ماما و بابا عندهم نفس الندبات و الحروق. ماما عندها ندبة شبه بتاعت بابا لما كان في ثانوي و وقع من على الskateboard فتح دماغه من ورا... بابا كمان عنده مكان حرق في ايده من ساعة لما ماما اتحرقت جامد في اول جوازهم. غريبة؟ لا هو ده اللي بيحصل لاتنين مقدرين لبعض، او زي ما بيقولوا "توائم روح". كنت بحب دايما اشوفهم و اتفرج على العلامات دي.. معناها انهم بيحسوا ببعض.. في كل حاجة!!! بقالي 22 سنة عايشة مستنية الاقي علامة على ايدي او رجلي بس مفيش!! ماهو يا اما انا معنديش توأم روح.. او ان التوأم ده بيحافظ على نفسه اوي!!! بس مش ده معناه ان.. اي علامة هتظهر عليه من عندي برضه؟!!
لا لا مش مجنونة!! الساعة 1 بعد نص الليل.. و فيه قلم ماركر اسود ع المكتب عندي من بقايا المشروع اللي بعمله للكلية..! فكرة مجنونة ايوه!! مسكت القلم بايدي اليمين و بدأت اخط على كف ايدي "الى السيد توأم روحي.. لو عايش و شايف الرسالة دي يا ريت ترد"
حطيت القلم على المكتب و انا بلطش نفسي قلم.. ايه الهبل اللي بهببه ده!!! روحت عشان اغسل ايدي بس لسه موجود! عاااااا بكره ابقى الاقي حاجة امسحه بيها!! حطيت دماغي تحت المخدة و انا ببرطم! ايه الهبل اللي بعمله ده؟ للدرجة دي بقيت رومانسية يائسة؟! طب ما ادي فرصة لهنري؟ اه هو اهبل بس طيب.. و اديه بيحبني برضه!! شوية و حسيت ان ايدي بتهرشني! نفس مكان الكتابة.. هرشت فيها من غير ما افكر بس لسه مضايقاني! بصيت فيها لقيت فيه كتابة مش بخطي تحت اللي كتبته!!!
"انتي... مين؟! ازاي ده ظهر على ايدي؟!"
كانت فيه صرخة هتفلت مني! ايه الرعب ده!!! بصيت حواليا و انا مخضوضة! مين ده؟!! ايه اللي بيحصل؟ جريت تاني بس جبت قلم جاف عادي "انت... شايف ده؟ انت.. توأم روحي؟!!" فضلت دقيقة و اتنين مستنية و اتنين و لما ملقتش رد قولت اكيد ده هبل و مش هيحصل تاني! بس للمرة التانية حسيت بنفس الشعور بس على دراعي فوق الرسغ بشوية..
"اه شايفه! انتي مين؟"
عينيا وسعت بحماس و رعب في نفس الوقت!!! يعني ده توأم روحي و لقيته صدفة؟!!! بس انا ايش عرفني هو مين؟ ولا هو كويس ولا لا!!! طب هو موجود فين؟! خطرتلي فكرة عبيطة تانية! "الساعة عندك كام؟"
فكرة عبيطة ايوه. دي اول حاجة يعني هعوز اعرفها؟! بس اه مش اعرف هو فين؟ مش يمكن هو عايش في النص التاني من الكرة الارضية و بطريقة عجيبة بيتكلم لغتي؟!
