط بس هو كان جميل جدا جدا ورفيع نوعا ما وطويل وشعره بني فاتح وكان معاه شنطة ضهر كان واضح انها تقيله وقالي انه اسمه كمال وبعدها بفتره طلبت بيتزا والشاب اللي وصلها كان نسخه منه بس لما سألته اذا كان هو كمال او لا انكر بس بجد حسيت انه هو 

هو : غريب ممكن تكون صدفه او مش عارف الحقيقه المهم انا قولت اللي عندي ولازم امشي دلوقتي 

وبالبساطه دي مشي وسابني في حيرة وفضول اكتر واكتر بس قررت اني مش هسيب الشقه لحد منشوف اخرتها بقي ياما انتهي في مصحه زي مراته اللي ماتت اوانهي الجن ده!

رجعت البيت وافتكرت المنتدي اللي البنت كانت عارضه المشكله بتاعتها المشابهه لمشكلتي عليه ولاقيتها اخيرا ردت علي رسالتي وكان الرد كالتالي " انا محلتش المشكلة المشكلة ملهاش حل, او ليها حل وهو موتك! الجن العاشق لما بيمسك في حد مش بيسيبه الا لما يموت" 

جن عاشق ايه وهبل ايه! طريقه كلامها مريبه جدا وقلقتني ولو ده جن عاشق فعلا وحله الموت ليه هي مماتش وازاي عرفت الكلام ده؟؟

قررت مردش علي الرساله واتجاهل الموضوع وخلاص بس مع كل ثانيه احساسي ان حد بيراقبني كان بيزيد اكتر واكتر كنت مرعوبه بس فضلت اتجاهل واشغل قرأن في الشقه ال 24 ساعه.