أنا مش ورقة

الحلقة الثالثة عشر

محمد:طب وانت عملت ايه اديته الحاجات اللي طلبها 

عبدالرحمن:انا بعد ماوصلت البيت سالت نفسي هو هيعمل بالحاجات دي ايه وهيرجعهالي تاني وللا ايه دي غاليه عندي اوي

بس انا ازاي افرط فيها كده بسهوله

شرايط الاغاني عادي مش مشكله حتي لو حنيت لسماع الاغاني ممكن اشتري تاني

بس حاجات سها والهدايا كل حاجه منها.......كل حاجه بتفكرني بذكري حلوة معاها لو الحاج حسين اخدها هيديهاني تاني ..........

طب اديه شويه منهم واحتفظ بالباقي .....هو يعني عارف ايه اللي عندي

بس هو قالي انها دايما هتبقي عقبه في طريق التزامي وهتخليني اقع تاني

اعمل ايه.......

بس هو اكيد عارف ان ده الحل
وانا فعلا كل مااحس اني بقرب من ربنا لما بفتكر سها بحس اني ببعد

اكيد هو ده الحل

بس ازاي هو مش متخيل....... هو لو مكاني هيعمل كده يعني

سها خلاص هتسافر بكره.....انا حتي مااتصلتش اعتذرلها .....زمانها زعلانه دلوقتي ....

وكمان عايز خط الموبايل يعني مفيش فرصه اني اتصل بيها او تتصل بيه ولا رسايل ولا اي حاجه كده

هو بيقفل كل حاجه تربطني بيها وعايز الحاجات في اقرب فرصه

هو انا هفضل لحد امتي محتار كده وماليش وجهه

ااااااااااااه ماهو الحاج حسين قالي فعلا كده

طب ماانا ممكن احتفظ بالحاجات بعيد عن عيني ........ صح فكره برده

بس اكيد في يوم هضعف واطلعها تاني وتستهويني تاني زي مالحاج حسين قال

وبعدين هو قالي انا زي ابوك وده مش امر ده طلب وهو بيحبني

ممكن لما يلاقيني استجبت بسرعه يرجعهم ليه تاني في اقرب فرصه زي ماانا عملت .......اه صح برده

خلاص ماشي هنفذ طلبه وامري لله

بس انا ممكن لو اتاخرت للظهر ارجع في كلامي تاني خلاص انا هحضر الحاجات كلها دلوقتي وحتى اشيل الخط من الموبايل قبل ماسها تتصل بيه تاني

وبالفعل جمعت الحاجات كلها في شنطه كبيره

بس كان الموضوع صعب اوي قعدت اقول لنفسي بسهوله كده هتفرط في سها طب لو عرفت اللي انا عملته ده هتعمل ايه.....دا اكيد مش هتعرفني تاني

افرط في سها ........طب ماانا فرط في حق ربنا كتير........

لا خلاص مش هينفع كده لازم وقفه انا هفضل كده لحد امتي ماينفعش كده

انا انام دلوقتي واظبط المنبه علي الظهر عشان اصحي ادي الحاجات للحاج حسين

محمد:وفرطت فيها فعلا واتنازلت كده عنها بسهوله

عبدالرحمن:بصراحه وانا شايل الشنطه ورايح الجامع كنت متردد بس قلت كفايه كده انا مش هفضل كده كتير

محمد:وبعدين ايه اللي حصل

عبدالرحمن:اول مالحاج حسين شافني قالي انا كنت واثق انك هتيجي وقبل اذان الظهر كمان

محمد:هو الراجل ده ماله

عبدالرحمن:الراجل ده ماشاء الله عليه بيزرع فيك الارادة والثقه بالنفس وقبلها الثقه في الله وكأنه بيقولك هتقدر رغم كل الصعوبات وهتوصل وتتخطي كل العقبات

المهم بعد الصلاة

الحاج حسين:بص يابني انت دلوقتي حطيت رجلك على بدايه الطريق

ودلوقتي انت بقيت فاضي

عبدالرحمن:ماانا فاضي من زمان

الحاج حسين:لا انا قصدي فاضي من المعاصي لازم تشغل وقتك بالطاعات عشان مايكونش عندك وقت تفكر في المعاصي

عبدالرحمن:يعني اعمل ايه......صحيح حضرتك ماقولتليش انا ليه محاولش مع سها انها تلتزم

الحاج حسين:بص يابني الاول انت لازم تعرف ان الذنب اللي بتعمله وتستصغره او تصر عليه بكده بيصبح كبيره من الكبائر يعني ماتقولش ان ربنا تاب على قاتل مائه نفس وانا ماعملتش كده.......... انت كده هتتجرأ على الله يعني مثلا انت لما تسمع اغاني تقول انا احسن من اللي بيغني مابعصيش ربنا زيه........... ولما تكلم سها تقول دا انا احسن من اللي يبعمل كذا وكذا

وحط في دماغك دايما ان النية الصالحه لاتصلح العمل الفاسد والنية الفاسدة تفسد العمل الصالح

عبدالرحمن:يعني ايه

الحاج حسين:يعني لما مثلا تقوم تصلي ركعتين الصلاة دي عمل صالح صح

عبدالرحمن:صح

الحاج حسين:انت بقى لما تكون نيتك انك بتصلي عشان الناس تقول ماشاءالله عليه

يبقى كده نيتك الفاسده افسدت العمل الصالح

وبالنسبه للنيه الصالحه التي لاتصلح العمل الفاسد

ده بقى اللي انت عايز تعمله

عبدالرحمن:يعني ايه

االحاج حسين:انت دلوقتي نيتك ان سها ربنا يهديها وتلتزم زيك

عبدالرحمن:ايوه

الحاج حسين:لكن عشان تعمل كده لازم طبعا هتتكلم معاها وتقف معاها وحوارات وكلام ووووووو وده طبعا حرام عمل فاسد يعني

فنيتك الصالحه ان انت تهديها مش هتصلح العمل الفاسد اصلا وهو الكلام معاها
فهمت يابني

عبدالرحمن:فهمت

الحاج حسين:دا بالاضافه الى انك بعد كده ان شاء الله هتبقى قدوه واي حد ميعرفش الحلال من الحرام ممكن يقتدي بيك في العمل ده وتبقى سنيت سنه سيئه

محمد:طب وقالك هتعمل ايه يافاضي

عبدالرحمن:هقولك بكره ان شاء الله