يوم ربيعي مشرق و اجازتي من الشغل قررت استغلها في المكتبة. متعتي فعلا ان يبقى عندي كتاب بقراه، و بمجرد ما اخلصه، بروح المكتبة استعير كتاب تاني، و اسيب في اخره ملحوظة للشخص اللي هياخده بعدي انه ميبطلش قراءة ابدا.. يمكن القراية هي الحاجة اللي بتخليني اتطلع ليوم تاني.
كنت رايح ارجع كتاب خلصته عن الحضارات القديمة، و يمكن المرة دي اخد رواية كلاسيكية؟ و كعادتي بدأت اقرا الرواية في المكتبة عشان اتشد ليها كفاية اني اروح بيها البيت...
و قدامي قعدت بنت.. يمكن مشوفتش وشها اول ما دخلت.. لاحظت انها لابسة على رقبتها كاميرا، شعرها طويل، و فيه شنطة حطاها جنبها. قليل لما بلاقي بنات بييجوا المكتبة دي، ع الاقل في الوقت اللي باجي فيه انا... و حسيت اني متطفل اني بفصص كل تفاصيلها فرجعت اقرا تاني في كتابي. بس الفضول هو اللي بيقتل القط زي ما بيقولوا. لاحظت الكتاب اللي بتقراه عن الاساطير و الحكايات الخرافية. يمكن هحب الكتاب ده.
اتنحنحت: الكتاب ده حلو؟!
نزلت الكتاب عن وشها و كانت اول مرة اشوفها.. ملامح رقيقة، ضحكة و عيون بتلمع
ردت بحماس: جدا!!! لو بتحب الخيال هيعجبك، و لو بتؤمن بالحاجات اللي مش منطقية للناس الواقعية، يبقى انت وقعت على اكبر كنز ممكن تلاقيه!!!!
